Munisipale busdienste vir ander dorpe

JURIE VILJOEN SKRYF:

Almal van ons sien laat middag die stringe huishulpe en ander werkers wat huiswaarts keer.

Hulle moet wag vir hulle vervoer en moet soms baie kilometers stap of in lang rye staan om ’n bus te kry. As hulle by die huis kom, dan moet die kinders seker versorg word en hulle moet kos maak vir die hongeres.

Môreoggend moet hulle vroeg roer om betyds by die werk te wees. ’n Mens kan nie anders as om deernis te hê vir hierdie mense nie.

Ek dink in Windhoek sorg die taxi's en die munisipaliteit dat hierdie mense vervoer word. Ek is egter oortuig dat dit nie op alle dorpe die geval is nie.

Ek wil graag vanoggend na Swakopmund verwys. Dalk was my waarneming verkeerd, maar werkers beweer dat hulle uit hulle woonbuurte baie kilometers moet stap.

Die taxi's vra ’n arm en ’n been, wat buitensporig is, om hierdie mense by die werk te kry. As hulle uiteindelik by die werkplek kom, is hulle moeg en kan ook nie hulle beste lewer nie.

Is daar busvervoer om al die mense op strategiese punte op te laai en op sentrale plekke af te laai? Ons weet die taxi's hou nie altyd van die munisipale vervoer nie, omdat dit kompetisie bring. Maar dink ons ook aan die werkers?