Nog 'n Fishrotter pleit totale onskuld

Kristien Kruger – “Ek dink die beweringe dat die staat ’n sterk saak teen my het, is misplaas. Die fondse wat ek ontvang het, het geen betrekking tot kwotas gehad nie. Die aantygings teen my kan verduidelik word.”
Mnr. Otneel Shuudifonya het gister die stelling tydens sy getuienis in sy formele aansoek om borgtog in die hoërhof in Windhoek gemaak.
Sy regsverteenwoordiger, mnr. Milton Engelbrecht, het voordat hy die getuienisbank ingeneem het, gesê bewyse sal voorgelê word ter ondersteuning van sy vrylating op borgtog op grond daarvan dat hy nie met die ondersoek of getuies sal inmeng nie en die staat nie ’n sterk saak teen hom het nie.
“Die fondse wat ek ontvang het, is in lyn met besigheidooreenkomste, beleggings en die terugbetaling van lenings. Ek is nie oortuig daarvan die staat het ’n sterk saak teen my nie.”
VLUGRISIKO
Shuudifonya het gesê lede van die Teenkorrupsiekommissie (ACC) het hom reeds in Junie 2020 vir die eerste keer rakende die Fishrot-skandaal ondervra, waartydens hy glo ingelig is dat hy een van die verdagtes is.
Hoewel hy twee keer daarna weer ingeroep is om verklarings af te lê, is hy eers in Desember 2020 in hegtenis geneem.
Shuudifonya beweer ten spyte daarvan dat hy geweet het dat hy ’n verdagte is, hy nie gevlug of by die ondersoek probeer inmeng het nie.
Hy het verder geen familielede wat buite Namibië woon nie, wat bydra tot die onwaarskynlikheid dat hy op die vlug sal slaan.
BEREID OM BORGTOG TE BETAAL
Shuudifonya het tydens sy getuienis gesê hy sal bereid wees om borgtog van sowat N$50 000 te betaal wat sy vriende glo sal betaal.
Hy het bygevoeg hy sal bereid wees om twee keer ’n week by ’n polisiekantoor op Otjiwarongo aan te meld en nie sal reis sonder om die ondersoekbeampte in te lig nie.
“Die staat maak aantygings dat Fine Seafood N$10,3 miljoen van Saga Seafood ontvang het met betrekking tot kwotas van Fishcor. Ons het nooit enige geld ontvang nie.”
Volgens hom was die geld ’n belegging in ’n besigheidsplan om visvoer te verskaf en te vervaardig.
Die begroting was glo N$9 miljoen en twee fakture van N$4,5 miljoen elk is uitgereik.
Engelbrecht het vir Shuudifonya gevra wat van die geld geword het.
“Die projek is gestaak toe die Fishrot-skandaal op die lappe gekom het en die geld is steeds in ons entiteite belê en is nog beskikbaar.”
VERHOUDING MET NGHIPUNYA
Shuudifonya het tydens sy getuienis verduidelik mede-Fishrot-beskuldigde, mnr. Mike Nghipunya, het hom op twee geleenthede gehelp met aanvangskapitaal met betrekking tot Jacobs Investment cc, waarin Shuudifonya ’n 100%-belang het, en Fine Seafood Investment cc, waarin hy ’n 50%-belang het.
“Toe Fine Seafood in 2015 gestig is, het Mike toerusting en voorraad ter waarde van sowat N$1,3 miljoen gegee.”
Volgens Shuudifonya beweer die staat dat Fine Seafood N$2,9 miljoen van Skeleton Coast Pty Ltd ontvang het in ruil vir kwotas deur Fishcor, maar daardie bedrag is glo ’n belegging deur Gwanyemba Investment, waarvan Nghipunya ’n lid is.
Volgens sy getuienis het sy mede-aansoeker, mnr. James Hatuikulipi, hom in 2017 gevra vir finansiële ondersteuning vir die Swapo-party se kongres, waarvoor hy verantwoordelik was.
“Ek het betalings ter waarde van sowat N$2 miljoen aan hom as ’n lening oorbetaal. Hy het my terugbetaal en ek het nie bevraagteken waar hy die geld gekry het nie. Ons het nie saamgesweer nie; dit was eenvoudig ’n terugbetaling op ’n lening.” Hatuikulipi het hom glo ook gehelp met aanvangskapitaal in Ndjako Investment cc, waarin hy ’n 50%-belang het.
Vandag is die agtste dag van die formele aansoek om borgtog. Kruisondervraging deur die staat het gister begin en sal na verwagting vandag voortduur.
– [email protected]

FOTO
Mnr. Otneel Shuudifonya, Fishrot-beskuldigde, het die getuienisbank ingeneem vir sy formele aansoek om borgtog in die hoërhof in Windhoek. Foto argief