'Mars-huis' kan kos, boumateriaal maak
Wetenskaplikes wil Nasa-tegnologie inspan om Namibië se indringerbos- én behuisingsprobleem te takel.
Elvira Hattingh
'n Revolusionêre fasiliteit wat indringerbos in supersterk boumateriaal omskakel en terselfdertyd sampioene produseer sal teen April volgende jaar op Brakwater opgerig word.
Boonop kan dit 'n oplossing vir Namibië se behuisingsprobleem bied omdat 'n eerste fasiliteit binne sowat 63 dae 'n tweede fasilteit kan “kweek”.
“Die tegnologie is oorspronklik vir die mensdom se beplande kolonisering van Mars ontwerp, waar water en boumateriaal beperk is. Mense sal blyplek, plase en strukture moet opsit van materiaal uit afvalprodukte,” het dr. Andreas Mershin gister tydens Namibië se eerste Biomassa-simposium in Windhoek gesê.
“Dit is Nasa-tegnologie,” het Mershin gesê.
“Boonop blyk Namibië se swarthaak (Acacia mellifera) die beste materiaal te wees om in die fasiliteit te gebruik omdat dit die sterkste boumateriaal lewer.
Mershin is verbonde aan die Massachusetts Institute of Technology (MIT), wat die projek ontwikkel het en wêreldbekend is vir wetenskaplike en tegnologiese opleiding en navorsing.
Die projek behoort aan die Standard Bank-groep.
Só WERK DIT
Mershin verduidelik boumateriaal sal in die fasilteit geskep word deur sampioene se wortelstelsel deur houtskerwe te laat groei. Wanneer dit gebeur, word die houtskerwe saamgebind tot 'n baie sterk struktuur.
“Die sampioene se wortelstelsel verteer dit. Dit word dan saamgebind sonder die gebruik van enige skadelike chemikalieë of gom wat byvoorbeeld vir ander boumateriaal gebruik word. Dit is ligter en goedkoper, maar ook sterker as hout of sement,” het hy gesê.
Mershin sê selfs druk van 25 ton op die saamgebinde swarthaak-materiaal kon dit nie breek nie.
FASILITEIT
Die beplande fasiliteit op Brakwater is boonop bewoonbaar binne 12 ure ná die opslaanproses begin is.
“Dit begin as 'n opblaasbare struktuur, wat dan deur boumateriaal en isolering bedek word. Dit sal verskeie masjiene huisves waarmee verskillende produkte en strukture gemaak kan word.
“Dit sal ook die Weldmaster-masjien huisves, wat enig in sy soort is en strukture uit buigbare materiaal kan maak. Dit kan die materiaal saambind en enigiets van baniere, sakke en meubels tot springkastele en volledige huise vervaardig.
“'n Opblaasbare huis klink belaglik, maar onthou, dit is net die dop wat oor en oor gebruik kan word om verskillende huise te bou. Die opblaasbare deel word deur boumateriaal bedek, waarná dit weer afgeblaas en weggeneem word.
“Op dié manier word sogenaamde selfproduserende, selfonderhoudende huise geskep. So 'n huis produseer materiaal om 'n tweede huis te bou, terwyl die twee huise dan genoeg vir vier huise produseer, die vier huise vir agt ensovoorts.
“Dit kan binne 'n siklus van 63 dae gedoen word,” het Mershin gesê.
NUWE TERREIN
“Selfonderhoudende huise is 'n boeiende onderwerp. Dis nie net revolusionêr nie, dis evolusionêr,” het hy gesê.
Mershin sê Namibië kan die leier op die gebied van bioboumateriaal word en groot geleenthede bestaan wêreldwyd om tradisionele boumateriaal te vervang.
“Namibië gaan eindelik die materiaal na Amerika en die Westerse wêreld kan uitvoer.
“Ander lande het reeds sterk gevestigde boubedrywe wat 'tradsionele' boumateriaal vervaardig. Hulle voel bedreig deur dié verwikkeling, net soos byvoorbeeld gloeilampe kersmakers bedreig het.
“Namibië het nie 'n groot vervaardigingsbedryf van boumateriaal nie en ons bied 'n moontlike oplossing op behuisingsnood. Dit gaan selfs werksgeleenthede skep.”
- [email protected]
'n Revolusionêre fasiliteit wat indringerbos in supersterk boumateriaal omskakel en terselfdertyd sampioene produseer sal teen April volgende jaar op Brakwater opgerig word.
Boonop kan dit 'n oplossing vir Namibië se behuisingsprobleem bied omdat 'n eerste fasiliteit binne sowat 63 dae 'n tweede fasilteit kan “kweek”.
“Die tegnologie is oorspronklik vir die mensdom se beplande kolonisering van Mars ontwerp, waar water en boumateriaal beperk is. Mense sal blyplek, plase en strukture moet opsit van materiaal uit afvalprodukte,” het dr. Andreas Mershin gister tydens Namibië se eerste Biomassa-simposium in Windhoek gesê.
“Dit is Nasa-tegnologie,” het Mershin gesê.
“Boonop blyk Namibië se swarthaak (Acacia mellifera) die beste materiaal te wees om in die fasiliteit te gebruik omdat dit die sterkste boumateriaal lewer.
Mershin is verbonde aan die Massachusetts Institute of Technology (MIT), wat die projek ontwikkel het en wêreldbekend is vir wetenskaplike en tegnologiese opleiding en navorsing.
Die projek behoort aan die Standard Bank-groep.
Só WERK DIT
Mershin verduidelik boumateriaal sal in die fasilteit geskep word deur sampioene se wortelstelsel deur houtskerwe te laat groei. Wanneer dit gebeur, word die houtskerwe saamgebind tot 'n baie sterk struktuur.
“Die sampioene se wortelstelsel verteer dit. Dit word dan saamgebind sonder die gebruik van enige skadelike chemikalieë of gom wat byvoorbeeld vir ander boumateriaal gebruik word. Dit is ligter en goedkoper, maar ook sterker as hout of sement,” het hy gesê.
Mershin sê selfs druk van 25 ton op die saamgebinde swarthaak-materiaal kon dit nie breek nie.
FASILITEIT
Die beplande fasiliteit op Brakwater is boonop bewoonbaar binne 12 ure ná die opslaanproses begin is.
“Dit begin as 'n opblaasbare struktuur, wat dan deur boumateriaal en isolering bedek word. Dit sal verskeie masjiene huisves waarmee verskillende produkte en strukture gemaak kan word.
“Dit sal ook die Weldmaster-masjien huisves, wat enig in sy soort is en strukture uit buigbare materiaal kan maak. Dit kan die materiaal saambind en enigiets van baniere, sakke en meubels tot springkastele en volledige huise vervaardig.
“'n Opblaasbare huis klink belaglik, maar onthou, dit is net die dop wat oor en oor gebruik kan word om verskillende huise te bou. Die opblaasbare deel word deur boumateriaal bedek, waarná dit weer afgeblaas en weggeneem word.
“Op dié manier word sogenaamde selfproduserende, selfonderhoudende huise geskep. So 'n huis produseer materiaal om 'n tweede huis te bou, terwyl die twee huise dan genoeg vir vier huise produseer, die vier huise vir agt ensovoorts.
“Dit kan binne 'n siklus van 63 dae gedoen word,” het Mershin gesê.
NUWE TERREIN
“Selfonderhoudende huise is 'n boeiende onderwerp. Dis nie net revolusionêr nie, dis evolusionêr,” het hy gesê.
Mershin sê Namibië kan die leier op die gebied van bioboumateriaal word en groot geleenthede bestaan wêreldwyd om tradisionele boumateriaal te vervang.
“Namibië gaan eindelik die materiaal na Amerika en die Westerse wêreld kan uitvoer.
“Ander lande het reeds sterk gevestigde boubedrywe wat 'tradsionele' boumateriaal vervaardig. Hulle voel bedreig deur dié verwikkeling, net soos byvoorbeeld gloeilampe kersmakers bedreig het.
“Namibië het nie 'n groot vervaardigingsbedryf van boumateriaal nie en ons bied 'n moontlike oplossing op behuisingsnood. Dit gaan selfs werksgeleenthede skep.”
- [email protected]
Kommentaar
Republikein
Geen kommentaar is op hierdie artikel gelaat nie