Nuwe kampioenspan in Beach Bash

Otis Finck - Die sterk houvas wat Sand Machines die afgelope vier jaar op die gewilde Bank Windhoek Beach Bash strandvlugbaltoernooi by Langstrand toegepas het, is uiteindelik die afgelope naweek afgeskud.'n Nuwe kampioenspan is in die Pro-afdeling bekroon toe Team Dark die eindstryd teen Sand Machines in twee stelle beklink het (21-16, 21-18).Team Dark se spanlede wat die titel beklink het en wat Sand Machines van hul vyfde opeenvolgende titel in vyf jaar weerhou het, is Kim Seebach, Philipp Schulz en die drie broers Danilo, Andriko (kaptein) en Roman von Ludwiger.Sand Machines se terugvegpoging in die tweede stel – desperaat om hul indrukwekkende string onoorwonne wedstryde lewendig te probeer hou – was nietemin vergeefs.Gabs, 'n span wat al die pad vanaf die buurland Botswana na die Namibiese weskus gereis het, het die bronsposisie beklink deur Kudos in die uitspeelstryd vir die Pro-afdeling se derde plek met twee stelle teen een te klop (21-19, 21-11, 15-12).Team Dark het na die semifinaal gevorder deur Beach Bashers met 21-12, 21-16 uit te skakel. Die ander uitslae van die kwarteindronde was Kudos se sege teen Opilu (21-4, 14-21, 15-11), Gabs se triomf teen Sand Dragons (21-15, 21-19) en Sand Machines se oorwinning teen Braaivleis (21-19, 21-18). SOSIALE KOMPETISIEDie span van Swakopmund munisipaliteit het die sosiale afdeling gewen toe hulle die finaal teen Six Pack met twee stelle teen nul beklink het (21-9, 21-11).Die wenspan se lede was Scharlotte Kotze (kaptein), Fransina Darius, Fillipus Kangolohi, Benny Shimi, Steven Masipa en Rufus Wedeinge. Dit was die munisipale span se eerste trofee in 'n Beach Bash-toernooi.In die uitspeelwedstryd om die derde posisie was Bash Oldies, die vorige jaar se titelhouer, aan die wenkant teen We Are The North met twee stelle teen een (15-21, 21-7, 15-12).In die semifinaal het Six Pack vir We Are The North uitgeskakel (21-14, 21-14), terwyl Swakopmund munisipaliteit sy plek in die eindstryd verseker het deur die verdedigende kampioenspan Bash Oldies in 'n taai stryd met 10-21, 21-7, 17-15 oorkom het.Die vier spanne wat in die kwarteindronde uitgeskakel is, was Net Threat, Beervenger, Just Dig It en Coastal Players.• Nege spanne het in die Pro-afdeling meegeding, teenoor 19 in die sosiale kompetisie.Gedurende die groepfase het spanne in 'n rondomtalie-formaat meegeding, voordat uitskakeling met die aanbreek van die kwarteindronde begin het.Die hooforganiseerder James Verrinder, as eienaar en afrigter van die Timeout Beach Volleyball Academy, het sy tevredenheid met die verloop van die dag verklaar.“Ons het weer 'n baie kompeterende toernooi propvol aksie gesien en die strandvlugbal was van die hoogste gehalte. Die weer was gunstig en toeskouers het dit goed ondersteun. “Dit alles sou egter nie moontlik gewees het sonder ons borge soos Bank Windhoek nie.”• Volgens Verrinder hervat die skedule van strandvlugbal gedurende die eerste naweek van Februarie met die immergewilde Volleyball for All by die DTS-sportveld in Windhoek. Dit sal opgevolg word met die eerste toernooi in die Timeout-reeks op 22 Februarie by dieselfde venue, tussen gemengde spanne van twee.

Nuwe kampioenspan in Beach Bash

Kommentaar

Republikein 2025-04-07

Meld asseblief aan om kommentaar te lewer

Nuwe kampioenspan in Beach Bash

Kommentaar

Republikein 2025-04-07

Meld asseblief aan om kommentaar te lewer

MELD AAN

Advertensie