Mej. Namibië-baas slaan terug

Tanja Bause - Die besturende direkteur van Miss Namibia Joint Venture (Pty) Ltd., me. Conny Maritz, het in ’n nuusverklaring gereageer op bewerings en griewe wat die huidige Mej. Namibië, Selma Kamanya, oor haar ervarings tydens haar kroningsjaar gemaak het.“Die kern van haar klagte is die bewering dat sy nie gebaat het by die gedeelte van die ‘openbare fondse’ wat ingesamel is, waarop sy as wenner van die kroon ‘geregtig’ was nie. Hierdie bewering is onwaar,” lui die verklaring.Volgens Maritz het slegs drie borge kontantpryse vir 2018 se kompetisiewenner geborg. “Die Namibian Diamond Trading Company het N$10 000 gegee, en Standard Bank en Emanya@Etosha gesamentlik N$8 000. Die kontant is aan haar oorbetaal en me. Kamanya erken sy het dit ontvang.”Kamanya sê in haar verklaring sy sou baie beter by die Mej. Heelal-kompetisie in Bangkok gepresteer het as sy meer inligting tot haar beskikking gehad het. Sy sê sy het geen inligting gehad behalwe dit wat sy op die internet gelees het nie. “Ek het gevoel ek word gesaboteer,” het Kamanya gesê. Sy het ook bygevoeg sy is ongelukkig omdat net die wenner die land verteenwoordig, sonder enige span om haar te ondersteun, terwyl ander lande ’n hele span saamstuur. “Die Miss Namibia-organisasie het ’n skoonheidskompetisieafrigter, mnr. Renee Ferreira, vir ’n week lank vir een-tot-een opleiding Windhoek toe gebring. Kort voor die Mej. Heelal-kompetisie het ons op ons onkostes vir Kamanya vir ’n week Johannesburg toe gestuur om opleiding by dieselfde afrigter te ontvang. Sy het ook opleiding by me. Mary Reynolds ontvang. Ek het self ook talle gesprekke oor die kompetisie met haar gevoer oor onder meer haar houding en gedrag. Ons is nie seker hoeveel meer opleiding sy verwag het nie,” lui die verklaring. Op Kamanya se bewerings dat sy net “af en toe” ’n verskyningsfooi ontvang het, sê Maritz: “Sy het N$3 000 vir optredes buite die Khomasstreek en N$1 500 vir binne die streek minus ’n 20%- administratiewe fooi ontvang, behalwe in gevalle waar ons anders met haar ooreengekom het (soos verskynings vir borge, liefdadigheidsorganisasies en so meer).“Ons moet ook byvoeg wanneer sy geleenthede buite Windhoek moes bywoon, is sy soontoe gevlieg of is sy vir haar brandstofonkostes vergoed. Sy het die voertuig gebruik wat vir amptelike en private geleenthede tot haar beskikking gestel is. Dit is slegs brandstofverbruik binne Windhoek waarvoor sy nie vergoed is nie, omdat dit moeilik is om tussen privaat en amptelike gebruik te onderskei.”Verder lui die verklaring: “Ons vind dit moeilik om haar klag te oorweeg dat sy emosioneel mishandel is of dat haar reputasie beskadig was in gevalle waar sy ‘iets verkeerd gedoen het, soos om ’n afspraak mis te loop’. “Sy (Kamanya) het nog nooit hieroor teenoor die organisasie gekla nie, en as sy dit gedoen het, sou ondersoek ingestel word en, indien geregverdig, sou daar opgetree word. Ons moet wel beklemtoon dit is ’n uitdruklike voorwaarde van haar kontrak met die organisasie is dat sy stiptelikheid met alle afsprake sal handhaaf. “Indien sy versuim om daardie voorwaarde te eerbiedig, sal dit die organisasie in die verleentheid bring. Ons kan nie voorgee dit gebeur eenvoudig en verskonings namens die organiseerders en deelnemers gee nie.“Haar ongelukkigheid daarmee dat sy nie genoeg geld van die organisasie ontvang het om 35 tot 39 uitrustings vir die Mej. Heelal-kompetisie te kan koop nie, is nie nuut nie – ’n vorige deelnemer het gedink die organisasie moet N$150 000 vir ’n Suid-Afrikaanse ontwerper betaal. “Die organisasie voorsien net wat hulle as redelik en noodsaaklik beskou . . . Dit word duidelik gemaak dat as hulle meer as dit benodig moet hulle self geld daarvoor insamel. Dit is baie duidelik in die kontrak wat sy en haar ouers geteken het. “Die organisasie se slagspreuk is ‘Skoonheid vir liefdadigheidsdoeleindes’ en vir ons begin liefdadigheid in die eerste plek in Namibië. Ons verwag van diegene wat die kroon dra om hoofsaaklik te fokus daarop om hul status, skoonheid, talente en persoonlikheid opbouend aan te wend om die jeug, bejaardes en minderbevoorregtes in die samelewing te betrek in programme van sosiale opheffing, armoedeverligting, voortgesette onderwys en die grondwetlike waardes van demokrasie, maatskaplike geregtigheid en respek vir fundamentele regte.“Ons het dit vantevore gesê en sal dit weer sê as enigiemand aan die Mej. Namibië-kompetisie deelneem met die verwagting dat dit net glinster en glans inhou . . . “As sy gewillig is om die seëninge van gesondheid en skoonheid te gebruik om ’n leier onder haar eweknieë te wees en om ’n ware, passievolle en positiewe maatskaplike impak op nasiebou te maak, kan die Miss. Namibia-organisasie net die plek wees om so ’n lewensveranderende geleentheid vir haar te gee.”

Mej. Namibië-baas slaan terug

Kommentaar

Republikein 2025-04-21

Meld asseblief aan om kommentaar te lewer

Mej. Namibië-baas slaan terug

Kommentaar

Republikein 2025-04-21

Meld asseblief aan om kommentaar te lewer

MELD AAN

Advertensie