PDM vaar uit teen polisie
Namibië het nie genoeg opgeleide, energieke en vernuftige speurders om moeilike ondersoeke te behartig nie, sê die amptelike opposisie.
Denver Kisting – Die amptelike opposisie is van mening Avihe Cheryl Ujaha (9) se dood moes verhoed gewees het.
Die Popular Democratic Movement (PDM) het Maandag by monde van sy tesourier-generaal, mnr. Nico Smit, skerp te velde getrek teen die beweerde onbevoegdheid van die polisie.
Volgens Smit is hulle woedend oor Avihe se tragiese dood, wat syns insiens ’n aanduiding is van hoe onbevoeg die Namibiese polisie is.
Dié gr.3-meisietjie se erg verminkte lykie is twee weke gelede in ’n rivierloop in Windhoek ontdek.
“Wat die onbevoegdheid en die gewoon gebrek aan vaardighede van die polisie betref, is die PDM oortuig daar is geen goed opgeleide en bevoegde speurders in die mag om sake op te los wat regte ondersoeke vereis nie,” sê Smit.
Hy sê ondanks ’n goed toegeruste forensiese afdeling, help dít niks as daar geen speurders is met genoeg energie, deursettingsvermoë én vaardighede om forensiese inligting sinvol vir ondersoeke te gebruik nie.
Smit sê die polisie kon tot vandag toe nog geen noemenswaardige terugvoering gee oor ’n moontlike reeksmoordenaar wat etlike jare gelede in die land amok gesaai het nie.
Hy het tydens ’n nuuskonferensie in die hoofstad bygevoeg: “Die feit dat die polisie blyk te dink hul énigste werk is om die publiek te vra om inligting te verskaf wat tot ’n inhegtenisneming sal lei – terwyl dít hul laaste uitweg moet wees – beteken dat dié saak waarskynlik binne ’n paar maande by die lys van onopgeloste moorde gevoeg sal word.
“Dit is hul werk om élke misdaad te ondersoek en nie net om die verantwoordelikheid na die publiek toe te skuif nie,” sê Smit.
Dit lyk vir die PDM of die polisie net misdadigers kan aankeer wat hulle op heterdaad betrap, sê hy.
Volgens hom het die tyd aangebreek vir drastiese optrede om die veiligheid van veral vroue in die land te verseker.
Smit sê hy beoog om die minister van veiligheid en sekuriteit, gen.maj. (afgetree) Charles Namoloh, in die Nasionale Vergadering (NV) te vra oor die stand van die land se speurders se vaardighede.
Die NV het gistermiddag hervat.
Hoofinsp. Kauna Shikwambi, ’n polisiewoordvoerder, het by navraag gesê hulle beskou Smit se opmerkings as ’n politieke verklaring.
Derhalwe moet dit op ’n politieke front besleg word.
Sy het opnuut gister lede van die publiek versoek om die polisie te help om Avihe se moordenaar(s) te help vastrek.
Die beloning vir inligting wat tot ’n inhegtenisneming en vervolging sal lei, beloop tans N$100 000.
Die Popular Democratic Movement (PDM) het Maandag by monde van sy tesourier-generaal, mnr. Nico Smit, skerp te velde getrek teen die beweerde onbevoegdheid van die polisie.
Volgens Smit is hulle woedend oor Avihe se tragiese dood, wat syns insiens ’n aanduiding is van hoe onbevoeg die Namibiese polisie is.
Dié gr.3-meisietjie se erg verminkte lykie is twee weke gelede in ’n rivierloop in Windhoek ontdek.
“Wat die onbevoegdheid en die gewoon gebrek aan vaardighede van die polisie betref, is die PDM oortuig daar is geen goed opgeleide en bevoegde speurders in die mag om sake op te los wat regte ondersoeke vereis nie,” sê Smit.
Hy sê ondanks ’n goed toegeruste forensiese afdeling, help dít niks as daar geen speurders is met genoeg energie, deursettingsvermoë én vaardighede om forensiese inligting sinvol vir ondersoeke te gebruik nie.
Smit sê die polisie kon tot vandag toe nog geen noemenswaardige terugvoering gee oor ’n moontlike reeksmoordenaar wat etlike jare gelede in die land amok gesaai het nie.
Hy het tydens ’n nuuskonferensie in die hoofstad bygevoeg: “Die feit dat die polisie blyk te dink hul énigste werk is om die publiek te vra om inligting te verskaf wat tot ’n inhegtenisneming sal lei – terwyl dít hul laaste uitweg moet wees – beteken dat dié saak waarskynlik binne ’n paar maande by die lys van onopgeloste moorde gevoeg sal word.
“Dit is hul werk om élke misdaad te ondersoek en nie net om die verantwoordelikheid na die publiek toe te skuif nie,” sê Smit.
Dit lyk vir die PDM of die polisie net misdadigers kan aankeer wat hulle op heterdaad betrap, sê hy.
Volgens hom het die tyd aangebreek vir drastiese optrede om die veiligheid van veral vroue in die land te verseker.
Smit sê hy beoog om die minister van veiligheid en sekuriteit, gen.maj. (afgetree) Charles Namoloh, in die Nasionale Vergadering (NV) te vra oor die stand van die land se speurders se vaardighede.
Die NV het gistermiddag hervat.
Hoofinsp. Kauna Shikwambi, ’n polisiewoordvoerder, het by navraag gesê hulle beskou Smit se opmerkings as ’n politieke verklaring.
Derhalwe moet dit op ’n politieke front besleg word.
Sy het opnuut gister lede van die publiek versoek om die polisie te help om Avihe se moordenaar(s) te help vastrek.
Die beloning vir inligting wat tot ’n inhegtenisneming en vervolging sal lei, beloop tans N$100 000.
Kommentaar
Republikein
Geen kommentaar is op hierdie artikel gelaat nie