More is val-in-die-tuin-dag

More is blykbaar die dag om in jou tuin te val, nadat jy sopas in die hond se sponsdoring getrap het. Net vir duidelikheid, 'n sponsdoring is die beskrywende term vir die aksie as jy in die hond se besigheid op die gras trap - dis asof jy in 'n doring trap, net sagter en pynliker, afhangende hoe jy daarna kyk. In elk geval, moenie die hond skop nie, dis dan die dag van liefde! Na die val behoort jy ook darem iets rooi vir die dag te dra, al is dit net jou nerfaf neus en knie. Dan het jy die dag reg begin! Hopelik ruk manlief sy beursie vir jou vir rooi tjoklits of 'n roos as 'n aanduiding dat al die Valentynsdag-bemarkingstrategiee suksesvol was. Bemarkers moet ook eet, onthou. En vanaand sit elkeen oudergewoonte weer voor die kassie en kyk wat doen Bold & Beautiful se mooi mense op die dag. Dit, terwyl die vrou met die mooiste hart moontlik langs jou op die bank sit. Dit herinner my aan die outjie wat op Valentynsdagoggend aan sy meisie se deur geklop het, met 'n stoomwarm pizza as 'n verrassingsontbyt in die hand. Ewe fluks spring hy weg met sy rympie: "Ek hou van pizza, jy hou van pizza ... uhm. Uhm. Ag flip, ek suig met digkuns, soen my?" Sy het hom nie gesoen nie. Sy was bang hy suig haar dalk volgende. En wat van as jy aileen is op die dag? Moenie jou hart breek oor een dag nie, jy is dan nie bekommerd oor al die ander enkelloperdae van die jaar nie! Eet spek, kyk Die Hard - sjokolade en liefdesrolprente maak in elk geval net vet! Verstaan my reg, ek is geensins sinies oor die liefde nie, net oor die wat jy in die winkel in die vorm van rooi teddiebere en plastiekblomme koop. Eintlik is die liefde mooier en kosbaarder as wat die meeste mense besef en behoort elke mens daaraan te glo. Toe kinders nog in romantiese liefde geglo het, was daar nie egskeidings nie. Los die plastiekrose, gee liewer vir die held in jou lewe 'n stywe drukkie en veellater, veel meer. Eet daardie spesiale gereg en steek 'n kersie op. Haal goeie wyn uit - nie duur wyn nie, net goeies. Gesels regtig met mekaar en vertel vir jou maat hoe mooi sy oe vir jou is. Dan kan julie veellater dalk saam in die tuin val. Ek se maar net.