Namibië in koue se greep

Elvira Hattingh - Terwyl weervoorspellers meen die ergste van die huidige kouefront behoort teen Vrydag verby te wees, is temperature van so laag as -10 °C vanoggend (Woensdag) in die Aranos-omgewing gemeet.

Op die Facebook-groep "Reën in Namibia" sê me. Betsie Labuschagne vanoggend om 07:00 was dit -10 °C 30 km Oos van Aranos en me. Sharon Britz het -5 °C op Rehoboth gemeet. Me. Wilet de Jager sê die kwik het ook om 07:00 tot -5 °C in Avis, Windhoek gedaal.
Me. Heide Baas sê op die plaas Ombuetendende in die Omitara-omgewing was dit -7 °C en me. Leonora Nonna Becker het op ‘n plaas naby Gobabis -8 °C gemeet.

Kort ná 06:00 was dit -10 °C op Drimiopses, terwyl ‘n minimum van -6,3 °C op die plaas Skemerhoek in die Aranos-omgewing gemeet is en ook -5,2 °C op Omuramba Hunting Lodge in die Omaheke-streek.

Die weerdiens AfriWx Southern Africa voorspel dat minimum temperature vir Namibië vanaf Vrydag warmer sal raak, met Keetmanshoop wat die koudste plek sal wees met ‘n minimum van 0 °C.

FOTO: Melanie Blaauw Oberholzer het die foto op Facebook geplaas en gesê dit was -9 °C vanoggend op die plaas Miltonrus naby Aranos.