Onderwys: Namibiërs moet omvattende seksonderrig verwelkom

Die ministerie van onderwys, kuns en kultuur het Namibiërs aangemoedig om die instelling van die hersiende leerplan vir Omvattende Seksonderrig (CSE) te verwelkom. Die CSE-kursus is deel van die lewensvaardighede-vak en het ten doel om leerlinge in graad 4 tot 12 toe te rus met die kennis, vaardighede en waardes om gepaste en gesonde keuses te maak.
Die ministerie se adjunk-direkteur vir die bestuur van MIV/vigs, mnr. Julius Nghifikwa sê die instelling van die kursus sedert 2013 het gemengde reaksie onder sommige godsdienstige leiers, ouers en onderwysers ontlok. Volgens hulle sal die grafiese inhoud waaraan leerlinge blootgestel word, leerlinge aanmoedig om seksuele verhoudings aan te knoop.
Nghifikwa het egter beklemtoon die inhoud van die kursus is volgens volgens ouderdom, ontwikkeling en wetenskap gepas.
“Daar is ‘n verskil tussen die onderrig wat ‘n graad 4-leerling en ‘n graad 8-leerlinge sal ontvang,” het hy gesê.
Die CSE-program is hersien as deel van ‘n ontmoeting van die Suider-Afrikaanse Ontwikkelingstreek (SADC) in ‘n poging om die MIV-pandemie onder die jeug hok te slaan. Sowat 1,1 miljoen van nuwe infekterings in die streek vind onder jong mense tussen die ouderdomme van 10 tot 24 jaar plaas.