Miller wys sy krag voor Afrika-byeenkoms

Andrew Poolman - 'n Klein, maar sterk Namibiese span sal komende naweek in Kaïro, Egipte oorgehaal wees om op hul vorige suksesse by die Afrika bergfietskampioenskap voort te bou.

By laasjaar se kontinentale veldresieskampioenskap in Mauritius het Tristan de Lange die o.23-manstitel verower. Michelle Vorster het boaan die podium gestaan as Afrika-vroue­kampioen terwyl Alex Miller die bronsmedalje in die junior mansafdeling losgeslaan het.

Die 20-jarige De Lange en Vorster (39) sluit vandeesweek direk vanaf Australië se Gouekus by hul spanmaats aan, nadat hulle verlede week onderskeidelik die twaalfde en agtste plekke by die afgelope Statebondspele ingeneem het.

Elkeen van hulle het een Suid-Afrikaner (Alan Hatherly derde en Mariske Strauss sewende) voor hulle gehad, indien hul prestasies teen kontinentale opposisie opgeweeg word.

In die junior mansresies sal Alex Miller deur sy twee landgenote Schalk van der Merwe en Dieter Koen vergesel word. Al drie van hulle was laas naweek by Farm Windhoek in Kleine Kuppe in aksie tydens 'n resies wat deur 'n kragtige stortreënbui gekenmerk is.

Die baan van 4.2 kilometer strek kronkelend op en af teen beide hange van 'n vallei, terwyl Suid-Afrikaanse ryers ook die profiel van die UCI Klas 1-byeenkoms verhoog het.

Nadat die Suid-Afrikaner Candice Lill die vroueresies met 'n gemaklike voorsprong gewen het, was dit die beurt van die junior mans. Nie lank ná die wegspring nie, is die hemele geopen met stortreën wat die eenspoorpaadjies in stroompies bedek het en ook ander ander hindernisse lekker bedrieglik gemaak het.

Net voor die groot reëns het Miller as verdedigende kampioen egter sy krag gewys deur sy eerste baanrondte in 13 minute 25 sekondes af te blits. Vir die ganse byeenkoms het dit die vinnigste tyd gebly, wat nie eens later in helder sonskyn deur die Suid-Afrikaanse elite mans bedreig is nie.

Miller het vanjaar reeds twee oorwinnings in die buurland se SA Beker-byeenkomste behaal en lyk dus na 'n sterk aanspraakmaker vir nog 'n Afrika-goud vir Namibië.

Die Suid-Afrikaner Reinhard Zellhuber was die elite manswenner. Die tuisaanslag is gelei deur Xavier Papo, wat vanuit die sesde posisie teruggeveg het om uiteindelik die derde plek te beklink. Danzel de Koe was ook in 'n stadium derde voordat hy met die vyfde plek tevrede moes wees.

“Volgende jaar word die Afrika bergfietskampioenskap hier by Farm Windhoek aangebied, met die UCI Klas 1-byeenkoms die vorige naweek. Ons kan dan vir beide byeenkomste groter getalle en sterker inskrywings verwag, want laas naweek het bietjie gebots met beide die Statebondspele én die Afrika-kampioenskap,” voorspel die amptelike tydhouer, mnr. Johan Pretorius.

Laas naweek se voorste uitslae:



ELITE MANS (ses rondtes)

1 Reinhard Zellhuber (RSA) 1:32:59

2 Steven van den Heever (RSA) 1:35:35

3 Xavier Papo (NAM) 1:35:56

4 Matthew Keyser (RSA) 1:35:57

5 Danzel de Koe (NAM) 1:36:51

6 Rudi Koen (RSA) 1:40:03

7 Heinrich Köhne (NAM) 1:45:26

8 André de Klerk (NAM) 1:47:43

9 Nicolaas Swart (NAM) 1:33:31 (vyf rondtes)

10 Pieter du Toit (RSA) 1:35:50 (vyf rondtes)

11 Wynandt Gouws (NAM) 1:41:02 (vyf rondtes)



ELITE VROUE (vyf rondtes)

1 Candice Lill (RSA) 1:35:04

2 Elanor Grassow (NAM) 1:46:52

3 Luanné van der Schyff (NAM) 1:51:51

4 Marion Schonecke (NAM) 1:38:14 (vier rondtes)



JUNIOR MANS (vyf rondtes)

1 Alex Miller (NAM) 1:13:49

2 Brendan van Eeden (RSA) 1:23:39

3 Schalk van der Merwe (NAM) 1:26:02

4 Dieter Koen (NAM) 1:28:15

5 Yoshua Becker (NAM) 1:22:04 (vier rondtes)