Namibiese studente vertrek na Kuba

Yochanaan CoetzeeAltesaam 250 jong Namibiërs het onlangs vir mediese opleiding na Kuba vertrek.Hulle vorm deel van 750 studente wat die ministerie van gesondheid en maatskaplike dienste sedert 2013 vir opleiding in verskeie mediese rigtings na lande soos Rusland, Zambië, Indië en Suid-Afrika stuur.Altesaam 200 van dié wat na Kuba vertrek, sal medies studeer, terwyl 50 tandheelkundige studies sal aanpak. Die einddoel van dié N$283 miljoen-belegging oor die volgende drie jaar is om die die tekort aan mediese personeel in die land te verklein, het die ministerie onlangs in ’n mediaverklaring gesê.Dit volg op ’n samewerkingsooreenkoms wat verlede jaar in Havana, Kuba, tussen die Kubaanse ministerie van openbare gesondheid en sy Namibiese eweknie onderteken is. Deel van die ooreenkoms behels die verskaffing van Kubaanse verpleegsters om in die Namibiese openbare gesondheidsektor te kom help. “Dit help om die tekort aan Namibiese dokters te verminder, wat eerder in die private sektor wil werk,” het minister Bernard Haufiku vroeër gesê.Die Wêreldgesondheidsorganisasie (WHO) het onlangs gesê Kuba se openbare gesondheidstelsel is een van die beste ter wêreld. Kubane geniet ’n soortgelyke lewensverwagting as Amerikaners, maar teen net 4% van die koste. Boonop het hulle die meeste aansteeklike siektes, waarmee verskeie ander lande nog sukkel, reeds uitgewis.Die studente sal vir ’n jaar lank ’n Spaanse taalkursus volg, waarna hulle met studies in die onderskeie velde begin. ’n Bron by die ministerie het ook gesê die studente sal ondersteun word om die aanpassingsproses en hul studies makliker te maak. Mediese studente sal sewe jaar op die Karibiese eiland bly, terwyl die tandheelkunde-studente ses jaar daar sal woon.Een van die studente, mnr. Sem Shavuka (19), van Olulongo in die Oshanastreek, het altyd aan sy ouers gesê dat hy tandheelkunde wou studeer, sê sy tante Lydia Indombo.“Toe ek en sy ma die advertensie in die koerant sien, het ons geweet hy moet aansoek doen. Dis nou net ’n paar maande later en ons is so dankbaar vir vandag. Ons is hartseer dat ons seun weggaan, maar is so opgewonde dat hy eendag as die eerste tandarts in ons familie gaan terugkeer,” sê sy.’n 19-jarige student van Lüderitz, me. Ndapandula Shafuda, wat ook tandheelkunde gaan studeer, is ewe dankbaar. “Vandag beteken vreeslik baie vir my en my familie. Alhoewel ek hartseer is om vir so lank weg te gaan, is ek so dankbaar vir hierdie geleentheid.”Me. Emilly Sinvula (19), van die Zambezistreek, het haar dankbaarheid uitgespreek en gesê hierdie lewensveranderende geleentheid gaan beslis help dat sy haar passie kan uitleef en haar volle potensiaal bereik.

Namibiese studente vertrek na Kuba

Kommentaar

Republikein 2025-04-18

Meld asseblief aan om kommentaar te lewer

Namibiese studente vertrek na Kuba

Kommentaar

Republikein 2025-04-18

Meld asseblief aan om kommentaar te lewer

MELD AAN

Advertensie