My kindwees is weg

CHARMY SKRYF:

Julle het dit gevat sonder om my te vra. Julle het dit gevat, terwyl ek warm en veilig was in my huis, met my ma en my suster. Julle was nie veronderstel om hier te wees nie. Ek was veilig, ek het geslaap. Hoekom het julle nie net die geld en selfoon geneem en net gegaan nie, hoekom moes julle my kindwees wegvat? Het julle enige genot gekry, al het het geskree en gesmeek?

Ek is 12 jaar oud. Ek is besig om 'n tiener te word, en in hierdie stadium sukkel ek reeds met die opgekropte gevoelens in my; ek sukkel om te verstaan wat presies met my liggaam gebeur, en julle kom en vat dit sommer net so, my onskuld, my kindwees, my menswees. Lafaards, kon nie eens julle gesigte wys nie, maar was braaf genoeg om dit aan my te doen!

Hulle sê die wiel draai, ek sal gesond word, ek sal eendag 'n mammie word, maar julle? Dit sal julle vir die res van julle patetiese, morsige lewe jaag, karma is niemand se speelmaat nie en ek gaan julle vergewe, dis my goddelikke plig om julle eendag te vergewe, alhoewel die merk in my lyf en in my hart altyd daar sal wees.

Siek pedofiele.

God het 'n manier en Hy sal op Sy tyd met julle afreken. Ek is 'n kind, ek was onskuldig, my mammie sal ophou huil, ons sal aangaan met ons lewe, en eendag sal julle moet verduidelik!