May wil skoon breek met EU hu00ea
May wil skoon breek met EU hu00ea

May wil skoon breek met EU hê

Die Britse premier, Theresa May, het gister in 'n waterskeidingstoespraak, meer helderheid gegee oor hoe sy die pad vorentoe vir Brittanje se uittrede uit die Europese Unie sien.
Estelle de Bruyn
Die Britse eerste minister, Theresa May, het in ‘n toespraak aangedui dat Brittanje ‘n skoon breek van die Europese Unie wil hê en nie daarna streef om “half-in, half-uit” te bly nie.

In haar mees gedetailleerde toespraak nog oor die Verenigde Koninkryk se vertrek-strategie, het May belowe om “’n nuwe en gelyke vennootskap” met die EU te smee.

“Geen gedeeltelike lidmaatskap van die EU nie, geen assosiaat-lidmaatskap van die EU of enige iets wat ons half-in, half-uit sal laat nie,” het sy gesê.

Sy het ook die versekering gegee dat die land nie ‘n model sal aanvaar wat deur ander lande in hul betrekkinge met die EU gebruik word nie. Dit is oënskynlik ‘n aanduiding dat die land nie die soort noue betrekkinge wat nie-lede van die EU, soos Switserland en Noorweë geniet, sal nastreef nie.

Dit was verwag dat dit ‘n verdere skok vir die Britse pond sou wees, wat Maandag vir minder as US$1,20 verhandel het.

May het gesê sy verwerp sowel die “harde Brexit”- en die teenoorgestelde kompromis “sagte Brexit”-etikette. Sy wil veel eerder nuwe betrekkinge tot stand bring wat in belang van sowel Brittanje as die EU is.

"Ons wil julle goedere koop, ons wil ons s’n aan julle verkoop, so vry as moontlik handel dryf en met mekaar saamwerk om te verseker dat almal veiliger en meer voorspoedig deur middel van ons voortgesette vriendskap is,” het sy gesê.

Om vrese te besweer dat Brexit ‘n meer geïsoleerde Brittanje teweeg sou bring, het May gesê sy wil hê die land moet “sterker, regverdiger, meer verenig en meer uitwaarts kykend as ooit vantevore wees.”

Om hierdie nuwe benadering te weerspieël, het May haar toespraak voor Britse staatsamptenare en internasionale diplomate in Londen se Lancaster House gehou. Dit is ‘n Georgiaanse herehuis, waar verskeie internasionale spitsberade reeds vir dekades aangebied is. Nampa/AP

Kommentaar

Republikein 2025-04-20

Geen kommentaar is op hierdie artikel gelaat nie

Meld asseblief aan om kommentaar te lewer