Mediese tariewe is ‘bloot riglyne’

Henriette Lamprecht – Net die staat se mediese fonds Psemas gebruik die Vereniging vir Namibiese Mediese Fondse (NAMAF) se standaardtariewe vir 2014.

Volgens Namaf se uitvoerende hoof, mnr. Stephen Tjiuoro, is Psemas uitdruklik uitgesluit uit die wet vir mediese fondse en het Namaf gevolglik geen mandaat oor die skema nie, ongeag die feit dat dit ’n reguleerder is.

“Psemas val onder die mandaat van die ministerie van finansies, wat besluite met betrekking tot die skema afsonderlik van Namaf neem,” het Tjiuoro verduidelik.

Volgens hom gebruik alle mediese fondse wat by Namaf geaffilieer is, 2020 se standaardtariewe.

Tjiuoro sê verhogings in standaardtariewe is in ooreenstemming met die wiskundige model aanvaar deur Namaf om stygings in die tariewe te bepaal.

Die model maak hoofsaaklik staat op onder meer die naspoor in die styging in koste oor sewe sleutelkategorieë van insetkoste, wat kliniese personeel, water en elektrisiteit, huur van eiendom en die huur, herstel en onderhoud van toerusting insluit.

“Die verhoging wat Namaf se bestuurskomitee oorweeg en goedkeur, is ’n riglyn. Die koderingskedules en standaardtariewe is gebaseer op die gemiddelde pasiënt wat gemiddelde behandeling in die gemiddelde praktyk ontvang. Die koderingskedule en die standaardtariewe is dus op gemiddeldes gebaseer,” het Tjiuoro verduidelik.

Volgens hom is dit onmoontlik om alle moontlike uitsonderings in die koderingskedules in te sluit. Laasgenoemde is nie uniek tot Namibië nie en alle koderingskedules internasionaal beskikbaar is op dieselfde beginsel gebaseer.

Omdat standaardtariewe bloot ’n riglyn is, kan ’n gesondheidsdiensverskaffer besluit om minder, dieselfde of meer as die Namaf-tarief te vra, veral wanneer hy of sy voel “gemiddelde” diens word byvoorbeeld nie verskaf nie.

Tjiuoro beklemtoon die raad van trustees van elke fonds besluit onafhanklik of die fonds mediese eise en dienste onder, dieselfde of bo die Namaf-standaardtarief uitbetaal.

“Namaf mag nie aan die fondse die bedrag voorskryf waarvoor vir mediese dienste wat aan lede gelewer is, vergoed moet word nie. Die standaardtariewe is dus as riglyn aan die bedryf voorsien en wat dien as ’n universele taal om eise vir dienste in te dien,” sê Tjiuoro.

Volgens hom is die gemiddelde verhoging van die standaardtarief vir alle dissiplines vir aanstaande jaar 2,42%. Met verwysing na verhoging van premies vir mediese fondse sê Tjiuoro die raad van trustees van elke fonds besluit onafhanklik of die premie gaan verhoog en afhangend van die voordeelopsie.

“Die standaardtariewe is maar een van die faktore wanneer fondse verhogings in bydraes oorweeg. Ander faktore sluit in neigings oor die afgelope jare met betrekking tot eise ontvang en betaal, eise wat vir die huidige jaar ontvang is, veranderinge in voordele asook surplusvlakke.

Volgens Tjiuoro het fondse ’n afname van 823 hooflede tydens die derde kwartaal aangeteken in vergelyking met die tweede kwartaal van die huidige finansiële jaar. Die afname in hooflede het ’n uitwerking van 0,89% (van 93 827 tot 92 995) vanaf die tweede tot derde kwartaal van die 2020 finansiële jaar gehad.

– [email protected]