Lichtenstrasser ontevrede met besluit oor regshulp
Lichtenstrasser ontevrede met besluit oor regshulp

Lichtenstrasser ontevrede met besluit oor regshulp

Die regshulpdirektoraat het verlede week besluit om 'n interne prokureur aan te stel.
Kristien Kruger
Kristien Kruger



Mnr. Ernst Lichtenstrasser, wat daarvan beskuldig word dat hy twee mans in 2019 by Arandis doodgeskiet het, is ontevrede met die direktoraat van regshulp in die ministerie van justisie (Legal Aid) se besluit om nie sy huidige prokureur te betaal nie en eerder 'n interne prokureur aan te stel om hom te verteenwoordig.

Tydens Lichtenstrasser se verskyning gister in die hoërhof in Windhoek is bekend gemaak dat die regs­hulpdirektoraat besluit het om ondanks hul aanvanklike plan nie Lichtenstrasser se huidige verteenwoordiger, adv. Trevor Brockerhoff, te betaal nie. Legal Aid het eerder Vrydag 'n interne prokureur, adv. Albert Titus, aangestel om hom te verteenwoordig.

Titus was egter nie gister in die hof teenwoordig nie.

“Ek is van plan om teen hierdie besluit te appelleer, want Brockerhoff is bereid om my te verteenwoordig met finansiering van die regshulp­direktoraat en nou kry ek 'n verteenwoordiger wat ek nie ken of vertrou nie,” het Lichtenstrasser gister aan Liebenberg gesê.

Liebenberg sê hy het begrip vir die beskuldigde se besluit om te appelleer, maar het hom gewaarsku dié proses tyd sal neem en sy verhoor sal heel moontlik dan eers in Junie volgende jaar kan geskied.

“Die saak is egter nie in die hof se hande nie; jy sal jou saak by die regs­hulpdirektoraat moet indien,” het Liebenberg gesê.

Volgens Liebenberg is die rede vir die regshulpdirektoraat se besluit onduidelik, maar hy vermoed dat hulle finansieel swaarkry. Dit is goedkoper om 'n interne prokureur aan te stel as om een van buite te betaal.

Lichtenstrasser se aansoek om regshulp is reeds op 10 November goedgekeur. Sy saak op vyf klagte, insluitend twee van moord, is gister tot 7 Desember vir voorverhoor uitgestel.

Die hofsaak hou verband met die skietdood van twee beamptes van die Namibiese Instituut vir Mynbou en Tegnologie, mnre. Eckhart Mueller (72) en Heimo Hellwig (60), op Arandis gedurende April 2019.

– [email protected]

Kommentaar

Republikein 2025-04-06

Geen kommentaar is op hierdie artikel gelaat nie

Meld asseblief aan om kommentaar te lewer