Namibiër ’n ambassadeur vir trots Afrikaanse vermaak

Alinda Lu’Mar, die eienaar en stigter van die Voice of Namibia-sangkompetisie, is as die Namibiese handelsmerk-ambassadeur vir die nuwe Afrikaanse aanlynstromingsplatform NET Afrikaans aangewys.

Lu’Mar is ‘n gebore Suid-Afrikaner, maar het in Namibië in die Gobabis-omgewing grootgeword. Sy is ‘n gereelde kunstenaar by groot feeste en kunstenaarsroetes in Namibië, en het oor die jare al verskeie gesogte toekennings in beide die musiek- en skoonheidsbedryf ingepalm.

“Ons deel Alinda se werksetiek en waardes en het hoë agting vir die hoogtes wat sy in ‘n kort tydjie met veral Voice of Namibia bereik het,” sê Phillip Rossouw, die inhoudshoof by NET Afrikaans.

“As handelsmerk-ambassadeur gaan sy nou saam met NET Afrikaans werk om werksgeleenthede vir Namibiese vervaardigers en produksiehuise te skep om moontlik hul eie nuutgeskepte produksies ín en vír Afrikaans op NET Afrikaans te kan stroom,” sê Rossouw.

Lu’Mar sê sy sien uit na die geleentheid wat dié aanlynstromings- en vermaaklikheidsplatform haar bied om ‘n positiewe bydrae tot die bevordering van Afrikaans te lewer.

“Afrikaanssprekendes – en spesifiek Afrikaanssprekendes in Namibië – is honger vir nuwe programme in dié mooi taal. Ek self is lief vir die Afrikaanse taal en kultuur, en kan nie wag om daadwerklik ‘n verskil op dié gebied te maak nie. ‘n Mens moet kan huil, sing, lag en feesvier in jou moedertaal,” sê sy.

Nuutgeskepte produksies vanuit Namibië, wat natuurlik aan NET Afrikaans se vereistes en standaarde voldoen, sal ‘n kans staan om eksklusief op NET Afrikaans gestroom te word.

Twintig splinternuwe reekse is tans op NET Afrikaans te sien. “Nuwe programme word weekliks gelaai om volhoubare kykgenot van topgehalte te verseker,” verduidelik Rossouw.

‘n Paar van die jongste leefstyl en vermaakprogramme sluit in:

*Oja! dis So-ja! (met Suid-Afrika se eie soja-koningin, Riëtte Strydom) wat heerlik kuier en kook met sojabone.

*Ouma se Raad - ‘n kookprogram met Daniel Hoffmann as aanbieder waarin verskeie Suid-Afrikaanse oumas hul gunstelingdisse voorberei terwyl hulle boererate uitruil en staaltjies uit hul kinderjare oorvertel.

*Hallo Dolly - ‘n heerlike kuier-en-braaiprogram met Kevin Leo, die gewilde sanger en sjef (vir dié wat nie weet nie) as aanbieder.

*Slagpen (met Marius Barnard) - vir die vuurwapenentoesias.

*Lekker kreatiewe vermaak vir die jongspan is natuurlik ook beskikbaar, waarvan Spoeg en Plak (met Jeanette Pretorius en Bee-Bee die By), Dienkie en Doedels die seekoeie, en Appelliefie en die Reus, deel is.

Teen N$79 per maand (wat vier digitale toestelle soos jou televisie, rekenaar, slimfoon en tablet insluit), kan NET Afrikaans-intekenare soveel van die programme kyk wat hulle wil, net wanneer hulle wil.

“Kykers word natuurlik ook saam met die Namibiese produksiehuise en vervaardigers uitgenooi om tree vir tree saam met ons te groei en hulle idees vir nuwe programme met ons te deel,” sê Rossouw.

MEER OOR NET AFRIKAANS

NET Afrikaans is die eerste kyk-op-aanvraag (Android-gebaseerde) betaaltelevisie-vermaaklikheidstoep én -aanlynstromingsplatform in en vir Afrikaans wat wêreldwyd op 31 Mei vanjaar amptelik bekend gestel is.

Die NET Afrikaans handelsnaam is afgelei van Netwerk Afrikaans en al die programme en produksies op die platform kan aanvullend tot ander kanale gekyk word.

Vars, nuwe en oorspronklike produksies en programme word weekliks gelaai en ’n gedeelte van NET Afrikaans se intekenaarsfooie gaan na die skepping van splinternuwe programme in en vir Afrikaans.

Besoek www.net-afrikaans.com vir meer inligting, of gaan loer op hulle Facebook-blad. - [email protected]