NPL-topbestuur bly onder skoot oor Musekwa

Tielman van Lill - Julinho Sporting van Rundu is ontevrede met die bestuur van die MTC Namibiese Premierliga (NPL) – veral nadat hy Saterdag as tuisspan met 5-1 teen African Stars van Windhoek verloor het.
Stars het Saterdag weer die omstrede 27-jarige Zimbabwiër, Simon Tapiwa Musekwa, in sy NPL-botsing op Rundu gebruik.
’n Goed geplaaste bron na aan Julinho het hieroor aan dié koerant gesê die klub verwag antwoorde van die NPL en sy voorsitter, mnr. Patrick Kauta.
“Ons het Saterdag gesien hoe die polisie- en immigrasiebeamptes na Musekwa by die Rundu-sportstadion kom soek het. Die beamptes het hom glo ook in Windhoek probeer opspoor, maar omrede Stars hom nie daar in wedstryde gebruik nie, kon hulle hom nog nie kry nie. Stars het hom nog net teen Young Brazilians in Karasburg en teen ons op die veld gestuur.
“Ons weet nie waar die lasbrief vir sy inhegtenisname vandaan kom nie, maar Nampol was gereed om hom te arresteer. Die bestuur van Stars het Musekwa se paspoort aan die beamptes getoon waarin blybaar wel ’n visum was.
“Stars en sy bestuur is toe na die kleedkamers, maar een van Stars se bestuurslede het die beamptes besig gehou terwyl Musekwa deur ’n venster geglip en die hasepad gekies het om ’n taxi na Windhoek te kry.
“Musekwa is egter gearresteer voordat hy kon verdwyn. Hulle (Nampol) het sy paspoort gehou, maar die voorsitter van African Stars was vinnig by om toutjies te begin trek om Musekwa se vrylating te verseker. Hy het iemand van binnelandse sake vir wie hy ken in Walvisbaai gebel om met Nampol in Rundu te skakel om hom vry te laat.
“Volgens inligting is ’n permanente sekretaris gekontak wat uiteindelik Musekwa se vrylating bewerkstellig het. Die vervaldatum van die visum in sy paspoort was reeds verlede jaar op 23 Desember. Aan die onderkant van die visum is ’n endossement wat sê dat Musekwa se visum nie hernubaar is nie.
“Wat verbysterend is, is dat kort daarna weer ’n visum aan hom uitgereik is wat tot 22 Februarie 2019 geldig is. Niemand kan die handtekening identifiseer van die beampte wat die ‘nuwe’ visum uitgereik het nie.
“Omrede sy visum nie geldig is nie, is Musekwa Saterdag 48 uur gegee om uit die land te wees. Maar of dit wel sal gebeur, weet niemand nie. Al wat ek weet, is dat dié tipe ding nie goed is vir sokker in Namibië nie,” is aan Republikein gesê.
Volgens die bron sal Julinho wel sy lot by die NPL bekla, maar gaan nie protes teen die uitslag van die wed¬stryd aanteken nie.
“Indien Julinho nie genoeg bewyse aan die NPL vir protes kan voorlê nie, gaan dit eenvoudig by die NPL in die snippermandjie beland. Maar wat ons wil hê ondersoek moet word, is hoe dit vir Musekwa moontlik is om steeds in Namibië te wees?
“Die feit dat hy net in wedstryde buite Windhoek gebruik word, is vir ons ’n aanduiding dat hulle (Stars) weet hy is onwettig in die land en nie ’n geregistreerde speler is nie.
“Jy weet, mnr. Patrick Kauta is die voorsitter van African Stars en vul dieselfde posisie in die NPL! Met ander woorde hy kan maak net wat hy wil. Musekwa was die oorsaak dat die NPL vir Young African uit die Premierliga geskop het, maar Stars begaan presies dieselfde oortreding hoewel almal weet dit is onwettig.
“Daar was ’n onwettige spelerskaart aan Musekwa uitgereik wat hy sê deur Young African aan hom verskaf is en deur die klub vervals is. Dis verstommend dat hy kan sien dat die inligting op die kaart totaal en al verkeerd is, maar hy gebruik dit om hom voor wedstryde aan die wedstrydbeamtes te identifiseer. Hoe werk dit?
“Nou is dit sy paspoort met die onwettige visum wat ’n twispunt is. Soos ek African Stars ken, sal hulle beweer dat hulle nie geweet het sy visum is onwettig nie. Stars se bestuur weet baie goed dat Musekwa se visum en paspoort nie in orde is nie, want hoe anders sal hulle hom dan aanraai om op die vlug te slaan sodat Nampol hom nie kan arresteer nie?
“Hierdie goed moet dringend ondersoek word. Tigers wil ook weet wat aangaan en ons as liefhebbers van sokker eis dat Kauta met onmiddellike effek as voorsitter van die NPL moet bedank.
“Ná al die mediaberigte oor Musekwa, is dit onverstaanbaar dat hy as speler vir sewe wedstryde deur die NPL geskors was? Hoe werk dit en hoe kry die NPL dit reg om ’n onwettige immigrant sonder ’n visum net te skors? Hy moet uit die land gesit word tot sy visum en paspoort deur die regte amptelike kanale goedgekeur is.
“Wat verder van Musekwa se skorsing pla, is die feit dat die ander klubs geen dokumentasie rakende dit ontvang het nie. Wie het die besluit geneem en wie het toegesien dat Musekwa wel die sogenaamde skorsing uitdien?
“Nie een van die NPL-klubs is by die chaos betrek om hul insette vir ’n dissiplinêre komitee te lewer nie. Die klubs het nie eens van (die skorsing) geweet nie, hulle het maar net later daarvan gehoor,” het die bron afgesluit.
•Die NPL se hoofborg, MTC, het die sokkerliggaam se raad van goewerneurs vir ’n vergadering op Maandag 25 Februarie saamgeroep om verskeie netelige kwessies op administratiewe vlak van die premierliga te bespreek.
Die hantering van die Musekwa-sage is reeds as ’n besliste onderwerp van bespreking genoem, tesame met die feit dat die nasionale eerste liga landwyd nog nie eens begin het van waar spanne na die volgende NPL-seisoen bevorder moet word nie.