Nóg ’n vals wegspring in Möller-saak

Elvira Hattingh - Geregtigheid vir die Möller-gesin is nogmaals uitgestel ná die vermeende skieter mnr. Panduleni Gotlieb vandag ’n aandeel daarin gehad het dat die moordverhoor wéér nie kon begin nie.

Dit omdat hy glo nog nie die dokumente kon deurwerk waarin die staat sy saak teen hom stel nie.

Terselfdertyd het sy medebeskuldigde, mnr. David Tashiya, ook besluit om sy regsverteenwoordiger, mnr. Mese Tjituri, in die pad te steek.

Die verhoor van die saak waarin vyf mans op onder meer klagte van moord en poging tot moord teregstaan, moes ná verskeie struikelblokke gister in die hoërhof by Windhoek se sentrale gevangenis begin.

Mnr. Hans-Jörg Möller is in 2016 in sy huis op Walvisbaai voor sy gesin oorval en geskiet. Hy het later aan sy wonde beswyk.

Gotlieb se regsverteenwoordiger, mnr. Jarmaine Muchali, het gesê hy is nie gereed nie omdat hy nog nie instruksies ontvang het nie. Gotlieb wil glo eers bogenoemde dokumente deurwerk en sê dit sal hom sowat agt maande tot ‘n jaar neem.

Dit glo omdat dit ‘n lywige dokument is.

Gotlieb het die hof met behulp van ‘n tolk meegedeel dat hy nie Engels kan lees of verstaan nie. Daarom moet ’n medegevangene, ene Da Costa, naweke die dokument saam met hom deurwerk.

Die medegevangene het ook ander verpligtinge en kan hom nie voortdurend help nie, het hy aan regter Dinnah Usiku gesê.

Sedert Gotlieb die dokumente op 13 September van sy vierde regsverteenwoordiger ontvang het, kon hy en Da Costa glo nog net sowat vyf blaaie deurwerk.

Gotlieb het ontken dat enige van sy drie vorige regsverteenwoordigers hom van die dokumente voorsien het of dit saam met hom deurgewerk het.

Marthino Olivier, die staatsadvokaat, het gesê Gotlieb maak dit onmoontlik om met die saak voort te gaan.

“Ek stel dit aan jou dat hierdie nog ’n vertragingstaktiek is. Jy is die meesterbrein van die taktiek wat waarskynlik voortaan deur ander beskuldigdes ook uitgetoets gaan word.”

Hy het gesê Gotlieb neem regsadvies van sy medegevangene.

“Muchali moet die dokumente saam met jou deurwerk, hy is deur die staat aangestel en word daarvoor betaal. Dit is ook vir my duidelik dat hy gewillig is om dit te doen,” het Olivier gesê.

“Dit wil my egter voorkom of jy liewer nie ‘n regsverteenwoordiger wil hê nie en hierdie op jou eie wil doen,” het hy gesê.

Muchali is Gotlieb se derde regsverteenwoordiger in die saak, met twee voriges wat onttrek het ná hulle “teenstrydige instruksies” van hom ontvang het.

“Ek het nog nooit van so iets gehoor nie, jy gryp na strooihalms. . .” het Olivier gesê en bygevoeg Gotlieb se gedrag kom op die misbruik van die wet neer.

Gotlieb het volgehou hy dring bloot op ‘n regverdige verhoor aan.

Olivier het aan Tashiya gevra of Gotlieb hom beïnvloed het om van sy regsverteenwoordiger ontslae te raak en hom daaraan herinner regsverteenwoordiging is nie ‘n absolute reg nie.

Beskuldigde nommer vyf, mnr. Malakia Shiweda, se regsverteenwoordiger het aangedui Gotlieb se versoek vir uitstel van tot ’n jaar is onredelik en sy kliënt is ook daarop geregtig om ’n spoedige, regverdige verhoor te hê.

Mnr. Titus Ipumbu het gesê indien die saak voortdurend uitgestel word, sal hy genoop wees om aansoek te doen dat die sake geskei word.

Regter Usiku sal môre aandui of sy verdere uitstel vir die verhoor sal toestaan.

[email protected]