Oud-Bok Brits verstom met bergfiets

Nadat hy sy rugbystewels weggepak het, het die Wêreldbeker-wenner Schalk Brits besluit om bergfiets te begin trap en nou oorweeg hy selfs om in die toekoms sy slag in die uitmergelende Cape Epic-toer te wys.
Dié 39-jarige was verlede jaar lid van die Springbokke se groep wat glorie in Japan gesmaak het, maar sedert sy uittrede uit die spel moes hy ’n nuwe manier vind om seker te maak dat sy badkamerskaal nie skielik begin kreun nie.
Toe die nasionale staat van inperking tot vlak 3 verslap is, het ’n voormalige fietsryer en tans ’n afrigter, Joanna Dobson, eendag haar gunstelingroete in Stellenbosch gaan ry toe sy op Brits en ’n groep van sy vriende afgekom het.
Sy het hom gevolg tot by ’n spesifieke afdraand op die roete, wat Jan Alleman normaalweg stadig aanpak, en sy het verwag dat Brits dit ook só sou benader. Tot haar verbasing het hy egter presies die teenoorgestelde gedoen en volstoom getrap asof hy ’n ervare bergfietsryer is.
“Ek kon nie glo hoe goed hy is nie. Hy was heeltemal vreesloos,” het Dobson, wat al talle beroepsfietsryers gebrei het, luidens ’n verklaring gesê.
“Hy het goeie vloei op die fiets. Hy het die korrekte tegniek en het sy liggaam gebruik om die fiets te laat draai en nie sy handvatsels nie. Ek het al meer as 7 500 mense die afgelope ses jaar gebrei en het wêreldkampioene afgerig, so ek kan talent raaksien, en hy het dit.”
Brits was self verbaas oor die heuningkwas wat Dobson vir hom uitgehaal het, veral aangesien hy in sy laerskooldae laas op ’n bergfiets geklim het.
“Toe ek begin (fietsry) het, het ek nie eens geweet hoe om ratte te wissel nie. Die laaste keer wat ek fiets gery het, was in laerskool toe ek skool toe en terug gery het. Hulle het vir my gesê spoed is jou vriend op ’n bergfiets en ek het net so vinnig as wat ek kon by die afdraande afgetrap.”
Brits sê fietsry help hom in sy lewe ná rugby.
“Die meeste van ons rugbyspelers word ’n bietjie mollig nadat ons aftree. My jonger seuns ry ook fiets, so dit is ’n heerlike aktiwiteit om saam met hulle te doen. Dit gee my ook daardie gevoel van adrenalien waaraan ek gewoond was wanneer ek op die veld uitgedraf het.
“Dit is lekker en die fietsrygemeenskap is ’n lekker groep mense.”
Brits sê hy oorweeg tans om aan die veeleisende Cape Epic-bergfietswedren in 2021 deel te neem en Dobson meen dit kan die regte besluit wees.
“Ek het oudrugbyspelers al afgerig en gesien dat hulle die Epic doen. Rugbyspelers is gewoonlik sterk en hulle het die geestelike gehardheid om die eise van die Epic te kan hanteer. Hulle het ’n vlak van krag, fiksheid en vaardighede wat opmerklik is.”
Oud-Bokke soos Joel Stransky, John Smit, Marius Hurter, Breyton Paulse en Butch James het almal al in die Cape Epic getrap. – Netwerk24


• Kyk hier hoe Brits ’n afdraand op sy bergfiets takel ...
https://youtu.be/Cybw0Ck3Q24