Mans én vroue bal vuis teen geslagsgeweld
Aanbevelings vir die beter hantering van geweld wat op geslag gebaseer is, is aan verskeie owerhede oorhandig.
Tanja Bause
Sowat 200 mans en vroue het gister aan die #TOTALSHUTDOWNnam-optog teen geslagsgeweld (GBV) in Windhoek deelgeneem.
Die optog het by die Katutura-staatshospitaal afgeskop, waarna dit na die Katutura-polisiekantoor beweeg het en by die Windhoek-landdroshof in Katutura ten einde geloop het.
Soortgelyke optogte is gister in Botswana, Suid-Afrika en Lesotho gehou.
Optogleiers het aanbevelings om die probleem van GBV in Namibië in die bek te ruk aan die ministerie van geslagsgelykheid en kinderwelsyn, die Namibiese polisie en die ministerie van justisie oorhandig.
Die eerste aanbevelings is by die Katutura-staatshospitaal voorgelees.
Hierin word versoek dat menslike hulpbronne onmiddellik in die Vroue- en Kinderbeskermingseenheid (WACPU) oftewel die polisie se ondersoekeenheid vir geslagsgebaseerde geweld, soos dit vanaf 2015 bekend staan, belê word.
“In 2016 het adj.komm. Situde bekend gemaak dat meer as 50 000 gevalle van GBV oor 'n tydperk van drie jaar aangemeld is.
“Op enige gegewe tyd was vier tot ses maatskaplike werkers by WACPU aan diens. WACPU is geweldig onderbeman. Ons moedig die ministerie van geslagsgelykheid en kinderwelsyn aan om hierdie tekort aan te spreek,” het me. Alna Dall, een van die optogorganiseerders, gesê.
“Om te verseker elke klagte of dreigement word op 'n doeltreffende en sensitiewe manier hanteer, moet sake na sielkundiges verwys word. Maatskaplike werkers word nie opgelei om kliënte sielkundige ondersteuning te bied nie. Ons beveel aan dat die ministerie hande met die private sektor en nieregeringsorganisasies (NGO's) vat . . .”
veiligheid
“Ons weet daar is nie genoeg veilige hawens vir vroue, kinders en mense wat dit benodig nie. Kliënte word dikwels huis toe gestuur na die oortreders, omdat daar net drie staatskuilings in Windhoek is.
“Minister, u faal dié vroue deur nie druk op die regering uit te oefen vir die bou van meer skuilings in Windhoek en in die res van Namibië nie. Ons as NGO's beveel aan dat die ministerie onmiddellik met nieregeringsorganisasies, internasionale humanitêre organisasies en ander ministeries vergader om gemeenskapsgedrewe skuilings moontlik te maak.”
Aanbevelings aan die Namibiese polisie is aan die polisiehoof, lt.genl. Sebastian Ndeitunga, voorgelees.
“Ons stel voor alle polisiebeamptes, ongeag hul status, ontvang onmiddellik opleiding in geslagsensitiwiteit.
“Ons doen 'n beroep daarop dat die Verenigde Nasies se gereedskap vir geslagskwessies deur die polisie gebruik word. Ons versoek loopbaanondersteuning aan vroulike polisiebeamptes . . .” het me. Linda Baumann, nog een van die organiseerders, gesê.
'n Vrou wat aan die optog deelgeneem het, het gesê sy, sowel as familie en vriende van haar is al verkrag.
“Ek wou 'n klag by WACPU aanhangig maak, maar die vroulike polisiebeampte het my ongelooflik sleg behandel. Só sleg dat ek die klag nie gelê het nie. Ek het haar aangegee en niks het daarvan gekom nie,” het sy gesê.
By die Windhoek-landdroshof in Katutura het die adjunkminister van justisie, me. Ludwina Shapwa, die groep se aanbevelings ontvang.
“Ons versoek u om voorkeur te gee aan die opstel van 'n register van seksoortreders sodat beskermingsdienste herhalende oortreders maklik kan identifiseer en sodat vroue en ander mense gewaarsku en beskerm kan word wat hulself in 'n moontlik gevaarlike situasie met iemand bevind wat reeds weens GBV aangekla is,” het me. Rosa Namises, ook een va die organiseerders, gesê.
Sowat 200 mans en vroue het gister aan die #TOTALSHUTDOWNnam-optog teen geslagsgeweld (GBV) in Windhoek deelgeneem.
Die optog het by die Katutura-staatshospitaal afgeskop, waarna dit na die Katutura-polisiekantoor beweeg het en by die Windhoek-landdroshof in Katutura ten einde geloop het.
Soortgelyke optogte is gister in Botswana, Suid-Afrika en Lesotho gehou.
Optogleiers het aanbevelings om die probleem van GBV in Namibië in die bek te ruk aan die ministerie van geslagsgelykheid en kinderwelsyn, die Namibiese polisie en die ministerie van justisie oorhandig.
Die eerste aanbevelings is by die Katutura-staatshospitaal voorgelees.
Hierin word versoek dat menslike hulpbronne onmiddellik in die Vroue- en Kinderbeskermingseenheid (WACPU) oftewel die polisie se ondersoekeenheid vir geslagsgebaseerde geweld, soos dit vanaf 2015 bekend staan, belê word.
“In 2016 het adj.komm. Situde bekend gemaak dat meer as 50 000 gevalle van GBV oor 'n tydperk van drie jaar aangemeld is.
“Op enige gegewe tyd was vier tot ses maatskaplike werkers by WACPU aan diens. WACPU is geweldig onderbeman. Ons moedig die ministerie van geslagsgelykheid en kinderwelsyn aan om hierdie tekort aan te spreek,” het me. Alna Dall, een van die optogorganiseerders, gesê.
“Om te verseker elke klagte of dreigement word op 'n doeltreffende en sensitiewe manier hanteer, moet sake na sielkundiges verwys word. Maatskaplike werkers word nie opgelei om kliënte sielkundige ondersteuning te bied nie. Ons beveel aan dat die ministerie hande met die private sektor en nieregeringsorganisasies (NGO's) vat . . .”
veiligheid
“Ons weet daar is nie genoeg veilige hawens vir vroue, kinders en mense wat dit benodig nie. Kliënte word dikwels huis toe gestuur na die oortreders, omdat daar net drie staatskuilings in Windhoek is.
“Minister, u faal dié vroue deur nie druk op die regering uit te oefen vir die bou van meer skuilings in Windhoek en in die res van Namibië nie. Ons as NGO's beveel aan dat die ministerie onmiddellik met nieregeringsorganisasies, internasionale humanitêre organisasies en ander ministeries vergader om gemeenskapsgedrewe skuilings moontlik te maak.”
Aanbevelings aan die Namibiese polisie is aan die polisiehoof, lt.genl. Sebastian Ndeitunga, voorgelees.
“Ons stel voor alle polisiebeamptes, ongeag hul status, ontvang onmiddellik opleiding in geslagsensitiwiteit.
“Ons doen 'n beroep daarop dat die Verenigde Nasies se gereedskap vir geslagskwessies deur die polisie gebruik word. Ons versoek loopbaanondersteuning aan vroulike polisiebeamptes . . .” het me. Linda Baumann, nog een van die organiseerders, gesê.
'n Vrou wat aan die optog deelgeneem het, het gesê sy, sowel as familie en vriende van haar is al verkrag.
“Ek wou 'n klag by WACPU aanhangig maak, maar die vroulike polisiebeampte het my ongelooflik sleg behandel. Só sleg dat ek die klag nie gelê het nie. Ek het haar aangegee en niks het daarvan gekom nie,” het sy gesê.
By die Windhoek-landdroshof in Katutura het die adjunkminister van justisie, me. Ludwina Shapwa, die groep se aanbevelings ontvang.
“Ons versoek u om voorkeur te gee aan die opstel van 'n register van seksoortreders sodat beskermingsdienste herhalende oortreders maklik kan identifiseer en sodat vroue en ander mense gewaarsku en beskerm kan word wat hulself in 'n moontlik gevaarlike situasie met iemand bevind wat reeds weens GBV aangekla is,” het me. Rosa Namises, ook een va die organiseerders, gesê.
Kommentaar
Republikein
Geen kommentaar is op hierdie artikel gelaat nie