Namibiese modes oor die eeue heen

Die Museumvereniging van Namibië (MAN) het alle Namibiërs en wêreldburgers uitgenooi om die virtuele bekendstelling van die Virtuele Museum van Namibiese Modes vandag om 11:00 by te woon. Dié deel van die projek kon realiseer danksy die insette van die Verenigde Nasies se Onderwys-, Wetenskap- en Kultuurorganisasie (Unesco), die Gerda Henkel-stigting, die Berlynse Etnografiese Museum, die ministerie van onderwys, kuns en kultuur, die Universiteit van Namibië (Unam) en die Nasionale Museum van Namibië (NMN).MAN werk tans in vennootskap met die NMN en die Unam aan die projek, wat deur die Gerda Henkel-stigting gefinansier word. Hierdie gesamentlike projek het ten doel om die genesende en kreatiewe potensiaal te ontsluit van die koloniale versamelings uit Namibië wat in die Berlynse Etnografiese Museum in Duitsland en die etnografiese versameling in die Nasionale Museum in Windhoek gehou word. Dit verbind weer dié versamelings met mekaar en met hul erfenisgemeenskappe, navorsers en kunstenaars in Namibië. As deel van die projek het NMN-personeel, geleerdes en studente van Unam en personeel van die Museumvereniging slypskole aangebied om erfeniskenners en navorsers, gemeenskapsverteenwoordigers en kunstenaars te betrek om 'n aktiewe rol in dié versamelings by die NMN te hê en veldwerk te doen met gedigitaliseerde versamelings in erfenisgemeenskappe oraloor die land.Die doel van die projek is om weereens kennis oor die items in te boesem, obskure kulturele erfenis te dokumenteer en 'n belangrike bron van inspirasie vir kunstenaars en ontwerpers te wees. Die kennis wat gedokumenteer word, insluitend mondelinge geskiedenis en kunswerke, sal met die breër publiek gedeel word in 'n aanlyn databasis, 'n publikasie en 'n uitstalling in 'n nuutgestigde Museum van Namibiese Modes (sowel as in 'n uitstalling by die NMN in Windhoek wat in die tweede fase van die projek gekonseptualiseer sal word).Deur belanghebbendes in Namibië weer met koloniale versamelings uit Berlyn en Windhoek te verbind, wil die projek koloniale trauma aanpak, nuwe kulturele produksie aanmoedig en moontlikhede vir 'n dekoloniale kreatiewe toekoms skep. MAN glo museums moet lewende “organismes” wees wat gereeld moet aanpas en groei. MAN is bewus dat die Covid-19-pandemie museums druk om aan te pas en dinge anders te doen. Gevolglik is die idee van 'n virtuele museum van Namibiese modes gebore en danksy finansiering van Unesco is dié idee verwesenlik.Die virtuele museum sal amptelik geopen word deur Merja Iileka, die voorsitter van die Moderaad van Namibië, waarna verskillende belanghebbendes toesprake sal lewer en Big Ben, 'n veelbekroonde Namibiese kunstenaar, 'n musiekopvoering sal aanbied. Die webwerf stel “besoekers” in staat om items te besigtig en interaktief daarmee om te gaan deur kommentaar by te voeg en foto's in te dien wat moontlik in die virtuele museum vertoon kan word.“Die Covid-19-pandemie het ons gewys dat ons moet aanpas en leer om dinge anders te doen. 'n Virtuele modemuseum kan ook 'n interaktiewe opvoedkundige ruimte skep waar ons die Namibiese kultuur aan die plaaslike sowel as die internasionale publiek kan vertoon,” het Ndapewoshali Ndahafa Ashipala van MAN gesê. Krale en skulpe; haar- en hooftooisels; leer- en velitems; metaalbykomstighede; plante, bene en rotse; tatoeëermerke en liggaammodifikasie; tekstiele; “The People's Gallery” en “Deep Roots: New Fashion” sal in die virtuele en fisiese museum uitgestal word. Laasgenoemde vertoon die werk van Namibiese modeontwerpers wat aspekte van hul kulturele wortels inkorporeer om nuwe style met 'n unieke Namibiese flair te skep. Die Museum van Namibiese Modes sal op Otjiwarongo geleë wees en sal na verwagting later vanjaar of vroeg in 2022 open. As jy 'n item, inligting of foto's het wat jy dink in die Museum van Namibiese Modes uitgestal kan word, kan jy MAN by info@museums.com.na of +264 61 30 22 30 kontak.Meer inligting oor die projek is op MAN se webwerf beskikbaar. Kyk na die amptelike bekendstelling en opening op YouTube of Facebook (Museums Association of Namibia).

Namibiese modes oor die eeue heen

Kommentaar

Republikein 2025-01-07

Meld asseblief aan om kommentaar te lewer

Namibiese modes oor die eeue heen

Kommentaar

Republikein 2025-01-07

Meld asseblief aan om kommentaar te lewer

MELD AAN

Advertensie