Ohorongo voeg waarde toe

Minette Brink
Om weg te doen met ongelyke welvaartverspreiding, is waardetoevoeging tot die land se hulpbronne die sleutel tot die skep van werk en rykdom.

Dit is die oproep van die land se leiers aan die myn- en vervaardigingsbedryf: Voeg waarde toe tot die land se minerale vóór uitvoer.

Namibië voer die meeste van sy minerale uit met min waardetoevoeging. Derhalwe word die volle voordele vir die nasie nie gerealiseer nie. Plaaslike waardetoevoeging bevorder industrialisasie en genereer wesenlike ekonomiese groei, wat op die beurt armoede verminder.

Ohorongo Cement voldoen aan die vereistes wat betref waardetoevoeging, aangesien die maatskappy hoofsaaklik plaaslike bestanddele en dienste in die vervaardiging van sement gebruik. Daarbenewens is alle vaardighede en kennis van plaaslike oorsprong, met 99% van die aanleg se bedryf en bestuur wat deur Namibiërs gedoen word.

Die belangrikste grondstowwe vir die produksie van sement is kalksteen, skalie en marlyn wat in groot hoeveelhede beskikbaar is in die steengroewe van Ohorongo. Die ander bestanddele soos ystererts en gips word verkry uit plaaslike myne.

“As ’n Namibiese maatskappy is ons daarop gefokus om Namibië te help om ’n geïndustrialiseerde nasie te word waarvan toekomstige generasies in die internasionale arena kan meeding,” het mnr. Hans-Wilhelm Schütte, besturende direkteur van Ohorongo, gesê.

Die maatskappy verkry meer as 99% van ander dienste (vervoer van sement en personeel, asook elektrisiteit) en materiaal (onder meer 50 kg-papiersakke, beskermende werksdrag, alternatiewe brandstowwe en palette) plaaslik om te verseker dat ander nywerhede voordeel uit Ohorongo se bestaan trek. In ruil help dit om die Namibiese ekonomie te laat groei, aangesien geld wat elders bestee sou word, in die land bly.

“Ons glo vas alles wat ons benodig, is plaaslik beskikbaar. Daarom plaas ons groot klem op plaaslike verkryging ten einde die Namibiese ekonomie te laat groei deur ontwikkeling van nuwe nywerhede, tegnologiese ingryping, vaardigheidsoordrag, kapasiteitsontwikkeling en werkskepping,” het Schütte gesê. “Die geleenthede om saam te werk, is wedersyds voordelig vir die ekonomiese groei en industrialisering van Namibië.”

Die maatskappy het in Julie vanjaar 'n ooreenkoms aangegaan met 'n vervaardiger op Oshakati vir die verskaffing van plaaslik vervaardigde 50 kg-papiersakke vir sement. Die verskaffing van die sakke deur Kaptau Investments is 'n eerste vir Namibië. Ohorongo het voorheen sakke in die buiteland aangekoop, aangesien produksie in 2011 begin het. Hierdie ooreenkoms voltooi die volle waardetoevoeging tot die sementvervaardigingsproses in die land, terwyl die voordele van Namibië se hulpbronne vermeerder word.

Die Ohorongo Cement-aanleg is ook uniek in die sin dat dit steenkool tot met 80% kan vervang met alternatiewe brandstowwe soos onder meer houtsnippers, wat 'n groot omgewingsvoordeel vir Namibië inhou.

Om by te dra tot die vermindering van kweekhuisgasvrystellings, asook Namibië se afhanklikheid van kraginvoere, het Ohorongo onlangs die eerste bedryf geword wat voorsien is van sonkrag, verskaf deur 'n onafhanklike kragprodusent.

Danksy aktiwiteite gemik op waardetoevoeging is meer as 280 direkte en na raming 2 100 indirekte werksgeleenthede geskep.

“Ons hoop om ander maatskappye te inspireer om ons voorbeeld te volg, en te verseker dat hulle ander nywerhede bevoordeel, sodat Namibië se Visie 2030 en ander nywerheidsbeleide kan realiseer. Ons moet sáám buitelandse beleggings in Namibië lok,” het Schütte gesê.

Kommentaar

Republikein 2025-04-20

Geen kommentaar is op hierdie artikel gelaat nie

Meld asseblief aan om kommentaar te lewer