Nóg 'n kredietklap vir Nam

Jo-Maré DuddyStaatsondernemings se totale skuld van bykans N$45 miljard en die regering wat vir amper N$3 miljard hiervan borg geteken het, is van die knelpunte in 'n verslag waarin Fitch Ratings sy vooruitsig vir Namibië se rommelstatus van stabiel na negatief verlaag het.Fitch, soos Moody's, het die regering se skuld in buitelandse geldeenhede reeds in 2017 in die rommelblik gedruk. Namibië se Fitch-gradering van BB+ beteken die regering se kredietwaardigheid word as “spekulatief” bestempel.In gister se verslag sê Fitch voortdurende reddingsgordels aan verliesmakende SOE's bly druk op die regering plaas. SOE's se hoë skuld is 'n las vir die regering, sê die internasionale kredietgradeerder. Volgens Fitch het SOE's se totale skuldlas teen die einde van die 2017-'18-boekjaar 25% van Namibië se bruto binnelandse produk (BBP) beloop. Die halfjaar-begrotingshersiening wat die minister van finansies, mnr. Calle Schlettwein, in Oktober ter tafel gelê het, gee die BBP vir dié boekjaar as bykans N$178,7 miljard aan. 'n Kwart hiervan is ongeveer N$45 miljard. Volgens Fitch het die regering sowat 6% hiervan gewaarborg.SOE's soos Air Namibia en TransNamib benodig dalk herstrukturering, sê die gradeerder.Fitch het gister ook die salarisrol van die staatsdiens, swak eksamenuitslae, stygende werkloosheid en “buitengewone hoë” ongelykheid uitgesonder.EkonomieFitch sê die bleker vooruitsig weerspieël Namibië se swak ekonomiese groei. Die gradeerder het ook sy ekonomiese groeivooruitsigte vir die land verlaag en sê dit voorspel niks goed vir die regering se vermoë om sy stygende skuldlas te stabiliseer nie. Fitch verwag Namibië se ekonomie het verlede jaar met -0,4% gegroei – minder as die minister van finansies en die Bank of Namibia (BoN) se voorspelling van -0,2%. Vir vanjaar het Fitch sy groeivooruitskatting van 1,8% na 0,7% verlaag.Die regering beplan om sy begrotingskonsolidering geleidelik voort te sit, sê Fitch. Die gradeerder deel egter nie die regering se optimisme oor die vrugte wat dit gaan afwerp nie. Waar die halfjaar-begrotingshersiening 'n begrotingstekort van 2,3% van BBP in 2020-'21 teiken, verwag Fitch een van 4,1%. Die regering meen sy skuld sal dan 45% van BBP beloop, maar Fitch voorspel 49,5%.Die verslag verwys ook na die nasionale grondkonferensie verlede jaar. “Fitch verwag die owerhede sal die landgrypproses só bestuur dat ontwrigting van die ekonomie voorkom word,” lui dit.Die proses sal waarskynlik uitgestrek wees. Dít kan egter die regulatoriese onsekerheid vererger wat spruit uit die voortslepende uitbreiding van die Nuwe Gelyke Ekonomiese Bemagtigingsraamwerk (NEEEF). “Beleidsonsekerheid kan die vertroue van die private sektor en beleggings demp,” waarsku Fitch.

Nóg 'n kredietklap vir Nam

Kommentaar

Republikein 2025-04-07

Meld asseblief aan om kommentaar te lewer

Nóg 'n kredietklap vir Nam

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie