Leerling steek onderwyser glo met mes

Henriette Lamprecht“Dit moet die laaste keer wees dat so iets by 'n skool gebeur. Voorvalle soos dié het geen plek in skole in Namibië nie.” Die uitvoerende direkteur van onderwys, kuns en kultuur, me. Sanet Steenkamp, het gister heftig gereageer op 'n voorval verlede week waartydens 'n graad 10-leerling aan 'n hoërskool op Okahandja 'n onderwyser op die perseel glo met 'n mes gesteek het. Die onderwyser is na wat verneem word in die skouerblad gesteek en moes mediese behandeling ontvang.“Dit was vir my angswekkend toe ek lees 'n onderwyser is met 'n mes gesteek. Ouers moenie eers vra vir vergunning om so 'n leerling weer by die skool toe te laat nie,” het Steenkamp gesê.Volgens haar steek voorvalle kop by skole uit waar sogenaamde bendes leerlinge en onderwysers terroriseer.“Dit sal glad nie geduld word nie. Ons werk in dié verband ook nou met die polisie saam. Daar is geen verskoning vir dié tipe optrede nie. Enigiemand wat 'n ander se lewe in gevaar stel, hoort nie by 'n skool nie.”Steenkamp het beklemtoon die regsproses moet sy gang gaan, maar haar ministerie meen die betrokke leerling moet nie na die skool terugkeer nie. Sy het verwys na die ministerie se nasionale raamwerk vir veilige skole wat ten doel het om 'n stelsel van self-evaluering en dokumentering te bied wat tot 'n beter begrip van skoolgeweld kan bydra. Laasgenoemde moet tot beter voorkoming en bestuur van geweld by skole lei. Volgens Steenkamp fokus dié raamwerk daarop om alle aspekte van veral afknouery te ondersoek. “In so 'n geval word na alle partye geluister, byvoorbeeld waarom boelie die leerling? Hier word die leerling op alle vlakke ondersteun. Met verwysing na verlede week se voorval is daar egter geen verskoning nie.”Steenkamp sê die betrokke onderwyser herstel goed en sal eers na die skool terugkeer wanneer hy ten volle herstel het. Volgens haar is 'n saak by die polisie aanhangig gemaak en het die skool proaktief opgetree. 'n Verslag oor die voorval sal aan Steenkamp gestuur met voorstelle vir dissiplinêre stappe om te volg.“Gevalle soos dié het geen plek in 'n skool nie. Ons staan daarby dat 'n leerling in so 'n geval nie weer kan terugkom skool toe nie.”Die nasionale onderwysdirektoraat gaan 'n maatskaplike werker na die skool stuur vir traumaberading en die polisie betrek om skole te besoek en met leerlinge te praat. – henriette@republikein.com.na

Leerling steek onderwyser glo met mes

Kommentaar

Republikein 2025-04-08

Meld asseblief aan om kommentaar te lewer

Leerling steek onderwyser glo met mes

Kommentaar

Republikein 2025-04-08

Meld asseblief aan om kommentaar te lewer

MELD AAN

Advertensie