MS: Hoop vir die toekoms

Henriette LamprechtWêrelddag vir Veelvuldige Sklerose (MS) word jaarliks op 30 Mei gevier.In Namibië val die soeklig op die lewens van meer as 2,3 miljoen mense oraloor die wêreld wat deur die siekte geraak word. Vanjaar se tema is “My onsigbare MS” en die fokus val op sigbaarheid.MS is een van die algemeenste neurologiese afwykings en veroorsaak gestremdhede in onder meer jong volwassenes. Die meeste mense wat met MS gediagnoseer word, is tussen die ouderdomme van 25 en 31 jaar, en twee keer meer vroue as mans word daarmee gediagnoseer. Die oorsaak van die siekte is nog nie bekend nie, en tans is daar geen kuur daarvoor nie, hoewel behandeling beskikbaar is, wat sekere vorme van MS help verlig. Daar is ook heelwat wat gedoen kan word om simptome te behandel. Die siekte volg geen vaste patroon wat simptome, intensiteit of die duur van die siekte betref nie, en elke geval is uniek.Simptome sluit gesigsversteurings, verswakte ledemate, tintelende sensasies, wankelrigheid, geheueprobleme en moegheid in. Vir sommige mense word MS gekenmerk deur tydperke van remissie en terugval, en ander se toestand vererger mettertyd. Party mense voel en lyk vir baie jare ná 'n diagnose gesond, terwyl ander vinnig ernstig verswak. Volgens inligting op Wêrelddag vir MS se webtuiste is dit 'n outoïmmuunsiekte wat behels dat die liggaam se immuunstelsel sy eie gesonde weefsel aanval. Met MS val die liggaam miëlien aan, die vetterige stof wat as beskermende bedekking van senuweevesels optree. Dit veroorsaak kommunikasieprobleme tussen die brein en die liggaam.Volgens die MS Discovery Forum in Amerika word sowat 200 nuwe gevalle weekliks in die land gediagnoseer. Vroeë tekens en simptome van MS begin gewoonlik tussen die ouderdomme van 20 en 40 jaar. Dis wel moontlik dat die siekte in die kinderjare of ná 40 kan begin. Hoewel MS nie 'n oorerflike afwyking is nie, het studies getoon onmiddellike familielede, soos 'n ouer of 'n broer of suster met MS, kan 'n individu se risiko om die siekte te ontwikkel, aansienlik verhoog. Daar is geen kuur vir MS nie en behandeling fokus tipies op die vinnige herstel van aanvalle, om die vordering van die siekte te rem, en om simptome te bestuur. In sommige individue is die simptome so gering dat geen behandeling nodig is nie. In Namibië beywer Multiple Sclerosis Namibia hulle vir bewusmaking en ondersteuning. Die stigter van die organisasie, me. Bianca Özcan, kan by info@msnamibia.org of 081 142 3543 gekontak word.Besoek ook www.msnamibia.org vir meer inligting.

MS: Hoop vir die toekoms

Kommentaar

Republikein 2025-04-11

Meld asseblief aan om kommentaar te lewer

MS: Hoop vir die toekoms

Kommentaar

Republikein 2025-04-11

Meld asseblief aan om kommentaar te lewer

MELD AAN

Advertensie