NEEEF: Dis nou of nooit
Tasbare bewyse van beleggersvertroue sal teen die einde van vandeesweek se ekonomiese groeiberaad beskikbaar wees, sê die president se adviespaneel.
Jo-Maré
Duddy
Onsekerheid oor omstrede kwessies soos Namibië se bemagtigingsbeleid wat beleggers op die kantlyn hou, sal vandeesweek tydens die ekonomiese groeiberaad hopelik uit die weg geruim word.
“Ek verwag ’n aankondiging van die president oor NEEEF, ek verwag ’n aankondiging van die president oor Nipa (wet op beleggingsbevordering), ek verwag ’n aankondiging van die president oor immigrasie,” het mnr. Johannes !Gawaxab, voorsitter van die hoëvlakpaneel oor die Namibiese ekonomie, gister gesê.
!Gawaxab het in ’n onderhoud op Kletskompas, NMH se regstreekse aanlyn geselsprogram, gesê die paneel het ná wye beraadslaging met belangegroepe in die land reeds op 3 Julie ’n rits aanbevelings aan pres. Hage Geingob voorgelê.
Die staatshoof gaan hom tydens die tweedaagse beraad, wat vanoggend begin, oor baie van dié aanbevelings uitlaat, het !Gawaxab gesê.
“Ek verwag ’n aankondiging van die president oor die goed wat die mense pla oor implementering en hoe lank dit vat om goed gedoen te kry.”
Groot geld
Dit gaan níé ’n praatberaad wees nie, het !Gawaxab verseker.
Internasionale- en streekfinansierders is genooi. So ook alle groot pensioenfondse en beleggingsbanke uit Suid-Afrika. Verteenwoordigers van die Wêreldbank en die Internasionale Monetêre Fonds (IMF) is ook hier.
’n Beleggingsteiken van US$1 miljard, sowat N$14 miljard, word nagejaag. Volgens !Gawaxab is dit nie ambisieus nie. Inteendeel, hy sal nie verbaas wees as dié bedrag oorskry word nie.
In teenstelling met vorige beleggingsberade gaan Namibië aan die einde van hierdie een weet presies hoeveel elke belegger binne die volgende twee jaar in watter projek gaan stort, het !Gawaxab gesê.
“Dit is nie ’n hierjy-oefening waarmee ons gaan besig wees nie. Ons gaan kyk of die beleggingsgeleenthede in die land met kapitaal kan verbind.”
Geld vanuit die privaat sektor maak die beraad moontlik. Die hoëvlakpaneel het ’n totale begroting van N$3,5 miljoen aan die private sektor voorgelê. Borgskappe van N$4 miljoen is ontvang.
Vertroue
Net hóé verreikend die gevolge van beleggersonsekerheid is, blyk uit ’n onlangse verslag van die Ekonomiese Beleidsnavorsingsvereniging (EPRA).
Die regering het in Februarie 2016 die nuwe raamwerk vir gelyke ekonomiese bemagtiging (NEEEF) aangekondig. Later dieselfde jaar moes die minister van finansies, mnr. Calle Schlettwein, die begroting drasties snoei om wegholskuld te probeer stuit en makroëkonomiese stabiliteit te herstel.
Die uitwerking op belegging was onmiddellik: In 2017 was bruto vaste kapitaalvorming teen heersende pryse sowat N$28,4 miljard – bykans 24% minder as die vorige jaar.
Verlede jaar het bruto vaste kapitaalvorming ongeveer N$24,2 miljard beloop – die laagste sedert 2011.
Volgens EPRA het private belegging verlede jaar tot die laagste vlakke sedert onafhanklikwording gedaal.
As Namibië “billike” ekonomiese groei van 3% tot 4% in die komende jare wil toon, sal samewerking met die private sektor verdiep moet word en beleggersvertroue herstel moet word, sê EPRA.
“Die regering moet ’n duidelike boodskap stuur (met dade, níé woorde) dat hulle hier is om met die private sektor saam te werk en dit te ondersteun alvorens ons volhoubare ekonomiese herstel en ’n heropbou van vertroue sal sien,” sê EPRA.
Vandag en môre se beraad bied ’n gulde geleentheid, meen die forum.
- [email protected]
Onsekerheid oor omstrede kwessies soos Namibië se bemagtigingsbeleid wat beleggers op die kantlyn hou, sal vandeesweek tydens die ekonomiese groeiberaad hopelik uit die weg geruim word.
“Ek verwag ’n aankondiging van die president oor NEEEF, ek verwag ’n aankondiging van die president oor Nipa (wet op beleggingsbevordering), ek verwag ’n aankondiging van die president oor immigrasie,” het mnr. Johannes !Gawaxab, voorsitter van die hoëvlakpaneel oor die Namibiese ekonomie, gister gesê.
!Gawaxab het in ’n onderhoud op Kletskompas, NMH se regstreekse aanlyn geselsprogram, gesê die paneel het ná wye beraadslaging met belangegroepe in die land reeds op 3 Julie ’n rits aanbevelings aan pres. Hage Geingob voorgelê.
Die staatshoof gaan hom tydens die tweedaagse beraad, wat vanoggend begin, oor baie van dié aanbevelings uitlaat, het !Gawaxab gesê.
“Ek verwag ’n aankondiging van die president oor die goed wat die mense pla oor implementering en hoe lank dit vat om goed gedoen te kry.”
Groot geld
Dit gaan níé ’n praatberaad wees nie, het !Gawaxab verseker.
Internasionale- en streekfinansierders is genooi. So ook alle groot pensioenfondse en beleggingsbanke uit Suid-Afrika. Verteenwoordigers van die Wêreldbank en die Internasionale Monetêre Fonds (IMF) is ook hier.
’n Beleggingsteiken van US$1 miljard, sowat N$14 miljard, word nagejaag. Volgens !Gawaxab is dit nie ambisieus nie. Inteendeel, hy sal nie verbaas wees as dié bedrag oorskry word nie.
In teenstelling met vorige beleggingsberade gaan Namibië aan die einde van hierdie een weet presies hoeveel elke belegger binne die volgende twee jaar in watter projek gaan stort, het !Gawaxab gesê.
“Dit is nie ’n hierjy-oefening waarmee ons gaan besig wees nie. Ons gaan kyk of die beleggingsgeleenthede in die land met kapitaal kan verbind.”
Geld vanuit die privaat sektor maak die beraad moontlik. Die hoëvlakpaneel het ’n totale begroting van N$3,5 miljoen aan die private sektor voorgelê. Borgskappe van N$4 miljoen is ontvang.
Vertroue
Net hóé verreikend die gevolge van beleggersonsekerheid is, blyk uit ’n onlangse verslag van die Ekonomiese Beleidsnavorsingsvereniging (EPRA).
Die regering het in Februarie 2016 die nuwe raamwerk vir gelyke ekonomiese bemagtiging (NEEEF) aangekondig. Later dieselfde jaar moes die minister van finansies, mnr. Calle Schlettwein, die begroting drasties snoei om wegholskuld te probeer stuit en makroëkonomiese stabiliteit te herstel.
Die uitwerking op belegging was onmiddellik: In 2017 was bruto vaste kapitaalvorming teen heersende pryse sowat N$28,4 miljard – bykans 24% minder as die vorige jaar.
Verlede jaar het bruto vaste kapitaalvorming ongeveer N$24,2 miljard beloop – die laagste sedert 2011.
Volgens EPRA het private belegging verlede jaar tot die laagste vlakke sedert onafhanklikwording gedaal.
As Namibië “billike” ekonomiese groei van 3% tot 4% in die komende jare wil toon, sal samewerking met die private sektor verdiep moet word en beleggersvertroue herstel moet word, sê EPRA.
“Die regering moet ’n duidelike boodskap stuur (met dade, níé woorde) dat hulle hier is om met die private sektor saam te werk en dit te ondersteun alvorens ons volhoubare ekonomiese herstel en ’n heropbou van vertroue sal sien,” sê EPRA.
Vandag en môre se beraad bied ’n gulde geleentheid, meen die forum.
- [email protected]
Kommentaar
Republikein
Geen kommentaar is op hierdie artikel gelaat nie