Ná dekades is Pajero ’n legende

Jannie Hennop - ’n Mens dink karvervaardigers is verspot as hulle met name soos Legend vorendag kom. ’n Legende is mos maar ’n storie oor ’n vername persoon, hetsy dit waar is of nie.
Mitsubishi het pas sy Pajero Legend II In Suid-Afrika bekend gestel as ’n beperkte weergawe in sy huidige Pajero-reeks. Die geheim is betreklik eenvoudig. Die Legend II het ’n klompie ekstras as standaard wat deur Mit­subishi gesubsidieer word.
Jy betaal om en by N$760 000 en kry N$50 000 se ekstras by. Die gewone Exceed-weer­gawe kos meer as N$730 000. Dieselfde beginsel is van toepassing op die driedeurmodel met ’n kort asafstand. Vir die ekstra geld kry jy ’n swaardiensskermplaat onder die voertuig se enjin en ratkas, 265/60/18-duim-veldrybande, sleepstang, bosbreker, ’n draagbare satnav met ’n ingeboude kamera en swaardiensrubbermatte.
Sou dit nie genoeg wees nie, het Mitsubishi nou ’n klompie opsionele ekstras wat jy kan byvoeg, natuurlik vir jou eie sak, om jou Pajero geriefliker en doelgebou te maak.
Onder die enjinkap is dit steeds die 3,2-liter­turbodiesel met ’n vyf­gang outomatiese ratkas en die vervaardiger se Super Select-vierwieldryfstelstel met ’n laestrekratkas en ’n ewenaargendel op die agteras. Wat handig van die ratkas is, is dat jy buiten die normale agterwielaandrywing, ’n 67/33-verhouding-vierwieldryf kan kies of 50/50 en dan ook laestrek.
Laat ons eerlik wees. Die Pajero stap aan in jare en dit is sigbaar en voelbaar.
Die eerste geslag het in 1982 die lig gesien, die tweede in 1991, die derde in 1999 en die huidige een in 2006, wat beteken dit is vanjaar tien jaar oud. Tog is dit die bewese resep wat maak dat die Pajero met ’n tweede naam soos Legend kan wegkom.
Daar is egter ’n getroue klomp ondersteuners en tussen al die meer gesofistikeerde groot hardebaard sportnutse, slaag Mitsubishi steeds daarin om maandeliks tussen 50 en 60 Pajero’s van die hand te sit. Die kortgat-Pajero met sy drie deure, wat vir baie veldryers die ideale ryding is, maak ’n stewige deel van die verkope uit.
Die Pajero se konstante gewildheid en die feit dat tot 70% van die huidige Pajero-eienaars steeds hul voertuie by amptelike Mitsubishi-handelaars laat versien, dra sekerlik tot die veldryer se legendestatus by.
Een ding wat gewis die oog vang, of eerder die oor, is die Rockford Fosgate-klankstelsel met ’n bielie van ’n laebasluidspreker (sub woofer) in die kattebak. Die luidspreker en die res van die klankstelsel beteken jy kan ’n lawaai opskop wat bure strate ver sal wakker blêr.
Maar wat hou die toekoms vir die Pajero in?
Die huidige model sal nog gebou word vir solank daar belangstelling daarin is, sê die vervaardiger. Daar is ook geen planne om produksie te staak of ’n splinternuwe model die lig te laat sien nie.
Weens Mitsubishi se leuens oor brandstofsyfers onlangs, hoofsaaklik in Japan, was die vervaardiger in ’n geldelike penarie gedompel. ’n Paar grootkoppe is met rooi gesigte daar weg en Nissan het tussenbeide getree en Mitsubishi oorgeneem. Amper soos wat Renault ’n klompie jare gelede tussenbeide getree en Nissan uit sy destydse penarie gered het.
Hoe dit dinge op lang termyn oorsee en plaas­lik sal beïnvloed, is nog onseker, maar intussen gaan dinge soos normaal voort, ook in Suid-Afrika, sê die vervaardiger se manskappe.
Mitsubishi sien uit na die koms van die nuwe Triton na Suid-Afrika, maar met die daling in die waarde van die rand teenoor die dollar en die jen kan dit nog ’n paar maande neem voordat die bakkie hier aanland. Boonop wil Mitsubishi die nuwe kroonjuweel van sy kragbronne hierheen bring.
Dit is die nuwe 2,4-literturbodiesel met 133 kW en 430 Nm, asook ’n nuwe sesgang hand- en vyfgang outomatiese ratkas. Mit­subishi wil die dryfstelsels graag in sy vlagskipbakkies inspan om Toyota en Ford se trefferenjins te probeer troef.
Interessant genoeg kan die nuwe Triton dalk eers in ’n Fiat-baadjie (Fiat Fullback) na Suid-Afrika kom, maar die topmodelle van die Fiat-weergawe sal die ou 2,5-literturbodieselkragbron inspan en nie die nuwe een nie.
Mitsubishi hoop dat die nuwe Triton-reeks dalk iets van die ou glorieryke dae van die oorspronk­like Mitsubishi Colt-bakkie in Suid-Afrika sal kan laat herleef, iets wat die vorige Tritons net nie kon regkry nie.
Buiten die Triton-bakkie is daar ook die nuwe Mitsubishi Pajero Sport op pad (wat niks met die Pajero self te doen het nie). Die Pajero Sport is op die nuwe Triton-bakkie gegrond en is dieselfde konsep vir Mitsubishi as byvoorbeeld Toyota se Fortuner en Hilux-bakkie of Ford se Everest en die Ranger-bakkie.
- Netwerk24