Namibië maak stem dik oor Trump-besluit

Francoise Steynberg - Die Namibiese Kamer van die Omgewing (NCE) het 'n verklaring oor president Donald Trump se onttrekking aan die Parys-verdrag oor klimaatsverandering aan die Amerikaanse ambassadeur in Namibië oorhandig om aan Washington te stuur.Die NCE, namens Namibiese burgerlike organisasies, betreur Trump se besluit om aan die Parys-verdrag te onttrek. "So verwag die wêreld se grootste besoedelaar van die res van die wêreld om hul koste te dra - veral die armste mense in die armste lande word die meeste geraak. Hierdie morele onreg kan nie deur die burgerlike samelewing in Namibië betwis word nie." Volgens dié verklaring van nieregeringsorganisasies in omgewingsbewaring onder die sambreel van die NCE, wat Woensdag (14 Jun) aan die Amerikaanse ambassadeur in Namibië, mnr. Thomas Daughton, oorhandig is, is Namibië nie immuun teen Trump se onttrekking aan die verdrag nie. "Die grootste kritieke impak aan die onttrekking is dat Trump ook US$3 miljard aan die Groen Klimaatfonds onttrek het. Dié fonds, wat reeds US$10 miljard ontvang het, is gestig om ontwikkelende lande te help om hul kweekhuisgasse te verminder om aan te pas by die impak van klimaatsverandering."Amerika het US$1 miljard na die fonds oorgeplaas. IMPAK OP NAMIBIë "Hoewel die land se bydrae tot globale kweekhuisgasvrystellings onbeduidend is, speel Namibië ’n beduidende rol in die internasionale klimaatsveranderingsarena. Namibië was een van die eerste lande wat toegang verkry het tot hulpbronne deur die Groen Klimaatfonds, met akkreditasie van die Omgewingsbeleggingsfonds (EIF) om fondse in 2015 vir die eerste twee projekte te verkry," lui die verklaring."Baie van Namibië se verpligtinge is egter afhanklik van finansiële ondersteuning. Die Groen Klimaatfonds is geïdentifiseer as 'n belangrike bron van finansiering om sy klimaatsdoelwitte te bereik. In hierdie verband is Namibië nie immuun teen die impak van die Amerikaanse onttrekking aan die Parys-verdrag nie."Die NCE sê Namibië het 'n lang geskiedenis van goeie vennootskap met Amerika om volhoubare ontwikkelingskwessies te bevorder, wat USAID se ondersteuning van gemeenskapsgebaseerde hulpbronbestuur-programme (CBNRM) insluit, asook die Millenium Uitdaagrekening en onlangs ook die Power Africa-inisiatief wat skoon energiebeleggings bevorder. "Amerika se besluit om aan sy klimaatsverandering-verantwoordelikhede te onttrek, is 'n teleurstellende aanduiding van wat die toekoms van Amerikaanse bilaterale verpligtinge oor klimaatskwessies kan inhou," lui die verklaring. Die NCE sê Namibië is toegewy aan die klimaatsveranderingstryd en sal voortgaan om dit te ondersteun. "Die NCE, namens die Namibiese burgerlike organisasies, betreur Trump se besluit en dit sal Amerikaanse legitimiteit as vennoot in die bevordering van volhoubare ontwikkeling in Namibië ondermyn. Dit maak die werk van jare se delikate Amerikaanse diplomasie en leierskap ongedaan wat 196 lande met baie verskillende belange en omstandighede oor 'n gemeenskaplike kritieke wêrelduitdaging verenig het," lui die verklaring. Die NCE meen ook dit sal die bereiking van die doelwitte van die Groen Klimaatfonds, 'n belangrike finansieringsmeganisme vir klimaatversoenbare ontwikkeling vir Namibië en ander ontwikkelende lande, belemmer."Nogtans bly Namibiese rolspelers toegewy daaraan om klimaatsverandering te takel. Die Namibiese burgerlike organisasies en private sektor sal voortgaan om nou saam met die regering en ander ontwikkelingsvennote te werk om 'n veiliger, lae-koolstof toekoms te verseker," lui die verklaring.

Namibië maak stem dik oor Trump-besluit

Kommentaar

Republikein 2025-04-21

Meld asseblief aan om kommentaar te lewer

Namibië maak stem dik oor Trump-besluit

Kommentaar

Republikein 2025-04-21

Meld asseblief aan om kommentaar te lewer

MELD AAN

Advertensie