Lugalarm lui vir rederye

Ronelle Rademeyer - Die soeklig het vandeesweek geskyn op die lugvaartbedryf in Afrika as een van die bedrywe wat ekonomies die ergste deur die Covid-19-gesondheidskrisis verrinneweer is.Lugverkeer op die vasteland het met 89% afgeneem en rederye se verlies aan inkomste sal in 2020 na verwagting meer as US$6 miljard (N$96 miljard) beloop.Die impak van die lugvaartbedryf se ellende kring egter veel wyer uit. Daar word verwag die bruto binnelandse produk (BBP) wat deur lugvaart op die vasteland ondersteun word, sal met US$37 miljard (N$592 miljard) krimp. Dit is ’n daling van 58%.Dié syfers het Maandag tydens die algemene jaarvergadering van die Vereniging vir Redery in Afrika (AFRAA) aan die lig gekom.“Ons is in die grootste krisis wat dié bedryf nog beleef het. Rederye se inkomste het in duie gestort. Vliegtuigvlote is gehok; en ekstreme planne word beraam net om te kan oorleef.”Só het mnr. Alexandre de Juniac, direkteur-generaal van die Internasionale Lugvervoervereniging (Iata), in ’n virtuele boodskap aan AFRAA gesê.Hy het daarop gewys die lewensmiddele van 5 miljoen mense in Afrika wat direk of indirek op lugvaart steun, is in die gedrang.“Ons ondersteun almal pogings om die Covid-19-pandemie te beperk. Dit is ons plig en ons sal die oorhand daaroor kry. Maar beleidmakers moet weet dit geskied teen ’n enorme koste vir werksgeleenthede, individuele vryhede en lande se ekonomieë,” het De Juniac gesê.“Ons het ’n gesondheidskrisis wat ontwikkel het in ’n werks- en ekonomiese ramp. Die regstelling daarvan val buite die bestek van wat ons as bedryf kan doen.“Ons het nodig dat regerings optree, en dit vinnig doen,” was sy woorde.Volgens De Juniac het vier rederye in Afrika reeds ophou vlieg en twee is in sakeredding. Laasgenoemde is South African Airways (SAA) en British Airways se Suider-Afrikaanse operateur, Comair. Hy het AFRAA versoek om saam met Iata ’n beroep op regerings te doen vir die volgende:· Die beskikbaarstelling van die beloofde finansiële hulp waarsonder rederye nie sal kan voortbestaan nie; en· Tweedens om landsgrense sonder enige Covid-19-toets- en kwarantynmaatreëls te heropen.Hy sê meer as US$31 miljard (N$496 miljard) se finansiële hulp is deur Afrikaregerings, internasionale finansieringsliggame en ander instellings, insluitend die Afrika-ontwikkelingsbank (AfDB), die Afrika-unie (AU) en die Internasionale Monetêre Fonds (IMF), aan die bedryf beloof.“Beloftes betaal ongelukkig nie die rekeninge nie,” sê De Juniac en voeg by baie min van dié finansiële hulp het tot nou toe gerealiseer.Hy wys daarop geld wat vir die oorlewing van rederye beskikbaar gestel word, is ’n belegging in die toekoms van die vasteland. Sonder finansieel gesonde rederye kan lande nie van die Covid-19 se verwoestende ekonomiese impak herstel nie, meen De Juniac.Verder, sê hy, is dit belangrik om daarop te let dat mense nie hulle behoefte om te reis verloor het nie. Bewegingsbeperkings maak dit egter vir hulle moeilik en soms selfs onmoontlik.“Altesaam 44 Afrikalande het hul grense vir streek- en internasionale lugverkeer heropen. In 20 van hierdie lande is passasiers egter steeds aan verpligte kwarantyn vir ’n tydperk van 14 dae onderworpe. Wie sal reis as dit die voorwaarde is,” wil hy weet.INTERNASIONAAL Rederye elders in die wêreld se nood is ewe groot. Iata en die Internasionale Vervoerwerkersfederasie (ITF) het intussen Dinsdag in ’n gesamentlike verklaring ’n pleidooi aan regerings oraloor gerig om ’n “werknemerskatastrofe” in die internasionale lugvaartbedryf af te weer.Ramings deur die Aksiegroep vir Lugvervoer dui daarop 4,8 miljoen mense gaan hul werk verloor.“Lugvaart staar ’n ongekende werksramp in die gesig. Rederye het die koste tot op die been gesny, maar onder huidige omstandighede is daar net 8,5 maande se kontant oor. Tienduisende poste het al verlore gegaan, en tensy regerings meer finansiële verligting bied, sal dit waarskynlik tot honderdduisende toeneem. “Lugvaart verbind land en vervoer noodsaaklike vrag, en dit is in regerings se eie belang om verdere finansiële hulp aan te bied om die bedryf lewensvatbaar te hou. Maar belangriker nog, regerings moet saamwerk om grense veilig weer oop te maak,” het De Juniac in dié verklaring gesê.Iata en die ITF pleit vir ’n internasionale Covid-19-toetsstelsel en die afskaffing van kwarantynmaatreëls vir internasionale reisigers.“Ons kliënte wíl vlieg. Hulle begeer die verkenning wat lugvaart moontlik maak. Hulle wil internasionaal sake doen en sonder lugvaart is dit onmoontlik. Hulle wil graag weer met familie en geliefdes herenig word,” sê hy.

Lugalarm lui vir rederye

Kommentaar

Republikein 2024-12-26

Meld asseblief aan om kommentaar te lewer

Lugalarm lui vir rederye

Kommentaar

Republikein 2024-12-26

Meld asseblief aan om kommentaar te lewer

MELD AAN

Advertensie