Narkosekursus by mediese skool
Die aantal gekwalifiseerde narkotiseurs in die staatsdiens kan hiermee moontlik vermeerder.
Namibië gaan spesialisnarkotiseurs vir die eerste keer op eie bodem oplei.
Die hoop is dat dié nuwe nagraadse kursus by die Universiteit van Namibië (Unam) se mediese skool veral die aantal narkotiseurs in diens van die land se openbare gesondheidsektor sal vermeerder.
Die eerste ses studente het reeds met die nuwe meestersprogram in narkose begin wat deur die suksesvolle Phoenix Projek-vennootskap met die Cardiff-universiteit in Wallis, Brittanje, ondersteun word.
Die opleiding sal help om 'n akute tekort aan narkotiseurs in die land aan te spreek wat dikwels pasiënte oorgelewer laat aan lang waglyste vir chirurgie, asook 'n gebrek aan spesialissorg tydens noodoperasies.
Dit sal voorts die aantal toegewyde narkotiseurs in Namibië verhoog, selfvoorsiening vir die opleiding van narkotiseurs in die land bou en ook die kwaliteit van gesondheidsorg verbeter.
Volgens prof. Frednard Gideon, pro-visekanselier vir akademiese aangeleenthede by Unam, is die aanvang van die opleiding van narkotiseurs in die land 'n reuseverligting vir die gesondheidsorgsektor en die verskaffing van pynbestuur in openbare hospitale in Namibië.
“Dit is ook die sleutel tot 'n volhoubare stelsel van 'n opleidingsprogram vir dokters as narkotiseurs in Namibië,” het hy gesê.
Een van die studente wat deel is van dié meestersprogram, me. Ebba Shaanika, beaam Namibië het tans nie genoeg narkotiseurs in beide die private en openbare sektore nie.
“Ons is bly om deel van die eerste groep te wees wat in dié veld spesialiseer omdat dit 'n belangrike deel van 'n pasiënt se operasie is,” het Shaanika gesê.
Die nuwe kursus is die breinkind van die leier van die Phoenix Projek, prof. Judith Hall, wat aan die Cardiff-universiteit verbonde is en self 'n narkotiseur is. Hall het die kursus in samewerking met vennote by Unam ontwikkel.
“Chirurgie kan lewens red, maar dit kan nie sonder narkose geskied nie. Die meesterskursus sal 'n nuwe groep professionele narkotiseurs in Namibië in voldoende getalle skep wat gesondheidsorg in die land werklik sal verander,” het Hall gesê.
Die Phoenix Projek, 'n samewerkingsooreenkoms tussen Cardiff-universiteit en Unam, het voorheen intensiewe blitskursusse in narkose en kritieke sorg vir studente en dokters dwarsoor die land aangebied.
Die hoop is dat dié nuwe nagraadse kursus by die Universiteit van Namibië (Unam) se mediese skool veral die aantal narkotiseurs in diens van die land se openbare gesondheidsektor sal vermeerder.
Die eerste ses studente het reeds met die nuwe meestersprogram in narkose begin wat deur die suksesvolle Phoenix Projek-vennootskap met die Cardiff-universiteit in Wallis, Brittanje, ondersteun word.
Die opleiding sal help om 'n akute tekort aan narkotiseurs in die land aan te spreek wat dikwels pasiënte oorgelewer laat aan lang waglyste vir chirurgie, asook 'n gebrek aan spesialissorg tydens noodoperasies.
Dit sal voorts die aantal toegewyde narkotiseurs in Namibië verhoog, selfvoorsiening vir die opleiding van narkotiseurs in die land bou en ook die kwaliteit van gesondheidsorg verbeter.
Volgens prof. Frednard Gideon, pro-visekanselier vir akademiese aangeleenthede by Unam, is die aanvang van die opleiding van narkotiseurs in die land 'n reuseverligting vir die gesondheidsorgsektor en die verskaffing van pynbestuur in openbare hospitale in Namibië.
“Dit is ook die sleutel tot 'n volhoubare stelsel van 'n opleidingsprogram vir dokters as narkotiseurs in Namibië,” het hy gesê.
Een van die studente wat deel is van dié meestersprogram, me. Ebba Shaanika, beaam Namibië het tans nie genoeg narkotiseurs in beide die private en openbare sektore nie.
“Ons is bly om deel van die eerste groep te wees wat in dié veld spesialiseer omdat dit 'n belangrike deel van 'n pasiënt se operasie is,” het Shaanika gesê.
Die nuwe kursus is die breinkind van die leier van die Phoenix Projek, prof. Judith Hall, wat aan die Cardiff-universiteit verbonde is en self 'n narkotiseur is. Hall het die kursus in samewerking met vennote by Unam ontwikkel.
“Chirurgie kan lewens red, maar dit kan nie sonder narkose geskied nie. Die meesterskursus sal 'n nuwe groep professionele narkotiseurs in Namibië in voldoende getalle skep wat gesondheidsorg in die land werklik sal verander,” het Hall gesê.
Die Phoenix Projek, 'n samewerkingsooreenkoms tussen Cardiff-universiteit en Unam, het voorheen intensiewe blitskursusse in narkose en kritieke sorg vir studente en dokters dwarsoor die land aangebied.
Kommentaar
Republikein
Geen kommentaar is op hierdie artikel gelaat nie