Pick n Pay wil sy struktuur moderniseer

Nellie Brand-Jonker - Die Ackerman-beheerde Pick n Pay-maatskappy wil sy dekade oue beheerstruktuur afbreek en met ’n moderner en eenvoudiger struktuur vervang. Aandeelhouers kry einde Julie die kans om daaroor te stem.
Die beheerstruktuur wat as ’n piramide-aandeelstruktuur bekend staan, is in 1981 deur Raymond Ackerman, stigter van Pick n Pay, opgestel. Die struktuur is deur die Ackerman-familie opgerig om ’n vyandige oorname te voorkom. Die idee met die struktuur was dat die familie beheer oor die maatskappy behou.
Die piramide bestaan uit twee maat­skappye wat op die JSE genoteer is. Die Ackerman-familie hou 50% van die aandele in Pick n Pay Beherend Bpk., wat op sy beurt weer meer as 50% van die aandele in Pick n Pay Stores Bpk. hou.
Net ’n paar maatskappye op die JSE het sulke strukture oor en dit is nie baie gewild onder beleggers nie.
Die struktuur is mettertyd as ’n beslommernis en verouderd beskou en die Ackerman-familie wil daarom die struktuur aan hul aandeelhouers ontbondel maar steeds beheer behou.
Albei die Pick n Pay-direksies het die voorstel aanvaar.
In wese gaan die voorstel meebring dat alle Pick n Pay-aandeelhouers hul aandele in een enkele genoteerde maat­skappy hou. Dis die aandeelhouers van Pick n Pay Beherend wat aandele in Pick n Pay Stores gaan verkry.
Pick n Pay Beherend gaan dan denoteer en gesluit word.
Die Ackerman-familie gaan dan ’n nuwe klas van ongenoteerde stemaandele in Pick n Pay Stores kry (B-aandele). Dit sal verseker dat die Ackerman-familie steeds ’n beherende belang in die maatskappy behou.
Die Ackerman-famile sal nie stem oor die besluit nie sodat minderheidsaandeelhouers se belange ten volle in ag geneem word.
“Die Ackerman-familie wou al vir ’n geruime tyd die piramide ontbondel op ’n manier wat vir die maatskappy en sy aandeelhouers voordelig is,” het Gareth Ackerman, Pick n Pay se voorsitter en seun van Raymond, gesê.
“Ek glo die voorstel sal die doelstellings bereik. Die soort struktuur word plaaslik en internasionaal erken en is meer geskik om nakoming van moderne korporatiewe bestuurstandaarde te verseker.”
Hy glo die ontknoping van die piramide wat die Pick n Pay-groep in een genoteerde onderneming verander, sal voordele vir die maatskappy en potensieel vir alle aandeelhouers hê.
“Mettertyd sal die eenvoudiger struktuur van Pick n Pay Stores aanloklik vir beleggers wees en dit sal op sy beurt ons langtermyngroeistrategie help.”
“Die voorstel sal die Ackerman-familie se stembeheer oor Pick n Pay behou. Ons glo dit is tot voordeel van die maat­skappy. Die familie beheer die maatskappy reeds vir byna 50 jaar.”
Volgens Ackerman word ook geglo die nuwe struktuur sal stabiliteit verseker en onsekerheid beperk en die bestuurspan onder leiding van Richard Brasher, uitvoerende hoof, toelaat om met die omkeer van die onderneming voort te gaan.
Brasher sê Pick n Pay maak goeie vordering met sy plan en hy sien dit as die volgende stap in die moderniseringsprogram.
“Dit sal Pick n Pay moderniseer en vereenvoudig deur ’n enkele struktuur te skep.” Volgens hom sal dit die vrye verhandelbare aandele in Pick n Pay Stores van 46% tot 73% verhoog.
“Dit sal mettertyd die maatskappy meer aantreklik vir beleggers maak.”
Hy sê die ontbondeling van Pick n Pay Beherend in Pick n Pay Stores, sal die huidige diskonto tussen die twee se aandeelpryse verwyder.
“Dit sal my en die span toelaat om te fokus op ons klante, ons aanbod te verander en die vertoning van die groep te versnel.” - Netwerk24