Moord, verkragting ruk Havana

Denver Kisting – Enkele dae nadat ’n 12-jarige meisie ten aanskoue van haar ma en sussie (8) verkrag is, het ’n soortgelyke voorval weer in Havana aan die buitewyke van Windhoek plaasgevind.

Adj.komm. Kauna Shikwambi, die nasionale polisiewoordvoerder, sê omstreeks 01:00 vandag het ’n onbekende verdagte by ’n sinkhuis in Havana ingebreek waar ’n paartjie aan die slaap was.

Die gewapende man het toe die vrou (22) beveel “om haar bene oop te maak” sodat hy haar kon verkrag. Hy het haar toe ten aanskoue van haar kêrel (34) seksueel aangerand, sê Shikwambi.

Die verdagte het toe met ’n selfoon op die vlug geslaan.

Buite die sinkhuis het hy die vrou se broer aangetref wat ook ’n buurman is en hom na hul huis gehaas het toe hy sy suster hoor gil het.

Die verdagte het toe op die 29-jarige broer en buurman losgebrand en hom noodlottig gewond.

Die verdagte was teen vanmiddag nog op vrye voet, het Shikwambi gesê.

Enigiemand met inligting oor die jongste voorval en die een vroeër vandeesweek, word versoek om met adj.komm. Abner Agas, die koördineerder van misdaadondersoeke in die Khomasstreek, by 081 124 2649 in verbinding te tree.

[email protected]