Miller druk sy stempel af op nasionale trui

Andrew Poolman – In sy eerste resies van nasionale belang ná die onlangse Olimpiese Spele in Tokio het Alex Miller Saterdag die pap dik aangemaak en geen van sy uitdagers toegelaat om naby hom te bly nie.Die 20-jarige het sodoende sy titel behou in die Nedbank nasionale veldresies-kampioenskap vir bergfietsryers wat by Farm Windhoek gehou is.Tristan de Lange was vanweë verpligtinge in Suid-Afrika nie daar om hom gas te gee nie. Die jong Hugo Hahn (die vorige naweek Miller se spanmaat, toe hulle saam die tweedaagse Otjihavera gewen het) sê hy het probeer bybly toe Miller van die wegspring af 'n harde tempo gehandhaaf het, maar ná 'n paar honderd meter het Miller weggebreek en is nie weer gesien nie.“Alex is baie sterk ná die Olimpiese Spele. Ek kon vir die o.23-klas ingeskryf het, maar (in De Lange se afwesigheid) meer punte op die UCI-wêreldranglys was beskikbaar indien ek in die elite kategorie sou meeding, so ek kon nie dié kans laat glip nie,” het Hahn agterna gesê.Miller (een uur 23 minute 43 sekondes) het ná sewe baanrondtes die podium met Hahn (1:26:45) en Xavier Papo (1:33:07) gedeel.Miller het agterna gesê hy het besluit om haastig te begin, hard teen die bulte uit te trap en teen die afdraandes te herstel. “Ná die eerste baanrondte was ek met omtrent 30 sekondes voor en uiteindelik was die verskil omtrent drie minute.“Ek het goed gevoel en dit was baie spesiaal om weer die ondersteuning van toeskouers langs die baan te hoor. Ons is bevoorreg dat die organiseerders so 'n seepgladde byeenkoms gereël het in die huidige moeilike omstandighede; ook dat Nedbank die byeenkoms borg.”Miller sê hy wag nou op sy visum om in Europa by sy beroepspan Team Trek Vaude te gaan aansluit. “Ek sal voor die einde van die Europese seisoen aan 'n paar UCI Klas 1-byeenkomste in Duitsland en Oostenryk deelneem. Ek behoort in November terug in Namibië te wees om voorbereidingswerk vir die 2022-seisoen te begin doen.” VROUEDie Swakopmunder Luanne van der Schyff het die kans gebruik om die eerste nasionale kampioenskapstrui van haar loopbaan in te palm, wat tot verlede jaar nog aan die gedugte tweemalige Olimpiër Michelle Vorster behoort het.Die vorige naweek het Courtney Liebenberg by die Otjihavera-resies saam met haar spanmaat Genevieve Weber eerste oor die wenstreep gery. Liebenberg het egter in 'n val haar knie beseer en sou straks 'n sterk aanspraakmaker op die elite vrouetitel gewees het, terwyl Gabriella Raith ook nie by die wegspringstreep was nie.Van der Schyff (1:20:22) het die aanslag van Nicola Fester (1:22:50) en Marion Schonecke (1:28:18) afgeweer, terwyl die o.23-vroue se nasionale trui deur Cindy Rowland (1:31:37) ingepalm is.Die enigste inskrywing van die junior (o.18) vroue, Monique du Plessis, het egter in dieselfde resies oor vier baanrondtes nog 'n indrukwekkende vertoning van haar opgang gelewer. Hoewel haar wegspringskoot twee minute later geklap het, het sy die ander vroue reeds ná die eerste rondte verbygesteek en met 'n haastige wentyd van 1:14:59 klaargemaak.Die ander kategorieë se voorste uitslae:Junior mans: 1 Bergran Jensen, 2 Ethan L'Estrange, 3 Anton Engling.Subveteraan mans: 1 Ananias Tamati, 2 Axel Foerster.Veteraan mans: 1 Jacques Celliers, 2 Mannie Heymans, 3 Hans du Toit.Meesters mans: 1 Nick du Plessis, 2 Stefan Bohlke, 3 Carl Hahn.Veteraan vroue: 1 Elanor Grassow.Grootmeesters mans: 1 Roland Graf, 2 Renier Taljaard, 3 Thomas Soutschka.Meisies onder 16: 1 Ada Kahl (RSA), 2 Lotte Beulker, 2 Danika Wiese, 3 Laura Engling.Seuns o.16: 1 Kevin Lowe, 2 Daniel Hahn, 3 Adrian Key.Meisies o.14: Delsia Janse van Vuuren, 2 Rosemarie Thiel, 3 Kylie Dickerson.Seuns o.14: 1 Roger Suren, 2 Sean Lowe, 3 Marco Thiel.Meisies o.12: 1 Bianca Nell, 2 Nicole Suren, 3 Xane Meyer.Seuns o.12: 1 Julius Braun, 2 Mike Baartman, 3 Theodor Janse van Vuuren.Meisies o.10: 1 Qara Volschenk, 2 Cari van der Westhuizen, 3 Joandri de Beer.Seuns o.10: 1 Micah Chase, 2 York Ahrens, 3 Christo Nell.

Miller druk sy stempel af op nasionale trui

Kommentaar

Republikein 2024-11-22

Meld asseblief aan om kommentaar te lewer

Miller druk sy stempel af op nasionale trui

Kommentaar

Republikein 2024-11-22

Meld asseblief aan om kommentaar te lewer

MELD AAN

Advertensie