Privaatskole openingseremonie geen vrot pampoen

Esmarie Boshoff, Windhoek Afrikaanse Privaatskool - Die son sak vinnig oor Affies Park en saam met dít die temperatuur, maar steeds maak ouers en grootouers van dwarsoor die land hulself gereed op die nuutgeboude hoofpawiljoen. Leerders hardloop met los veters na waar hulle moet aantree, organiseerders gee die laaste reëlings deur van een punt na ’n ander en onnies sukkel tevergeefs om die kleintjies in reguit rye te laat staan. Die opgewondenheid is net te veel, want die 2017 NAPSO-Privaatskole Sportnaweek se Openingseremonie het amptelik begin.
Windhoek Afrikaanse Privaat-skool, hierdie jaar se gasheer, het baie moeite gedoen om seker te maak alles en almal is op hul plek vir die optog op Donderdag, 1 Junie. Daarna is elke skool, gelei deur hulle eie Mnr. en Mej. Privaatskole verteenwoordigers, oor die veld na waar hulle voor die pawiljoen aangetree het. Al 15 skole het teen 17:00 al begin regstaan en hul leerlinge bymekaar gekry. Teen 18:30 het die eerste skool begin stap.
Mnr. Arno van Wyk, die hoof uitvoerende bestuurder van WAP, het die verwelkomings gedoen en vir Mnr. Charl Celliers, voorsitter van WAP se beheerraad, aan die woord gestel. Mnr. Bertus Walters, die uitvoerende bestuurder van Securitas en dié geleentheid se hoofborg, en Mnr. Tony Tripodi, die hoof uitvoerende beampte van NAPSO, het ook hul spreukbeurt gekry.
Lizelle Esterhuizen, Mej. Namibië 2016, het al die deelnemers vir die Mnr. en Mej. Privaatskole voorgestel. Dié geleentheid het op Vrydag, 2 Junie, plaasgevind. Mnr. Charles Kabajani, die Adjunk Permanente Sekretaris van die ministerie van onderwys, kuns en kultuur, en raadslid Muasee Kazapua, die burgemeester van Windhoek, was ook albei eregaste wat met die skare van byna 15 000 mense gepraat het.
Daar word jaarliks ’n fakkel oorhandig vanaf die skool wat tans die Privaatskole naweek aanbied na die skool wat die taak die volgende jaar sal moet oorneem.
Dié jaar het Windhoek Affies se hoofseun, Benna van der Walt, die fakkel oorhandig aan Edugate se hoofmeisie, Lourie-Anne Potgieter.
Dit beloof om altyd ’n spesiale ­geleentheid gedurende die aand te wees. Daarna volg die sing van die ­geleentheid se eie Privaatskole-lied en die Volkslied.
Vir die eerste keer ooit in die geskiedenis van Privaatskole, het ’n verrassingsgaskunstenaar die skare kom vermaak met ’n klomp van sy treffers: Steve Hofmeyr. Toeskouers het sommer op die gras met mekaar begin sokkie om bietjie hitte te verkry van die koue naglig af en kon natuurlik na die tyd foto’s saam met hom gaan neem het as ’n bewysstuk vir hierdie aangename verrassing.
Daar was baie gekuier en baie gepraat, baie ou gesigte gesien en baie nuwe gesigte gesien, maar die feit bly staan dat hierdie jaar se openingseremonie ’n groot sukses was en ons kan nie wag om te sien wat volgende jaar vir ons wag nie.