Manna vir Maerua

“Manna beteken brood en brood beteken lewe. “Dit is presies wat ons vir Huis Maerua se kinders wil gee - ‘n lewe, ‘n Lewe vol hoop, ambisie en goeie herinneringe.” So sê Liana Etsebeth, administratiewe assistent van Huis Maerua.Huis Maerua se missie en passie is om die lewe van minderbevoorregte kinders te verryk. “Ons werk op ‘n satelliethuisstelsel, en het drie huise op die perseel wat tot 24 kinders kan akkommodeer. Die kinders in ons sorg word ingevolge 'n hofbevel by ons geplaas.”Elke huis het ‘n voltydse huisouer wat seker maak die kinder kry gebalanseerde etes en onbaatsugtig liefde, en dat in hul basiese behoeftes voorsien word. Huis Maerua word 90% deur donasies en geldinsamelings aan die gang gehou.“Weens finansiële uitdagings het baie van ons borge onttrek. Ons het besluit om aan die werk te spring en die somer behoorlik te verwelkom met ‘n reeks aktiwiteite waaraan die publiek kan deelneem.”HUIS MAERUA MAKIETIE“Môreoggend hou ons ‘n damestee by NG Kerk Pionierspark se kerksaal. Verrigtinge begin om 09:00 en gaste ontvang ‘n verwelkomingsverversing, asook ‘n vrugtesappie en/of ‘n koffie in die hand. Daarna gaan ons aansit in ‘n saal wat vol positiwiteit, vreugde en liefde gesaai is. Ons gasspreker is Annelise de Jager en dit beloof ‘n praatjie te wees wat jy nie moet misloop nie. As hierdie tyd van die jaar jou entoesiasme drein en jou blaaskans in Desember nog ver lê, is dit beslis die plek om te wees,” sê Etsebeth. John Owens, 'n voormalige mnr. Suid-Afrika, sal ook by die geleentheid wees. “Hy gaan ‘n paar groot pryse oorhandig, onder meer 'n Sundowner Intro Flight geskenk deur Signa Air, 'n Visia Analysis-konsultasie geskenk deur dr. Marisa Venter, 'n naweekwegbreek geskenk deur West Nest Lodge, en 'n Enamel Casserole van Pupkewitz. Gerhard Supra sal die funksie vir ons lekker afrond met sy goue stem, in die teenwoordigheid van ons eie Mej. Namibië, Nadia Breytenbach.”Kaartjies beloop N$350 per persoon of N$2 500 vir ‘n tafel vir agt mense. Daar is net 'n paar sitplekke oor.KLEINGELD VIR KINDERSDie lekker hou nie by die damestee op nie. Gerhard Supra gaan ook die inwoners van Windhoek, Otjiwarongo en Walvisbaai vermaak, en aanspoor om die spaarblikkies vol te maak. “Ons doen weer eens ‘n beroep op die publiek om hul kleingeld bymekaar te maak en te bring na die geleenthede om sodoende die blikkies te vul en vreugde te saai in ‘n kind se lewe,” sê Etsebeth.Gerhard is op 18 September by Die Bendehuis in Windhoek, op 25 September by Casa Forno op Otjiwarongo, en op 27 September by die Hengelklub op Walvisbaai. Toegang is gratis.DONASIES SONDER GRENSE“Is jy te ver en kan nie een van die byeenkomste bywoon nie? “Neem dan deel aan ons SMS-lynkompetisie. Al wat jy moet doen, is om die woord “MANNA” na die nommer 5005 te SMS, soveel kere as wat jy wil. Ook hier gee ons ook graag iets terug aan die gemeenskap. Op 30 September om middernag sluit die SMS-lyn en dan gaan een gelukkige deelnemer ‘n naweek vir twee by die Zebra River Lodge wen, ontbyt en aandete ingesluit! “Huis Maerua Kinderhuis wil vir al ons borge baie dankie sê vir jul getroue bystand en ondersteuning. Sonder julle sou ons dit definitief nie kon doen nie.”Vir enige navrae kontak gerus vir Liana by 081 586 9095 en Erna by 081 776 2636.Huis Maerua bedank hul borge Casa Forno, Town Lodge, Dynamic Mobile Solutions, C’est Si Bon Hotel/Lodge, Silver Spoon Hospitality Academy, West Nest Lodge, Walvibaai Hengelklub, Arebbusch Lodge, Die Bendehuis, Caterplus, Red Bull en Africa Personnel Services.

Manna vir Maerua

Kommentaar

Republikein 2024-11-15

Meld asseblief aan om kommentaar te lewer

Manna vir Maerua

Kommentaar

Republikein 2024-11-15

Meld asseblief aan om kommentaar te lewer

MELD AAN

Advertensie