Regering belê in Noorde se spoorlyn

Tanja BauseDie Namibiese regering het N$108 miljoen beskikbaar gestel vir spoorstawe wat gebruik word om die spoorlyn tussen Kransberg en Tsumeb te verbeter. Die spoorstawe is genoeg om ’n spoorlyn van 40 kilometer te lê, weeg 4 100 ton en is uit Oostenryk ingevoer. Tot op hede is 350 ton spoorstawe reeds afgelewer. “Daar is geen fabriek in Afrika wat spoorstawe van dié gehalte kan maak nie. Dit moet die gewig van die treine asook die weersomstandighede en hitte van Namibië kan hanteer,” het mnr. Leon Steyn van D&M Rail Construction gesê. Die spoorstawe word per boot na Walvisbaai vervoer, waar dit op spesiaal-geboude treinwaens gelaai en na Tsobis net buite Otavi vervoer word. D&M Rail Construction (Pty) Ltd is huidig besig om die treinspoor van sowat 400 kilometer van Kransberg tot op Tsumeb te herstel en ook te verbeter. Tot dusver is 100 kilometer van die projek reeds voltooi. Die maatskappy het op 21 Januarie verlede jaar op Otavi begin om die spoorlyn in die rigting van Otjiwarongo op te gradeer. Volgens Steyn word die bestaande spoorstawe verwyder en langs die spoorlyn neergesit. Die staaldwarslêers word vervolgens afgehaal terwyl ’n padskraper die grond gelyk maak. Die staaldwarslêers word met dwarslêers van beton vervang wat op Tsumeb vervaardig word. Die spoorstawe word dan teruggeplaas en vas gesweis. “Die spoorstawe word aanmekaar gesweis met die hulp van ’n eksotermiese proses sodat die spanning in die spoorlyn die uitsetting en inkrimping kan absorbeer,” sê Steyn.Gemiddeld word 400 meter spoorlyn per dag op die wyse hanteer. Die werkers val vroeg in die oggend in en die spoorlyn word om 13:00 weer oopgestel. Volgens Steyn is die spoorlyn die afgelope 60 jaar nog nooit vervang of verbeter nie en die leeftyd van materiale soos die staaldwarslêers is verstreke. D&M Rail Construction (Pty) Ltd is ’n 100% Namibiese maatskappy wat daarna streef om slegs Namibiese materiale en werkers te gebruik. Huidig het dit meer as 500 werknemers. "Ons is ’n arbeidsintensiewe maatskappy. Die werk kan met masjiene gedoen word, maar ons wil help met werkskepping,” sê Steyn.

Regering belê in Noorde se spoorlyn

Kommentaar

Republikein 2025-04-09

Meld asseblief aan om kommentaar te lewer

Regering belê in Noorde se spoorlyn

Kommentaar

Republikein 2025-04-09

Meld asseblief aan om kommentaar te lewer

MELD AAN

Advertensie