Onderwys skuld stad meer as N$32 miljoen
Onderwys skuld stad meer as N$32 miljoen

Onderwys skuld stad meer as N$32 miljoen

Die drie skole wat eerste geteiken is toe die munisipaliteit water en elektrisiteit weens onderwys se wanbetaling wou afsny, se rekeninge beloop saam meer as N$5 miljoen.
Elvira Hattingh
Elvira Hattingh - Die ministerie van onderwys, kuns en kultuur se totale munisipale rekening by die Windhoekse munisipaliteit staan op sowat N$32,5 miljoen. Dié rekeninge is sewe maande agterstallig.

Die laaste betaling van N$8,9 miljoen is in Maart deur die munisipaliteit ontvang en het maar net effens meer as die ministerie se maandelikse, gemiddelde rekening van sowat N$7 miljoen gedek.

Die munisipaliteit van Windhoek het Vrydag volledige data oor onderwys se opgehoopte skuld met Republikein gedeel.

Die jongste rekeninge vir die ministerie se hoofkantoor beloop meer as N$500 000 terwyl die streekdirektoraat net meer as N$840 000 skuld en die Instituut vir Spesiale Onderwys ook meer as N$500 000.

Hoewel die opskorting van dienste vir eers afgelas is weens ‘n betalingsonderneming deur die ministerie, is die hoofstad volgens mnr. Harold Akwenye, bestuurder vir korporatiewe kommunikasie, bemarking en openbare deelname, gereed om alle geraakte skole se water en krag binne 30 dae af te sny. Volgens die munisipale woordvoerder, me. Lydia Amutenya, sal sy eers vandag kan bevestig of die beloofde betaling van N$15 miljoen ontvang is.

Munisipale data toon laerskole en net sekere hoërskole het by die mees onlangse betalings gebaat. Die meeste hoërskole se skuld is aansienlik meer as laerskole s’n.

Die skole wat eerste besoek is met die opdrag om dienste op te skort, was Windhoek Hoërskool, Academia Hoërskool en Concordia College. Dit is die plig van die ministerie se streekdirektoraat om alle skole se munisipale rekeninge te betaal.

Die syfers deur die munisipaliteit verstrek, gee die totale bedrae verskuldig deur die drie skole aan as N$2,14 miljoen vir WHS, N$2 miljoen vir Concordia en N$1,25 miljoen vir Academia. Die hoërskool met die hoogste rekening is Augustinium, wat meer as N$2,8 miljoen aan die munisipaliteit skuld.

Ander hoërskole op die toptienlys is Sekondêre Skool Delta (N$1,4 miljoen), Centaurus (N$1,39 miljoen), Hoër Tegniese Skool Windhoek en Jan Möhr (beide N$1,3 miljoen), Seunskool Pionier (N$1,2 miljoen) en A. Shipena (N$1 miljoen). Die meeste van die skole het koshuise.

Hoërskole met veel minder skuld is byvoorbeeld Immanuel Shifidi (N$472 729), Jan Jonker Afrikaner (N$249 669) en Dawid Bezuidenhoudt (N$154 946).

Die laerskool met die hoogste rekening is Eros Laerskool met N$1,16 miljoen. Die skool het ook ‘n koshuis.

* Sekere skole se name word alleen genoem om die omvang van die ministerie se wanbetaling met feite in perspektief te stel.

Kommentaar

Republikein 2025-04-07

Geen kommentaar is op hierdie artikel gelaat nie

Meld asseblief aan om kommentaar te lewer