Lotto-wet trek vuur

Augetto GraigOningeligtheid en onsekerheid oor nuwe voorskrifte vir byna alle loterye, gelukstrekkings, promosiekompetisies en sportweddery mag volgens die regering nie 'n verskoning wees vir instansies, ondernemings en individue wat nuwe wetgewing in die verband pypkan nie. Die Wet op Loterye van 2017 het op 1 Desember dadelik en volledig van krag geword toe regulasies vir die uitvoering daarvan in die Staatskoerant gepubliseer is. Sommige regslui betwis of die regulasies redelik en prakties uitvoerbaar is. Fyn besonderhede skep 'n mynveld vir Jan en San Alleman. Die prokureursfirma Cronjé Inc. se raad is dat enige besigheid wat promosiekompetisies aanbied regsadvies inwin voor hulle voortgaan met enigiets wat moontlik strydig met die nuwe wet is. “Dis belangrik om kennis te neem van die wet, aangesien dit verskeie promosies en kompetisies verbied wat tans in Namibië gehou word,” waarsku die prokureurs. Oortreders kan 'n boete van tot N$100 000, tronkstraf van tot twee jaar, of beide op die hals haal. Basies is enige kompetisie wat op geluk eerder as vaardigheid gebaseer is en nie deur die nuwe loteryeraad goedgekeur is nie nou onwettig. Volgens die prokureurs ignoreer hierdie wet en regulasies verskeie praktiese en kommersiële kwessies in verband met sakebedrywighede. Met betrekking tot promosiekompetisies is veral regulasie 57 problematies, sê hulle, omdat dit vereis dat onafhanklike rekenmeesters, ouditeure of regspraktisyns se dienste betrek moet word. Besonderhede oor kompetisies moet in detail gerapporteer en geverifieër word. Die regulasies beperk die gesamentlike waarde van pryse vir promosiekompetisie tot N$12 miljoen of tot ses pryse van minder as N$1 miljoen elk. “’n Basiese wiskundige berekening sou die voorgenoemde bepaling heeltemal onversoenbaar maak,” skryf die prokureurs. Hulle sê daar is talle Namibiese ondernemings wat promosies met meer as ses pryse bied. Omdat artikel 73 van die wet ’n statutêre oortreding skep, word nou van alle besighede in Namibië verwag om die aard van hul promosies en kompetisies te verander. By navraag het die ministerie van die omgewing, bosbou en toerisme bevestig dat geraakte kompetisies steeds aangebied en geadverteer mag word – maar alleenlik as dit vooraf goedgekeur is. Die woordvoerder vir die ministerie, mnr. Romeo Muyunda, voeg by dat oorgrensloterye ook by die raad moet registreer. Hy sê die ministerie is steeds besig om die raad volledig op die been te bring voor stappe teen enige oortreders gedoen word. Die loteryeraad moet sy eie werknemers aanstel, insluitend inspekteurs, en sal met behulp van die Namibiese polisie die wet handhaaf en afdwing, sê Muyunda. Hy sê dis nog te vroeg om die omvang van implikasies van die wet te peil. Die nuwe wettige raamwerk is bedoel om die loterybedryf te verbeter, sê hy. “Die ministerie bly oop vir voortgesette betrokkenheid by die implementeringsproses van die nuwe loterywet en regulasies. Ons moedig die rolspelers in die bedryf aan om aan die nuwe wet te voldoen en die ministerie te nader vir enige verduidelikings,” sê hy. Die sakeman mnr. Shahil Morar van raffles.com.na sê egter dis nie so eenvoudig nie. “Ons pogings om die ministerie te kontak, werp nie vrugte af nie, wat dit moeilik maak om dringend die nodige uitklaring te kry,” sê hy. “Daar is teenstrydighede in die wet en dit blyk dit was sonder deelname van die publiek of belanghebbers ontwikkel. Die beperkinge op advertensies en kostes is onprakties en maak die promosie van sulke aktiwiteite amper onmoontlik,” sê hy. “Ons is nietemin wetsgehoorsame burgers en ons sal voortgaan om die ministerie te kontak vir verduideliking. Ons het egter beloftes aan die publiek in terme van pryse en waardes gemaak en ons beoog om dit na te kom,” dring hy aan. – augetto@republikein.com.na

Lotto-wet trek vuur

Kommentaar

Republikein 2024-11-25

Meld asseblief aan om kommentaar te lewer

Lotto-wet trek vuur

Kommentaar

Republikein 2024-11-25

Meld asseblief aan om kommentaar te lewer

MELD AAN

Advertensie