Ommeswaai vir DBV Windhoek
Ommeswaai vir DBV Windhoek

Ommeswaai vir DBV Windhoek

Die Dierebeskermingsvereniging in die hoofstad wil 'n nuwe blaadjie omslaan en meer vertroue by die gemeenskap inboesem.
Francoise Steynberg
Francoise Steynberg - Die Dierebeskermingsvereniging (DBV) in Windhoek het 'n splinternuwe baadjie aangetrek met die aanstelling van hul nuwe uitvoerende hoof, me. Monique ­Redecker.

Hiermee kry die DBV Windhoek nou 'n nuwe, vars en moderne beeld en aanslag met Redecker wat aan stuur van sake staan.

“Die DBV in Windhoek is al vir 60 jaar op dieselfde perseel oorkant die Maerua-inkoopsentrum geleë. Dit is tyd dat ons 'n nuwe blaadjie omslaan.” het Redecker gesê.

“Die DBV moet weer meer vertroue en respek by die gemeenskap inboesem om 'n groter impak te maak om skenkings te kry.”

Die doelwit van die DBV bly steeds om diere te beskerm en dieremishandeling te voorkom en te verminder.

“Wreedheid teenoor diere het onlangs in Namibië toegeneem en die DBV speel 'n belangrike rol om diere wat weggegooi of mishandel is, te red en by te staan” sê Redecker. “Die DBV is 'n sakebedryf wat ek suksesvol wil maak.” Redecker haal Lilly Tomlin aan dat “die pad na sukses altyd onder konstruksie is”.

Sy sê daar gaan altyd diere wees wat versorg moet word: “Die geheim is om die regte manier te vind om 'n storie te begin wat geen einde het nie. Ek weet dit gaan 'n lang, harde pad wees.”

Op die vraag waarom sy die pos as uitvoerende hoof aanvaar het, antwoord sy dat sy 'n groot liefde vir diere het en nog altyd 'n passie gehad het om terug te gee.

“Al my diere kom van die DBV af en ek wou nog altyd vir diere 'n veilige hawe skep. My persoonlike missie is om die uitsit van diere drasties te verminder. Ek weet dit is nie volkome moontlik nie; dit is soos om Berg Everest uit te klim, maar met onderrig en bewusmaking in die gemeenskap kan dit verminder.”

Redecker wat 'n gesoute sakevrou is en al 'n besturende direkteursposisie beklee het, het baie planne vir die toekoms van die DBV Windhoek. Dit spog nou met die nuwe, moderne kenteken en slagspreuk: “It is cool to be kind”.

Daar word na 'n groter geskikte perseel gesoek om meer diere in te neem.



groter perseel

“Die DBV het nie saam met die hoeveelheid diere wat daar is, gegroei nie. Ons moet 'n groter erf kry. Skuif, moet ons skuif. 'n Groter perseel gaan in elk geval ook vol raak, maar dit gee meer kans dat diere aangeneem kan word.”

Redecker sê erwe is reeds geïdentifiseer, 'n sakeplan moet opgetrek word en ontwikkelaars met idees is welkom om met haar in aanraking te kom. Haar droom is om 'n diere-­village te ontwikkel met ­piekniekplekke en wandellane waar mense met die honde kan gaan stap.

“Alhoewel die DBV al sedert 1957 op dieselfde perseel is, kan ons nêrens dokumente vind van wanneer en deur wie die DBV presies gestig is nie.” Sy versoek enigiemand met inligting, staaltjies en stories van 1957 en vroeër om dit na [email protected] te stuur.

Redecker sê al die DBV's in die land werk tans afsonderlik van mekaar en sy wil weer positiewe verhoudings opbou, ook tussen die verskillende DBV's. “Uiteindelik wil ons almal onder een sambreel kry met DBV Windhoek wat die ander DBV's met onder meer kos, bemarking en finansies kan help. My mikpunt is dat alle organisasies wat vir diere werk, met mekaar oor die weg kom, uithelp en ondersteun. As ons dit nie doen nie, ly die dier op die ou end daaronder,” sluit Redecker af.

Vir meer inligting, skakel Redecker by 081 128 4448 of [email protected].

Kommentaar

Republikein 2025-04-20

Geen kommentaar is op hierdie artikel gelaat nie

Meld asseblief aan om kommentaar te lewer