Redakteursforum: Nuwe hande neem leisels oor

Die verstewiging van die media-ombudsman se kapasiteit is een van die Redakteursforum se voornemens.
Augetto Graig
Augetto Graig



Plaaslike mediaregulering moet 'n gesamentlike poging van die staat en die media wees.

Die Redakteursforum van Namibië (EFN) het onlangs op die toepassing van artikel 89 van die Wet op Kommu­nikasie nommer 8 van 2009 aan­gedring.

Dié artikel fokus op 'n perskode vir Namibiese media. Volgens die ­Redakteursforum veg hy al jare om self­regulering.

Voorleggings in die verband is in 2016 en 2017 aan die Regulerende Owerheid vir Kommunikasie van Namibië (Cran) gemaak.

Die EFN is sterk gekant teen Cran se poging om die media alleen te ­reguleer.

Joseph Ailonga, EFN-voorsitter vir die afgelope vier jaar, se tydperk as voorsitter is gekenmerk deur 'n fokus op dié kwessie en groter sigbaarheid vir die EFN.

Ailonga is die afgelope Vrydag, ten tyde van die forum se jaarvergadering en leiersverkiesing, deur Frank Steffen vervang.

Steffen is die Duitse dagblad en oudste koerant in Namibië, ­Algemeine Zeitung, se redakteur.

Peter Denk is as adjunkvoorsitter gekies. Hy is 'n uitvoerende vervaardiger by die nasionale uitsaaier (NBC).

Stefan Hugo, Tribesfire Studios se uitvoerende hoof, is as tesourier verkies.

Tribesfire Studios besit One Africa en 99FM.

Denk neem by Wilfried Hähner van Hit Radio Namibia oor, terwyl Hugo vir Christof Maletsky, ­voormalige ­besturende redakteur van The ­Namibian, vervang.

Ronelle Rademeyer het 'n nominasie vir voorsitterskap van die hand gewys, maar aangedui sy sal nog twee jaar as die EFN se sekretaris-generaal dien. Charles Tjatindi, ­waarnemende nuusredakteur van The Namibian, sal haar in dié taak bystaan.

Die EFN se uitvoerende komitee sê hy wil die media-ombudsman, mnr. John Nakuta, se hand versterk.

Nakuta ondersteun ook die gesamentlike regulering van die bedryf.

Ailonga het Namibië se goeie ­reputasie geprys wat mediavryheid en vryheid van uitdrukking betref.

Hy het gesê die wêreld se agting vir Namibië se media was in Junie vanjaar by die 41ste Verenigde ­Nasies-menseregteraad in Genève, Switserland, sigbaar.

Ailonga het alle EFN-lede versoek om gehalte- en etiese joernalistiek te beoefen, en om selfregulering te ondersteun.

“Sonder jul steun sal hierdie meganisme sterf, wat wêreldwyd as goed beskou word,” het hy gesê.

 - [email protected]

Kommentaar

Republikein 2025-04-08

Geen kommentaar is op hierdie artikel gelaat nie

Meld asseblief aan om kommentaar te lewer