Mediasie ná 'aanranding tydens eerste inperking'
Jana-Mari Smith – 'n Regsgeding van N$400 000 wat twee inwoners van Swakopmund teen die polisie aanhangig gemaak het ná 'n beweerde aanranding tydens die eerste inperking in Namibië verlede jaar betree die bemiddelingsfase.
Mnre. Ruben Asser en Simeon Simon beweer hulle is albei gewelddadig aangerand en toe gedwing om op die grond te rol terwyl hulle mekaar se lywe vasgehou het. Die voorval het verlede jaar op 4 April by die Mondesa-polisiekantoor plaasgevind.
Mnr. Norman Tjombe, 'n menseregteprokureur, het kort ná die voorval ingestem om hulle te verteenwoordig.
“Die eisers is deur 'n aantal lede van die Namibiese polisie aangerand, wat hulle toe met vuiste geslaan en gedwing het om op die grond te lê en in die stof rond te rol,” lui die gewysigde eisbesonderhede.
“Ek het vir my lewe gevrees, want ek het gedink ek sal doodgemaak of ernstig seergemaak word. Ek is 'n paar keer met toe vuiste in my maag geslaan wat ontsaglike pyn veroorsaak het,” sê Simon in sy beëdigde verklaring.
'VERNEDEREND'
Hy het gesê hy het tussen die houe verskeie kere op die grond geval en nog beserings opgedoen.
Simon sê behalwe dat hulle met die vuis geslaan is, is hulle ook verskeie kere geklap.
Hy sê ná die aanranding het die polisiebeamptes hom na die grond gedwing en hom aangesê om Asser, wat ook “wreed aangerand is”, se bene vas te hou.
“Die polisiebeamptes het ons toe beveel om in die sand rond te rol. Terwyl ons dit gedoen het, het hulle gelag en ons gespot.”
Hy het gesê die voorval was baie vernederend en dat dit 'n “ongevraagde straf” was.
'n Polisiebeampte op die toneel het 'n gedeelte van die aanranding op kamera vasgelê. Die video is wyd in die sosiale media versprei, wat volgens die duo tot hulle vernedering en pyn bygedra het.
Die twee eis elkeen N$200 000 in skadevergoeding.
Hulle sê afgesien van die fisieke pyn en beserings wat in die eerste week ná die aanval opgedoen is, het hulle ook langtermyn-trauma opgedoen.
Die verweerders, wat gelys is as die Namibiese regering wat die ministerie van binnelandse sake, immigrasie, veiligheid en sekuriteit verteenwoordig, ontken in hul pleitverduideliking die aantygings en erken slegs dat die twee eisers op daardie dag by die polisiekantoor was.
“Die Namibiese polisie het binne hul statutêre pligte opgetree, wat binne die verloop en omvang van hul diens by die verweerder was,” lui die pleitverduideliking.
Hoërhofregter Orben Sibeya het gister die saak tot 7 September uitgestel vir 'n bemiddelingsverhoor.
- [email protected]
Mnre. Ruben Asser en Simeon Simon beweer hulle is albei gewelddadig aangerand en toe gedwing om op die grond te rol terwyl hulle mekaar se lywe vasgehou het. Die voorval het verlede jaar op 4 April by die Mondesa-polisiekantoor plaasgevind.
Mnr. Norman Tjombe, 'n menseregteprokureur, het kort ná die voorval ingestem om hulle te verteenwoordig.
“Die eisers is deur 'n aantal lede van die Namibiese polisie aangerand, wat hulle toe met vuiste geslaan en gedwing het om op die grond te lê en in die stof rond te rol,” lui die gewysigde eisbesonderhede.
“Ek het vir my lewe gevrees, want ek het gedink ek sal doodgemaak of ernstig seergemaak word. Ek is 'n paar keer met toe vuiste in my maag geslaan wat ontsaglike pyn veroorsaak het,” sê Simon in sy beëdigde verklaring.
'VERNEDEREND'
Hy het gesê hy het tussen die houe verskeie kere op die grond geval en nog beserings opgedoen.
Simon sê behalwe dat hulle met die vuis geslaan is, is hulle ook verskeie kere geklap.
Hy sê ná die aanranding het die polisiebeamptes hom na die grond gedwing en hom aangesê om Asser, wat ook “wreed aangerand is”, se bene vas te hou.
“Die polisiebeamptes het ons toe beveel om in die sand rond te rol. Terwyl ons dit gedoen het, het hulle gelag en ons gespot.”
Hy het gesê die voorval was baie vernederend en dat dit 'n “ongevraagde straf” was.
'n Polisiebeampte op die toneel het 'n gedeelte van die aanranding op kamera vasgelê. Die video is wyd in die sosiale media versprei, wat volgens die duo tot hulle vernedering en pyn bygedra het.
Die twee eis elkeen N$200 000 in skadevergoeding.
Hulle sê afgesien van die fisieke pyn en beserings wat in die eerste week ná die aanval opgedoen is, het hulle ook langtermyn-trauma opgedoen.
Die verweerders, wat gelys is as die Namibiese regering wat die ministerie van binnelandse sake, immigrasie, veiligheid en sekuriteit verteenwoordig, ontken in hul pleitverduideliking die aantygings en erken slegs dat die twee eisers op daardie dag by die polisiekantoor was.
“Die Namibiese polisie het binne hul statutêre pligte opgetree, wat binne die verloop en omvang van hul diens by die verweerder was,” lui die pleitverduideliking.
Hoërhofregter Orben Sibeya het gister die saak tot 7 September uitgestel vir 'n bemiddelingsverhoor.
- [email protected]
Kommentaar
Republikein
Geen kommentaar is op hierdie artikel gelaat nie