Nuut op die rak in November

Niefiksie

Steinheist

Rob Rose

TAFELBERG, R295

Ná die Steinhoff-bom gebars het, het miljarde rande oornag van die JSE en uit gewone Suid-Afrikaners se pensioene verdwyn.

Toe die maatskappy as ’n kaartehuis blootgestel word, het dit skokgolwe die wêreld ingestuur met stories van bedrog, die vinnige lewe, perde . . . selfs ’n minnares om die cliché af te rond.

Rose, redakteur van Financial Mail, grou diep aan dié korporatiewe skandaal.

---------------------------------------------------------------------------------------------------

Poësie

Mens dier ding

Alfred Schaffer

HUMAN & ROUSSEAU, R245

In dié vertaling van Schaffer se bekroonde Nederlandse bundel, Mens dier ding, ondersoek die digter die mite van Shaka Zulu deur dagboekinskrywings, monoloë, briewe en dagdrome.

Shaka word vergestalt as ’n kleurryke figuur; die mites rondom sy geskiedenis word op die kop gedraai en ondermyn, en eindelik – soos almal van ons – word hy akteur in sy eie lewensverhaal. ’n Poëtiese kragtoer.

--------------------------------------------------------------------------------------------------------

Misdaadfiksie

Dag drie

Jeanette Stals

LAPA, R265

Luna Joubert en haar medespeurder, Johan, vergesel ’n geheime agent op ’n missie na Mauritius, waar hy met ’n informant kontak sal maak.

Luna en Johan moet die skyn van gewone vakansiegangers help bewaar, maar dinge loop skeef.

Op dag een is daar klaar ’n lyk van ’n jong meisie, die informant speel kat-en-muis en ’n visvang-uitstappie op ’n luukse jag is dalk nie so onskuldig nie.

-------------------------------------------------------------------------------------------------------------------------

Misdaadfiksie

Soos ’n diep waterkuil

Peet Venter

LAPA, R295

Twee slagoffers, twee moordenaars en kinders wat met reëlmaat verdwyn.

Speuradjudant Jaap (Boel) Helberg ondersoek die saak. Die een slagoffer is ’n invloedryke sakeman se vrou. Hy is ’n man met ’n diaboliese stokperdjie: veghonde.Die ander moordenaar hou van speletjies. Hy bel Helberg met die slagoffer se selfoon, vertel waar haar lyk is en stuur dan ’n video van hoe sy vermoor word...

----------------------------------------------------------------------------------------------------------------------------

Fiksie

Too Many Tsunamis

Vincent Pienaar

PENGUIN, R240

Die lewe is ’n gesleur ... niemand weet dit beter as Bert nie.

Bert wil skryf. Hy wil homself ook om die lewe bring en het ’n briljante selfmoordbrief geskryf. Die probleem is, tot dusver is Bert se selfmoord net so suksesvol soos sy skrywersloopbaan.

Dan wonder hy of sy moeder sy selfmoordnota sal verstaan, en begin ’n voetnota skryf, wat later ’n monstergolf van ’n nota word.

O ja, en daar’s ’n meisie. - Netwerk24