Namibië verloor ’n maestro

"Vir 34 jaar was Ernst van Biljon my musikale mentor, leier en vaderfiguur. Hy het van die Cantare Audire-koor ’n familie gemaak en met sy presisie, talent, toewyding en humor het hy dit vir ons moontlik gemaak om op wêreldverhoë te kan staan en te weet dat ons enige tyd met die bestes kan kompeteer.
"Wat ek van musiek, koorsang en sang by hom geleer het, is die maatstaf waarvolgens ek vir die res van my lewe na musiek sal luister. Dit was ’n voorreg om deur ’n man soos hy op die pad van musiek gelei te word. Ons hou jou in ons harte vas, Ernst."
Só het een van die koorlede, me. Carine Fortsch, die naweek in ’n huldeblyk gesê nadat sy dood Vrydag deur sy familie aangekondig is.
Van Biljon, wat op 19 Julie 73 jaar sou word, se liggaam is Vrydagoggend deur sy dogter, Heini, in sy huis in Windhoek gevind nadat hy gedurende die nag sy eie lewe geneem het.
Sy vrou, Valerie, wat ewe bekend was in musiekkringe in die land, is verlede jaar oorlede. Van Biljon het volgens sy familie gesukkel om haar dood te verwerk en het aan depressie gely.
Nóg ’n koorlid, me. Martina Visser, het in ’n huldeblyk só op die nuus van sy heengaan gereageer: "Van Bielefeldt tot Berlyn, deur Finland, Denemarke tot in China. Stad na stad, land na land; ’n musikale reis saam met die Cantare Audire-koor wat oor meer as twee dekades gestrek het. Vriende wat soos familie geword het. Ure se oefeninge, kuiers, lag, gesels en bowenal saamsing.
"Dit alles was my beskore: Onvervangbare herinneringe en ongelooflike geleenthede: Eers as student en sanger, toe as solis en selfs later as dirigent. Ernst, jy was ’n groot inspirasie en invloed in my lewe. Wat kan ek meer sê as dankie vir alles. Rus sag en in vrede tot ons mekaar weer sien."
Van Biljon, wat in die Vrystaat grootgeword het, het in 1971 na Namibië (toe nog Suidwes-Afrika) gekom nadat hy as klavierdosent by die des­tydse Staatskonservatorium vir Musiek (nou College of the Arts) aangestel is.
In 1975 het hy dirigent geword van die Windhoek Jeugkoor en in 1978 het hy die Cantare Audire-koor gestig, gevolg deur die Namibië Nasionale Jeugkoor en Kinderkoor in 1994.
In 2002 het die Young Singers of Namibia die lig gesien en in 2004 die Nedbank Singers, gevolg deur die wêreldbekende Voices of Namibia, wat Namibië se eerste goue medalje ooit in 2010 by die Wêreld Olimpiese Kooruitvoering in Shaoxing, China, verwerf het.
In sy 43 jaar lange loopbaan as dirigent, komponis en musiekdosent, het hy deur middel van sy volgehoue toewyding tot die verbetering van die koormusiek-standaard in Namibië, die weg gebaan vir talle Namibiese kore om hul talent plaaslik en internasionaal uit te leef.
"Die wêreld het ’n musikale genie en ’n fenomenale man verloor, iemand vir wie baie van ons 'pa' gesê het. Hy was ons musikale vader en ons inspirasie om altyd ons beste te gee," sê mnr. Rolf Hansen, wat vir meer as 15 jaar onder hom gesing het.
Van Biljon word benewens Heini, ook deur sy seun, Neal en sy kleinkinders, Fae, Eden and Aeon, oorleef.
Begrafnisreëlings sal deur die loop van die week bekend gemaak word, het die familie Vrydag in ’n verklaring gesê. Die verwagting is dat ’n gedenkdiens Vrydag om 10:00 in die Christuskirche in Windhoek gehou sal word.