Miljoene se eise teen polisie en weermag
Met Operasie Namibwoestyn wat pas in werking getree het, hoop eissake deur burgerlikes vir vergrype in vorige misdaadvoorkomingsoperasies op.
Jana-Mari Smith
Bewerings van menseregteskendings, soos die gebruik van buitensporige mag teen ongewapende burgerlikes deur lede van die polisie en weermag tydens die misdaadvoorkomingsoperasies Hornkranz en Kalahariwoestyn, het gelei tot 'n toename in hofsake waarin miljoene Namibiese dollar as skadevergoeding geëis word.
Die menseregteprokureur mnr. Norman Tjombe van Tjombe-Elago het vandeesweek drie nuwe siviele sake by die hoërhof in Windhoek geliasseer waarin kliënte gesamentlik meer as 'n N$1 miljoen eis as skadevergoeding vir gewelddadige arrestasies, onwettige inhegtenisnemings en skade aan eiendom.
Die Regshulpsentrum (LAC) het tans ses sake in die hoërhof hangende wat, as in die kliënte se guns beslis word, skadevergoedingsbetalings van meer as N$1,8 miljoen sal gelas.
Volgens die LAC is nog vyf sake in die voorverhoorfase.
In een van die sake verteenwoordig Tjombe twee onderwysers wat namens twee minderjarige neefs van 14 en 15 jaar skadevergoeding eis.
Die eis teen die weermag en polisie hou verband met 'n voorval laat in Januarie vanjaar toe die neefs na bewering gewelddadig deur soldate en die polisie geslaan en geskop is.
Hulle is toe glo vir agt ure aangehou.
Een van Tjombe se ander kliënte, mnr. Kyle Sullivan, eis N$173 000 vir 'n voorval in April verlede jaar toe hy glo deur lede van die polisie en weermag ernstig aangerand is en met 'n sweep of sambok bygedam is.
BENDE-AANVAL
'n LAC-kliënt, die 19-jarige me. Zelodia Tjazerua, eis N$375 000 as skadevergoeding vir fisieke en emosionele trauma asook die vernietiging van haar selfoon. Die voorval het in die vroeë oggendure op 28 April 2019 plaasgevind.
Sy voer aan die aanval op haar het plaasgevind naby haar huis toe sy die polisie en weermag afgeneem het terwyl hulle besig was om 'n vrou en verskeie lede van haar familie aan te rand.
Toe die flits van die kamera op haar foon afgaan, het een van die soldate na haar huis gehardloop. Sy het na binne gevlug en die veiligheidsdeur gesluit.
Volgens hofstukke het die soldaat gedreig om haar huis te vernietig as sy nie die deur oopsluit nie. Omdat sy vir haar lewe gevrees het, het sy die deur oopgesluit.
Sy is glo dadelik gegryp en uitgesleep straat toe, waar 'n groep van 10 soldate en polisiebeamptes haar geskop en geslaan het. Haar selfoon is op die grond in stukke gebreek.
Volgens haar het een van die beamptes haar met 'n stewel op haar geslagsdele geskop.
GEWELD
Mnr. Johannes Nduwe se N$350 000-eis wat Maandag by die hoërhof ingedien is, spruit uit die voorval in Januarie vanjaar toe hy glo deur lede van die polisie en weermag aangerand is.
Hy sê die feit dat beeldmateriaal oor die voorval in die sosiale media versprei is, het die trauma vererger.
Nduwe is luidens die stukke ook in hegtenis geneem en 'n uur later weer vrygelaat.
Mnr. Alexander Ngoma Afonso eis N$160 000 van die polisie en weermag vir aanranding en inhegtenisneming in Mei 2019 waartydens sy rugsak deursoek, die data op sy selfoon uitgewis en sy skootrekenaar gebreek is. Die LAC staan hom met dié eis by.
Afonso sê hy is deur beamptes van die gesamentlike operasie gestop en gevra “hoekom hy op straat loop”.
Hy is glo aangerand en in 'n beseerde toestand op die sypaadjie agtergelaat.
Nog 'n kliënt van die LAC, mnr. Taleni Petrus Manja, eis N$1 miljoen en voer aan hy is op Oujaarsaand 2018 deur lede van Operasie Hornkranz aangerand.
Drie van die LAC se eissake hou verband met die klopjag op 24 April 2019 aan huis van mnr. Brian Jaftha van die Ganja-gebruikers van Namibië (Gun). Sy kollega, mnr. Borro Ndungula, eis N$95 000 en 'n kennis, mnr. Haindere Paskalius, eis N$63 000.
Die gesamentlike misdaadvoorkomingsoperasies het verlede jaar twee burgerlikes se lewe geëis.
Hulle is mnre. Fambauone Black (22) en Benisius Kalola (32).
In beide gevalle is die soldate wat hulle glo doodgeskiet het, op 'n klag van moord in hegtenis geneem. Hulle is op borgtog vrygelaat en is nog verhoorafwagtend.– [email protected]
Bewerings van menseregteskendings, soos die gebruik van buitensporige mag teen ongewapende burgerlikes deur lede van die polisie en weermag tydens die misdaadvoorkomingsoperasies Hornkranz en Kalahariwoestyn, het gelei tot 'n toename in hofsake waarin miljoene Namibiese dollar as skadevergoeding geëis word.
Die menseregteprokureur mnr. Norman Tjombe van Tjombe-Elago het vandeesweek drie nuwe siviele sake by die hoërhof in Windhoek geliasseer waarin kliënte gesamentlik meer as 'n N$1 miljoen eis as skadevergoeding vir gewelddadige arrestasies, onwettige inhegtenisnemings en skade aan eiendom.
Die Regshulpsentrum (LAC) het tans ses sake in die hoërhof hangende wat, as in die kliënte se guns beslis word, skadevergoedingsbetalings van meer as N$1,8 miljoen sal gelas.
Volgens die LAC is nog vyf sake in die voorverhoorfase.
In een van die sake verteenwoordig Tjombe twee onderwysers wat namens twee minderjarige neefs van 14 en 15 jaar skadevergoeding eis.
Die eis teen die weermag en polisie hou verband met 'n voorval laat in Januarie vanjaar toe die neefs na bewering gewelddadig deur soldate en die polisie geslaan en geskop is.
Hulle is toe glo vir agt ure aangehou.
Een van Tjombe se ander kliënte, mnr. Kyle Sullivan, eis N$173 000 vir 'n voorval in April verlede jaar toe hy glo deur lede van die polisie en weermag ernstig aangerand is en met 'n sweep of sambok bygedam is.
BENDE-AANVAL
'n LAC-kliënt, die 19-jarige me. Zelodia Tjazerua, eis N$375 000 as skadevergoeding vir fisieke en emosionele trauma asook die vernietiging van haar selfoon. Die voorval het in die vroeë oggendure op 28 April 2019 plaasgevind.
Sy voer aan die aanval op haar het plaasgevind naby haar huis toe sy die polisie en weermag afgeneem het terwyl hulle besig was om 'n vrou en verskeie lede van haar familie aan te rand.
Toe die flits van die kamera op haar foon afgaan, het een van die soldate na haar huis gehardloop. Sy het na binne gevlug en die veiligheidsdeur gesluit.
Volgens hofstukke het die soldaat gedreig om haar huis te vernietig as sy nie die deur oopsluit nie. Omdat sy vir haar lewe gevrees het, het sy die deur oopgesluit.
Sy is glo dadelik gegryp en uitgesleep straat toe, waar 'n groep van 10 soldate en polisiebeamptes haar geskop en geslaan het. Haar selfoon is op die grond in stukke gebreek.
Volgens haar het een van die beamptes haar met 'n stewel op haar geslagsdele geskop.
GEWELD
Mnr. Johannes Nduwe se N$350 000-eis wat Maandag by die hoërhof ingedien is, spruit uit die voorval in Januarie vanjaar toe hy glo deur lede van die polisie en weermag aangerand is.
Hy sê die feit dat beeldmateriaal oor die voorval in die sosiale media versprei is, het die trauma vererger.
Nduwe is luidens die stukke ook in hegtenis geneem en 'n uur later weer vrygelaat.
Mnr. Alexander Ngoma Afonso eis N$160 000 van die polisie en weermag vir aanranding en inhegtenisneming in Mei 2019 waartydens sy rugsak deursoek, die data op sy selfoon uitgewis en sy skootrekenaar gebreek is. Die LAC staan hom met dié eis by.
Afonso sê hy is deur beamptes van die gesamentlike operasie gestop en gevra “hoekom hy op straat loop”.
Hy is glo aangerand en in 'n beseerde toestand op die sypaadjie agtergelaat.
Nog 'n kliënt van die LAC, mnr. Taleni Petrus Manja, eis N$1 miljoen en voer aan hy is op Oujaarsaand 2018 deur lede van Operasie Hornkranz aangerand.
Drie van die LAC se eissake hou verband met die klopjag op 24 April 2019 aan huis van mnr. Brian Jaftha van die Ganja-gebruikers van Namibië (Gun). Sy kollega, mnr. Borro Ndungula, eis N$95 000 en 'n kennis, mnr. Haindere Paskalius, eis N$63 000.
Die gesamentlike misdaadvoorkomingsoperasies het verlede jaar twee burgerlikes se lewe geëis.
Hulle is mnre. Fambauone Black (22) en Benisius Kalola (32).
In beide gevalle is die soldate wat hulle glo doodgeskiet het, op 'n klag van moord in hegtenis geneem. Hulle is op borgtog vrygelaat en is nog verhoorafwagtend.– [email protected]
Kommentaar
Republikein
Geen kommentaar is op hierdie artikel gelaat nie