Prysgeld spoor beste vertonings aan
Die nasionale beheerliggaam se Grand Prix-reeks hervat die naweek.
Tielman van Lill – Atletiek Namibië bied Saterdag uiteindelik ná sewe maande se onsekerheid sy vierde senior Coca-Cola Grand Prix-reeksbyeenkoms vir die jaar by die Onafhanklikheidstadion aan.
Die vierde en vyfde GP-kompetisies moes reeds in Maart afgehandel gewees het, terwyl die senior nasionale kampioenskap in April sou plaasvind. Nadat die Covid-19-pandemie 'n stokkie voor dié program gesteek het, sal atlete Saterdagoggend in Windhoek en weer op 7 November in Oshakati die geleentheid kry om die roes af te skud.
Die nasionale senior kampioenskap word op 13 en 14 November in die hoofstad gehou.
Die GP wat Saterdag om 09:00 met driesprong vir vroue begin, bied 29 items aan en behoort teen 15:00 iets van die verlede te wees. Atlete wat minstens 16 jaar oud is, mag aan die Grand Prix deelneem, maar atlete en klubs sal moet roer, want inskrywings vir Saterdag se kompetisie sluit vandag om 18:00.
Slegs atlete wat by AN geregistreer is, mag gratis deelneem en klubs mag hoogstens twee atlete per item inskryf. Geen individu mag ook nie aan meer as twee items deelneem nie.
Ongeregistreerde atlete sal 'n N$100-inskrywingsfooi betaal. Indien 'n atleet inskryf en nie vir sy item opdaag nie, sal sy klub met 'n N$100-boete gepenaliseer word. Indien 'n klub nie die boete(s) betaal nie, sal so 'n klub nie toegelaat word om aan die vyfde Grand Prix deel te neem nie.
Atletiek Namibië het N$100 000 in prysgeld begroot wat eweredig tussen die mans en vroue verdeel is. Sodra die GP-reeks en nasionale kampioenskap afgehandel is, sal die prysgeld aan die beste tien atlete in elke geslagsgroep gaan. Die mans- en vroueatleet met die enkele beste vertoning in die kompetisie sal natuurlik met die vetste beursie wegstap. Dié vertonings word volgens die IAAF se puntestelsel beoordeel.
Mnr. Erwin Naimhwaka, voormalige nasionale 400-kampioen en deesdae AN-president, sê 2020 was 'n taai jaar vir atletiek.
“Met die pandemie wat sport tot stilstand geruk het, was dit nie maklik nie. Maar met die grendelstatus iets van die verlede, kyk ons vorentoe met 'n propvol program vir die volgende paar weke.
“In die opbou na die Nasionale Jeugspele wat in Desember (in die Otjozondjupastreek) gehou word, is dié twee Grand Prix-byeenkomste net die regte kompetisie vir ons juniors om hulself vir die Jeugspele voor te berei. Ons verwag baie inskrywings, want atlete is honger vir kompetisie en mededinging. Daar is atlete wat deurentyd hard gewerk het en wat graag sal wil sien hoe hul vertonings verbeter het,” het die president gesê.
AN sal aanstaande maand die opstel van sy program vir 2021 finaliseer. Met die oog op die 2021 Olimpiese Spele in Tokio, sal die eerste byeenkomste glo teen middel Januarie begin en met die nasionale kampioenskap in Maart afgesluit word.
Die vyfde Grand Prix vir 2020, in Oshakati, spog met 29 items insluitend die 800 meter wat nie op komende naweek se program is nie.
– [email protected]
Die vierde en vyfde GP-kompetisies moes reeds in Maart afgehandel gewees het, terwyl die senior nasionale kampioenskap in April sou plaasvind. Nadat die Covid-19-pandemie 'n stokkie voor dié program gesteek het, sal atlete Saterdagoggend in Windhoek en weer op 7 November in Oshakati die geleentheid kry om die roes af te skud.
Die nasionale senior kampioenskap word op 13 en 14 November in die hoofstad gehou.
Die GP wat Saterdag om 09:00 met driesprong vir vroue begin, bied 29 items aan en behoort teen 15:00 iets van die verlede te wees. Atlete wat minstens 16 jaar oud is, mag aan die Grand Prix deelneem, maar atlete en klubs sal moet roer, want inskrywings vir Saterdag se kompetisie sluit vandag om 18:00.
Slegs atlete wat by AN geregistreer is, mag gratis deelneem en klubs mag hoogstens twee atlete per item inskryf. Geen individu mag ook nie aan meer as twee items deelneem nie.
Ongeregistreerde atlete sal 'n N$100-inskrywingsfooi betaal. Indien 'n atleet inskryf en nie vir sy item opdaag nie, sal sy klub met 'n N$100-boete gepenaliseer word. Indien 'n klub nie die boete(s) betaal nie, sal so 'n klub nie toegelaat word om aan die vyfde Grand Prix deel te neem nie.
Atletiek Namibië het N$100 000 in prysgeld begroot wat eweredig tussen die mans en vroue verdeel is. Sodra die GP-reeks en nasionale kampioenskap afgehandel is, sal die prysgeld aan die beste tien atlete in elke geslagsgroep gaan. Die mans- en vroueatleet met die enkele beste vertoning in die kompetisie sal natuurlik met die vetste beursie wegstap. Dié vertonings word volgens die IAAF se puntestelsel beoordeel.
Mnr. Erwin Naimhwaka, voormalige nasionale 400-kampioen en deesdae AN-president, sê 2020 was 'n taai jaar vir atletiek.
“Met die pandemie wat sport tot stilstand geruk het, was dit nie maklik nie. Maar met die grendelstatus iets van die verlede, kyk ons vorentoe met 'n propvol program vir die volgende paar weke.
“In die opbou na die Nasionale Jeugspele wat in Desember (in die Otjozondjupastreek) gehou word, is dié twee Grand Prix-byeenkomste net die regte kompetisie vir ons juniors om hulself vir die Jeugspele voor te berei. Ons verwag baie inskrywings, want atlete is honger vir kompetisie en mededinging. Daar is atlete wat deurentyd hard gewerk het en wat graag sal wil sien hoe hul vertonings verbeter het,” het die president gesê.
AN sal aanstaande maand die opstel van sy program vir 2021 finaliseer. Met die oog op die 2021 Olimpiese Spele in Tokio, sal die eerste byeenkomste glo teen middel Januarie begin en met die nasionale kampioenskap in Maart afgesluit word.
Die vyfde Grand Prix vir 2020, in Oshakati, spog met 29 items insluitend die 800 meter wat nie op komende naweek se program is nie.
– [email protected]
Kommentaar
Republikein
Geen kommentaar is op hierdie artikel gelaat nie