President groet Eagles

Tielman van Lill – Die Eagles-krieketspan het president Hage Geingob gisteroggend Staatshuis besoek voor hul vertrek na die Verenigde Arabiese Emirate waar hulle aanstaande maand in Abu Dhabi en Sharjah die land se debuut by die T20 Wêreldbeker maak.
President Geingob het gesê: “Ek hoop julle sal ons verras, want julle sal beslis nie net deelneem nie, maar kompeterend wees. Ek is beïndruk, want ek het nie geweet ons het ’n professionele nasionale krieketspan nie.
“Ek belowe julle ek gaan na jul wedstryde kyk en ek hoop julle vaar goed. Op en van die veld is julle ons ambassadeurs. Tree ten alle tye professioneel en respekvol op.
“Ons sal op die uitkyk vir die Namibiese vlag wees as julle speel. Alles van die beste!”
Namibië sal sy rekening in groep A op 18 Oktober in Abu Dhabi teen Sri Lanka open.
Nederland volg op twee dae later by dieselfde venue, terwyl Ierland hulle in Sharjah op 22 Oktober inwag.
In groep B sal Bangladesj, Oman, Papoea-Nieu-Guinee en Skotland sake uitspook.
Net twee lande elk uit groep A en B vorder na groep 1 en 2 in die Super 12-fase. Hier is Australië, Engeland, Suid-Afrika, Wes-Indië (verdedigende wêreldkampioen) asook die A1-wenner en B2- naaswenner in groep 1 geplaas.
Groep 2 word deur Afghanistan, Indië, Nieu-Seeland, Pakistan asook die B2-wenner en A1-naaswenner gevul. Die semifinale is op 10 November en die eindstryd vier dae later in Dubai.

VROUE BLY KALM
Afrigter Francois van der Merwe sê die nasionale vrouespan is kalm en gefokus vir die uitdaging van die semifinaal vanmiddag teen Tanzanië (14:30).
’n Oorwinning in Gaborone sal die Capricorn Eagles laat vorder na die eindstryd van die Internasionale Krieketraad se T20 Wêreldbeker vir Afrika. Net een van die elf spanne sal tot die wêreldwye finale kwalifiserende toernooi vorder.
“Ons speel tans goeie krieket. Dis net ’n kwessie dat ons al drie fasette (kolf, boul en veldwerk) op een slag reg moet uitvoer.
“Die veld is nie wonderlik nie. Die kolfblad is al uitgedroog van die hele week se krieket en die bal sal waarskynlik laag bly, soos by CCD waar ons ook voor die toernooi geoefen het.
“Ons het (gister) ’n sessie met die sportsielkundige Iani de Kock gehad en ek die span sal kalm en gefokus bly en die oorwinning visualiseer.
“Ons wil net (vandag) ons beste krieket speel en nie begin ‘time travel’ na ’n moontlike eindstryd nie.”
Zimbabwe, wat vanoggend in die ander semifinaal teen Uganda te staan kom (09:30), is die toernooi se volslae gunsteling.

SES-AAN-’n-KANT
Die CCD Tigers bied môre by hul klubveld in Pionierspark ’n ses-aan-'n kanttoernooi aan om die plaaslike klubseisoen mee af te skop.
Ses van die agt deelnemende spanne in die gasheerklub, saam met Samsung FNB Wanderers, WHS Old Boys, Zebras en die gekombineerde spanne Namib Diesel en die Titans.
Die eerste wedstryde is vanmiddag en die eindstryd sal Sondag om 15:00 gespeel word.

– [email protected]