Oranje klim oor sy walle

Augetto Graig – Kommer heers oor die Oranjerivier in vloed wat só vroeg in die reënseisoen reeds die pad tussen Aussenkehr, die land se tafeldruifmekka, en die myndorp Rosh Pinah in die verre suide gesluit het. Mnr. Alexander Maasdorp, die dorpsbestuurder van RoshSkor, gesamentlike mynbou-onderneming wat laasgenoemde dorp bestuur, sê: “Ons gaan nog baie water verby kry.”Hy is bekommerd daaroor dat die baie water wat in die Benede-Oranjerivier na die Atlantiese Oseaan vloei, reeds paaie beskadig het en toegang na dorpe belemmer.Die Paaieowerheid (RA) het gister ’n deel van die DR212- en die C13-pad tussen Rosh Pinah en Aussenkehr tot verdere kennisgewing gesluit. Die pad word deur vloedwater oorspoel, veral by die Visrivierkruising waar die maksimum waterhoogte oorgesteek is.Die Paaieowerheid het die publiek versoek om vanaf Noordoewer en Aussenkehr liewer Keetmanshoop om na Aus en Rosh Pinah te ry tyd en wyl die watervlakke sak en dit weer veilig vir padgebruikers is. Namibiërs is die versekering gegee die situasie word noukeurig gemonitor om spoedig inligting oor die watervlak te kommunikeer.Maasdorp sê waar die Visrivier by die Oranjerivier aansluit, stoot die water reeds in die Visrivier op, wat meebring dat laagwaterbrûe oorspoel is. Ook waar die pad teen die berg verbyloop, is dit oorstroom, sê hy.“’n Mens kan nie nou van Oranjemund of Rosh Pinah af na Aussenkehr ry nie. Jy moet Keetmanshoop om ry,” sê hy. Hy is bekommerd oor die druiweprodusente op Aussenkehr wat met vorige vloede produksie verloor het, asook oor gastehuiseienaars langs die rivier wat skade gely het.NUWE PAD SE DIEP KRAAKIntussen het motoriste ook hul kommer op sosialemediaplatforms uitgespreek oor die toestand van die nuwe teerpad tussen Rosh Pinah en Oranjemund.Mnr. Visser du Preez van Oranjemund het foto’s geplaas van ’n groeiende kraak in die pad langs die stygende Oranjerivier. Hy sê hy ry al jare die pad en vandat die reusekraak laasjaar verskyn het, is hy ongemaklik om daar te bestuur.“Aan die ander kant van die teerpad het ons die berggedeelte met rotse wat kan val en ernstige skade kan aanrig aan die pad en natuurlik ook voertuie wat tussen die dorpe beweeg.“Die skade aan die pad lyk erg, maar ons weet nie werklik hoe sleg dit (die strukturele skade) is nie. Ons wag nog vir professionele hulp om dit te bepaal, maar met so baie water op pad, weet almal wat kan gebeur as die rivier se vlak nog verder styg,” sê hy.Ruabex in Suid-Afrika het in 2017 die N$714 miljoen-pad vir die RA voltooi. Hulle het nie gister op vrae in dié verband geantwoord nie.Die Paaieowerheid se woordvoerder, me. Hileni Fillemon, sê die herstelwerk is deel van die oorspronklik kontrakverpligtinge.“Die krake mag wees weens kwessies buite enigiemand se beheer,” sê sy en voeg by die vloedvlakke was hoog toe die skade die eerste keer opgemerk is.Sedertdien het die Paaieowerheid ’n konsultant aangestel om vas te stel presies wat dit veroorsaak het, maar sy werk is deur die uitbreking van Covid-19 in Namibië belemmer, sê sy.“Ons verwag om die verslag oor voltooide ondersoek met ’n ontwerp vir die regstelling daarvan, teen die einde van April 2022 te kry. Eers daarna kan herstelwerk begin. Die pad is veilig gemaak deur gepaste waarskuwingsborde aan te bring. “Padgebruikers word versoek om aandag te skenk en op daai deel van die pad versigtig te bestuur.“Die Paaieowerheid monitor dit en doen ekstra moeite nou met die styging van die rivier weens swaar reën in Suid-Afrika,” sê sy.Sou die pad gesluit word, sal reise tussen Rosh Pinah en Oranjemund slegs via Suid-Afrika moontlik wees.Tans is die grenspos by Oranjemund egter nog weens Covid-19 gesluit.Die ander moontlikheid is om gebruik te maak van ’n privaat pad tussen Oranjemund en Lüderitz, sê Fillemon.– augetto@republikein.com.na

Oranje klim oor sy walle

Kommentaar

Republikein 2025-04-09

Meld asseblief aan om kommentaar te lewer

Oranje klim oor sy walle

Kommentaar

Republikein 2025-04-09

Meld asseblief aan om kommentaar te lewer

MELD AAN

Advertensie