PDM gee nie bes
Die amptelike opposisie sê Swapo voel toenemend die hitte van sy teenwoordigheid.
Denver Kisting
Die stof rondom 'n kieshofuitspraak ten gunste van twee lede van die Popular Democratic Movement (PDM) teen dié party en die Verkiesingskommissie van Namibië (ECN) verseg om te gaan lê.
Die PDM het gisteroggend op 'n nuuskonferensie in die hoofstad by monde van sy hoofsweep, mnr. Vipua Muharukua, gesê die nuwe baadjie wat die party se voorganger, die Democratic Turnhalle Alliance (DTA), aangetrek het, hou 'n groot bedreiging in – selfs en veral vir die regerende party, Swapo.
Volgens hom het die PDM die laaste jare daarin geslaag om aan te beweeg van die juk van 'n stamgebonde party.
“Ons stel nie net bevoegde leierskap ten toon nie, maar ook diversiteit. Ons is vandag gelukkig ons het wegbeweeg van daardie soort aantygings (stamgebondenheid).”
Dít, meen Muharukua, is wat hul kritici teen die mure uitdryf.
“Die PDM het uiterste bevoegdheid in die parlement getoon as 'n party wat baklei vir die belange van die Namibiese mense. Ons sal nie naïef wees om te dink sulke werk, sulke sukses sal nie teenkanting laat uitbroei nie.”
Muharuaka het opnuut die woorde van die PDM-president, mnr. McHenry Venaani, van vroeër vandeesweek beaam dat die amptelike opposisie nie sy lys van voornemende LP's verander het om sekere kandidate uit te sluit nie.
“Dit is nie feitelik akkuraat nie. Die PDM het nie sy aanvanklike lys verander nie.”
JONGELINGE
Muharukua sê dit is eweneens bog dat die PDM van sy jong LP's ontslae wil raak. Trouens, sê hy, sou die hofuitspraak in werking gestel word sal daar minder jongelinge in die parlement wees.
Venaani het Maandagmiddag gesê die amptelike opposisie gaan appelleer teen die kieshofuitspraak.
Ingevolge dié bevinding moet die PDM vier ingesweerde LP's vervang met vier ander vanweë 'n geskil oor die party se lys van kandidate vir die Nasionale Vergadering (NV).
Venaani sê Maandag se uitspraak laat nie geregtigheid geskied aan regsreëls nie. “Die uitspraak het 'n aantal foute.”
Derhalwe gaan hulle hul tot die hooggeregshof wend, het hy benadruk.
Hul appèl gaan geskoei wees daarop dat 'n wet nie verhewe bo die Grondwet kan wees nie.
“'n Leier kan nie gekies word op grond van 'n tegniese punt nie.”
Hy sê tot die appèl afgehandel is, sal hulle nie die kieshof se bevinding uitvoer om vier van hul LP's met vier ander te vervang nie.
Me. Charmaine Tjirare en mnr. Hidipo Hamata het Maandag 'n oorwinning in die kieshof behaal om as LP's ingesweer te word.
Me. Yvette Araes en mnr. Max Katjimune was aanvanklik deel van die beplande geding maar het in 'n latere stadium daaraan onttrek.
- [email protected]
Die stof rondom 'n kieshofuitspraak ten gunste van twee lede van die Popular Democratic Movement (PDM) teen dié party en die Verkiesingskommissie van Namibië (ECN) verseg om te gaan lê.
Die PDM het gisteroggend op 'n nuuskonferensie in die hoofstad by monde van sy hoofsweep, mnr. Vipua Muharukua, gesê die nuwe baadjie wat die party se voorganger, die Democratic Turnhalle Alliance (DTA), aangetrek het, hou 'n groot bedreiging in – selfs en veral vir die regerende party, Swapo.
Volgens hom het die PDM die laaste jare daarin geslaag om aan te beweeg van die juk van 'n stamgebonde party.
“Ons stel nie net bevoegde leierskap ten toon nie, maar ook diversiteit. Ons is vandag gelukkig ons het wegbeweeg van daardie soort aantygings (stamgebondenheid).”
Dít, meen Muharukua, is wat hul kritici teen die mure uitdryf.
“Die PDM het uiterste bevoegdheid in die parlement getoon as 'n party wat baklei vir die belange van die Namibiese mense. Ons sal nie naïef wees om te dink sulke werk, sulke sukses sal nie teenkanting laat uitbroei nie.”
Muharuaka het opnuut die woorde van die PDM-president, mnr. McHenry Venaani, van vroeër vandeesweek beaam dat die amptelike opposisie nie sy lys van voornemende LP's verander het om sekere kandidate uit te sluit nie.
“Dit is nie feitelik akkuraat nie. Die PDM het nie sy aanvanklike lys verander nie.”
JONGELINGE
Muharukua sê dit is eweneens bog dat die PDM van sy jong LP's ontslae wil raak. Trouens, sê hy, sou die hofuitspraak in werking gestel word sal daar minder jongelinge in die parlement wees.
Venaani het Maandagmiddag gesê die amptelike opposisie gaan appelleer teen die kieshofuitspraak.
Ingevolge dié bevinding moet die PDM vier ingesweerde LP's vervang met vier ander vanweë 'n geskil oor die party se lys van kandidate vir die Nasionale Vergadering (NV).
Venaani sê Maandag se uitspraak laat nie geregtigheid geskied aan regsreëls nie. “Die uitspraak het 'n aantal foute.”
Derhalwe gaan hulle hul tot die hooggeregshof wend, het hy benadruk.
Hul appèl gaan geskoei wees daarop dat 'n wet nie verhewe bo die Grondwet kan wees nie.
“'n Leier kan nie gekies word op grond van 'n tegniese punt nie.”
Hy sê tot die appèl afgehandel is, sal hulle nie die kieshof se bevinding uitvoer om vier van hul LP's met vier ander te vervang nie.
Me. Charmaine Tjirare en mnr. Hidipo Hamata het Maandag 'n oorwinning in die kieshof behaal om as LP's ingesweer te word.
Me. Yvette Araes en mnr. Max Katjimune was aanvanklik deel van die beplande geding maar het in 'n latere stadium daaraan onttrek.
- [email protected]
Kommentaar
Republikein
Geen kommentaar is op hierdie artikel gelaat nie