Ou motors brul teen kanker

Tanja BauseOp 24 Mei sal meer as 25 motors hul stemme dik maak teen kanker. Dié motors sal vanuit Windhoek op die Rough & Tough Rally vertrek.Dit is die eerste in sy soort en hoewel dit 'n tydren genoem word, is dit volgens die organiseerder, mnr. Philipie Baard, nie eintlik 'n tydren nie.“Die idee is om veilig van punt A na punt B te ry. Almal is op hul eie spoed, tyd en in voertuie wat nog in 'n werkende toestand is,” het Baard gesê. Die voertuie wat deelneem, moet voor 1990 vervaardig wees en hul waarde mag nie meer as N$35 000 wees nie. Baard sê hy is “mal oor enigiets wat met petrol werk en na iets klink”. Hy en sy broer Dirkie is al lank by motorsport betrokke. “Daar is tans 'n groep in Suid-Afrika, die Nuts and Bolts Rally, wat ek op sosiale media volg. “Ek het met die idee begin speel om 'n soortgelyke tydren hier in Namibië te hou wat vir Namibië aangepas is. Laas jaar in November het die wiele begin rol en nou is ons amper op pad,” het hy gesê. Baard het die roete self gekies en reeds self gery om seker te maak die voertuie sal dié roete kan baasraak.Hy was al twee keer as werktuigkundige deel van die bekende Dakar-tydren. “Ons vertrek 24 Mei uit Windhoek en ry met die Daan Viljoen-grondpad en verder met klein grondpaaie tot by Karibib. Op dag twee ry ons van Karibib deur Usakos verby die Spitzkoppe tot by Uis,” het hy gesê. Volgens Baard is daar baie aktiwiteite vir die dag langs die roete beplan. “Deelnemers moet byvoorbeeld eers in 'n plaasdam swem voordat hulle verder mag ry. “Hulle moet ook 'n wiel binne 'n sekere tydperk omruil en kry punte daarvoor. “Ons doen dit om die hele ervaring meer prettig te maak.”Op die laaste dag vertrek die voertuie uit Uis en ry na Omaruru waar die tydren die aand afgesluit sal word.“Ons beplan om elke aand 'n sanger by die braai te hê om dit gesellig te maak.”Al die geld wat ingesamel word, sal aan die Kankervereniging van Namibië (CAN) geskenk word. “Toe ek met die idee van die tydren begin het, was die vraag hoe ek meer mense betrokke sou kry en wat om met die fondse te maak? Ek het besluit om dit aan CAN te skenk omdat dié siekte almal op die een of ander manier raak,” het hy gesê. Volgens Baard skenk die kampeerplekke waar die deelnemers tuisgaan ook geld aan CAN. Die sluitingsdatum vir deelname aan die Rough & Tough Rally is die einde van April. Vir meer inligting, besoek hul Facebook-bladsy of stuur 'n e-pos aan roughtoughrally@gmail.com.

Ou motors brul teen kanker

Kommentaar

Republikein 2025-04-28

Meld asseblief aan om kommentaar te lewer

Ou motors brul teen kanker

Kommentaar

Republikein 2025-04-28

Meld asseblief aan om kommentaar te lewer

MELD AAN

Advertensie