Motorbom dood sewe in Sinai

Sewe burgerlikes, onder wie twee kinders, het gesterf toe 'n motorbom Maandag by 'n deursoekingspunt in die Sinai-skiereiland ontplof het, het 'n woordvoerder van die Egiptiese weermag gesê.
Die weermag sê die voertuig is by die deursoekingspunt naby Arish, die hoofstad van die Noord-Sinai-provinsie, onderskep. Die weermag het probeer om die ontploffing se impak te verminder deur met 'n tenk daaroor te ry.
Die bom het egter ontplof nadat die tenk weggery het en burgerlikes is getref.
Niemand het nog aanspreeklikheid vir die voorval aanvaar nie. Vier gewapende mans was binne die voertuig, het die weermag gesê.– Nampa/Reuters